યોગવાસિષ્ઠ · અધ્યાય 5.8

અષ્ટમઃ સર્ગઃ

શ્રીવસિષ્ઠ ઉવાચ ।
અસ્ત્યસ્તમિતસર્વાપદુદ્યત્સંપદુદારધીઃ ।
વિદેહાનાં મહીપાલો જનકો નામ વીર્યવાન્

કલ્પવૃક્ષોઽર્થિસાર્થાનાં મિત્રાલાનાં દિવાકરઃ ।
માધવો બન્ધુપુષ્પાણાં સ્ત્રીણાં મકરકેતનઃ

દ્વિજકૈરવશીતાંશુર્દ્વિપત્તિમિરભાસ્કરઃ ।
સૌજન્યરત્નજલધિર્ભુવં વિષ્ણુરિવાસ્થિતઃ

પ્રફુલ્લવાલલતિકે મઞ્જરીપુઞ્જપિઞ્જરે ।
સ કદાચિન્મધૌ મત્તે કોકિલાલાપલાસિનિ

યયૌ કુસુમિતાભોગંસુવિલાસલતાઙ્ગનમ્ ।
લીલયોપવનં કાન્તં નન્દનં વાસવો યથા

તસ્મિન્વરવને હૃદ્યે કેસરોદ્દામમારુતે ।
દૂરસ્થાનુચરઃ સાનુકુઞ્જેષુ વિચચાર હ

અથ શુશ્રાવ કસ્મિંશ્ચિત્તમાલવનગુલ્મકે ।
સિદ્ધાનામપ્રદૃશ્યાનાં સ્વપ્રસઙ્ગાદુદાહૃતાઃ

વિવિક્તવાસિનાં નિત્યં શૈલકન્દરચારિણામ્ ।
ઇમાઃ કમલપત્રાક્ષ ગીતા ગીતાત્મભાવનાઃ

સિદ્ધા ઊચુઃ ।.
દ્રષ્ટૃદૃશ્યસમાયોગાત્પ્રત્યયાનન્દનિશ્ચયઃ ।
યસ્તં સ્વમાત્મતત્ત્વોત્થં નિઃસ્પન્દં સમુપાસ્મહે

અન્યે ઊચુઃ ।
દ્રષ્ટૃદર્શનદૃશ્યાનિ ત્યક્ત્વા વાસનયા સહ ।
દર્શનપ્રથમાભાસમાત્માનં સમુપાસ્મહે

અન્યે ઊચુઃ ।
દ્વયોર્મધ્યગતં નિત્યમસ્તિનાસ્તીતિ પક્ષયોઃ ।
પ્રકાશનં પ્રકાશ્યાનામાત્માનં સમુપાસ્મહે

અન્યે ઊચુઃ ।
યસ્મિન્સર્વં યસ્ય સર્વં યતઃ સર્વં યસ્માયિદમ્ ।
યેન સર્વં યદ્ધિ સર્વં તત્સત્યં સમુપાસ્મહે

અન્યે ઊચુઃ ।
અશિરસ્કં હકારાન્તમશેષાકારસંસ્થિતમ્ ।
અજસ્રમુચ્ચરન્તં સ્વં તમાત્માનમુપાસ્મહે

અન્યે ઊચુઃ ।
સંત્યજ્ય હૃદ્ગુહેશાનં દેવમન્યં પ્રયાન્તિ યે ।
તે રત્નમભિવાઞ્છન્તિ ત્યક્તહસ્તસ્થકૌસ્તુભાઃ

અન્યે ઊચુઃ ।
સર્વાશાઃ કિલ સંત્યજ્ય ફલમેતદવાપ્યતે ।
યેનાશાવિષવલ્લીનાં મૂલમાલા વિલૂયતે

અન્યે ઊચુઃ ।
બુદ્ધ્વાપ્યત્યન્તવૈરસ્યં યઃ પદાર્થેષુ દુર્મતિઃ ।
બધ્નાતિ ભાવનાં ભૂયો નરો નાસૌ સ ગર્દભઃ

અન્યે ઊચુઃ ।
ઉત્થિતાનુત્થિતાનેતાનિન્દ્રિયાહીન્પુનઃ પુનઃ ।
હન્યાદ્વિવેકદણ્ડેન વજ્રેણેવ હરિર્ગિરીન્

અન્યે ઊચુઃ ।
ઉપશમસુખમાહરેત્પવિત્રં
સુશમવતઃ શમમેતિ સાધુચેતઃ ।
પ્રશમિતમનસઃ સ્વકે સ્વરૂપે
ભવતિ સુખે સ્થિતિરુત્તમા ચિરાય

ઇત્યાર્ષે શ્રીવાસિષ્ઠમહારામાયણે વાલ્મીકીયે દે૦ મોક્ષોપાયેષૂપશમપ્રકરણે સિદ્ધગીતાનામાષ્ટમઃ સર્ગઃ