યોગવાસિષ્ઠ · અધ્યાય 5.60

ષષ્ટિતમઃ સર્ગઃ

શ્રીવસિષ્ઠ ઉવાચ ।
ઇતિ હેમજટાધીશો લેભે પદમનુત્તમમ્ ।
વિવેકાધ્યવસાયેન બ્રાહ્મણ્યમિવ ગાધિજઃ

અનર્થાકારકાર્યાસુ નાસીચ્ચેષ્ટાસુ ખેદવાન્ ।
ભૂયોભૂયઃ પ્રયુક્તાસુ દિનમાલાસ્વિવેશ્વરઃ

તતઃપ્રભૃતિ સોઽતિષ્ઠતસર્વદા વિગતજ્વરઃ ।
સમાસમે સ્વકે કાર્યે જલૌઘાગ્ર ઇવાચલઃ

હર્ષામર્ષવિનિર્મુક્તઃ પ્રત્યહં કાર્યમાહરન્ ।
ઉદારગમ્ભીરવપુર્જહારામ્બુનિધેઃ શ્રિયમ્

સુષુપ્તપદધર્મિણ્યા ચિત્તવૃત્ત્યા વ્યરાજત ।
નિષ્કમ્પયા પ્રકાશિન્યા દીપઃ સ્વશિખયેવ સઃ

ન નિર્ઘૃણો દયાવાન્નો ન દ્વન્દ્વી નાથ મત્સરી ।
ન સુધીર્નાસુધીર્નાર્થી નાનર્થી સ બભૂવ હ

સમદર્શનયા નિત્યં વૃત્ત્યાઽચાપલધીરયા ।
અન્તઃશીતલયા રેજે પરિપૂર્ણાર્ણવેન્દુવત્

સર્વં ચિત્તત્ત્વકલનં જગદિત્યવલોક્ય સઃ ।
પ્રશાન્તસુખદુઃખશ્રીસ્તસ્ય પૂર્ણા મતિર્બભૌ

ઉલ્લસન્વિકસન્પૂર્ણસ્તિષ્ઠન્ગચ્છન્વિશન્સ્વપન્ ।
અભૂત્સમસમાધિસ્થઃ પ્રબુદ્ધશ્ચિલ્લયં ગતઃ

સ કુર્વન્વિગતાસઙ્ગં રાજ્યં રાજીવલોચનઃ ।
અતિષ્ઠદક્ષતાકારો ભૂરિવર્ષશતાન્યથ

સંનિવેશમિમં દેહનામકં તદનુ સ્વયમ્ ।
સ જહૌ તેજસાક્રાન્તો રૂપં હિમકણો યથા

વિવેશ પરમાદ્યન્તકારણં કારણેશ્વરમ્ ।
પ્રજ્ઞયા સરિતાં વારિ પરિપૂર્ણમિવામ્બુધિમ્

અધિગતવિમલૈકરૂપતેજા
વિજનદશાં સમુપેત્ય શાન્તશોકઃ ।
અલમભવદસૌ પરસ્વરૂપં
ઘટખમિવામ્બરસંયુતં મહાત્મા

ઇત્યાર્ષે શ્રીવાસિષ્ઠમહારામાયણે વાલ્મીકીયે દે૦ મોક્ષોપાયેષૂપશમપ્રકરણે સુરઘુવૃત્તાન્તે સુરઘુનિર્વાણં નામ ષષ્ટિતમઃ સર્ગઃ