યોગવાસિષ્ઠ · અધ્યાય 5.37

સપ્તત્રિંશઃ સર્ગઃ

શ્રીવસિષ્ઠ ઉવાચ ।
ઇતિ સંચિન્તયન્નેવ પ્રહ્લાદઃ પરવીરહા ।
નિર્વિકલ્પપરાનન્દસમાધિં સમુપાયયૌ

નિર્વિકલ્પસમાધિસ્થશ્ચિત્રાર્પિત ઇવાચલઃ ।
શૈલાદિવ સમુત્કીર્ણો બભૌ સ્વપદમાસ્થિતઃ

તથાનુતિષ્ઠતસ્તસ્ય કાલો બહુતરો યયૌ ।
સ્વગૃહે ભુવનસ્થસ્ય મેરોરિવ સુરદ્વિષઃ

બોધિતોઽપ્યસુરાધીશૈર્નાબુધ્યત મહામતિઃ ।
અકાલે બહુસેકોઽપિ બીજકોશાદિવાઙ્કુરઃ

એવં વર્ષસહસ્રાણિ પીનાત્માઽતિષ્ઠદેકદૃક્ ।
શાન્ત એવાસુરપુરે માર્તણ્ડ ઇવ ચોપલે

પરાનન્દદશૈકાન્તપરિણામિતયા તયા ।
નિરાનન્દં પરાભાસમિવાભાસપદં ગતઃ

એતાવતાથ કાલેન તદ્રસાતલમણ્ડલમ્ ।
બભૂવારાજકં તીક્ષ્ણં માત્સ્યન્યાયકદર્થિતમ્

હિરણ્યકશિપૌ ક્ષીણે સમાધૌ તત્સુતે સ્થિતે ।
ન બભૂવાપરઃ કશ્ચિદ્રાજા દનુસુતાલયે

અસુરેશાર્થિનાં તેષાં દાનવાનાં સમાધિતઃ ।
પરેણાપિ પ્રયત્નેન પ્રહ્લાદો ન વ્યબુધ્યત

ન પ્રાપુર્વિકસદ્રૂપં પતિં તમમરારયઃ ।
લસત્પત્રલતાજાલં નિશિ પદ્મમિવાલયઃ

સંવિદ્વાદો ન તસ્યાન્તરબોધ્યત વિચેતસઃ ।
ભુવશ્ચેષ્ટાક્રમ ઇવ પૌરુષો ગતભાસ્વતઃ

અથોદ્વિગ્નેષુ દૈત્યેષુ ગતેષ્વભિમતાં દિશમ્ ।
વિચરત્સુ યથાકામમરાજનિ પુરે પુરા

ચિરાય પાતાલમભૂદભૂપાલતયા તયા ।
માત્સ્યન્યાયવિપર્યસ્તમસ્તંગતગુણક્રમમ્

બલિમુક્તાબલપુરં મર્યાદાક્રમવર્જિતમ્ ।
સર્વાર્તાશેષવનિતં પરસ્પરહૃતામ્બરમ્

પ્રલાપાક્રન્દપુરુષં વિસંસ્થાનપુરાન્તરમ્ ।
લુઠદુદ્યાનનગરં વ્યર્થાનર્થકદર્થિતમ્

ચિન્તાપરાસુરગણં નિરન્નફલબાન્ધવમ્ ।
અકાણ્ડોત્પાતવિવશં ધ્વસ્તાશામુખમણ્ડલમ્

સુરાર્ભકપરાભૂતં ભૂતૈરાક્રાન્તમન્ત્યજૈઃ ।
ભૂતરિક્તમલક્ષ્મીકમુચ્છિન્નપ્રાયકોટરમ્

અનિયતવનિતાર્થમન્ત્રયુદ્ધં
હૃતધનદારવિરાવિતં સમન્તાત્ ।
કલિયુગસમયોદ્ભટોત્કટાભં
તદસુરમણ્ડલમાકુલં બભૂવ

ઇત્યાર્ષે શ્રીવાસિષ્ઠમહારામાયણે વાલ્મીકીયે દે૦ મોક્ષોપાયેષૂપશમપ્રકરણે અસુરમણ્ડલવ્યાકુલીભવનં નામ સપ્તત્રિંશઃ સર્ગઃ