યોગવાસિષ્ઠ · અધ્યાય 5.33

ત્રયસ્ત્રિંશઃ સર્ગઃ

શ્રીવસિષ્ઠ ઉવાચ ।
ગર્જન્તમતિસંરબ્ધં સુરલોકમથારિહા ।
ઉવાચ માધવો વાક્યં શિખિવૃન્દમિવામ્બુદઃ

શ્રીભગવાનુવાચ ।
વિબુધા મા વિષણ્ણાઃ સ્થ પ્રહ્લાદો ભક્તિમાનિતિ ।
પાશ્ચાત્યં જન્મ તસ્યેદં મોક્ષાર્હોઽસાવરિંદમઃ

અત ઉત્તરમેતેન ગર્ભતા દનુજન્મના ।
ન કર્તવ્યા પ્રદગ્ધેન બીજેનેવાઙ્કુરક્રિયા

ગુણવાન્નિર્ગુણો જાત ઇત્યનર્થક્રમં વિદુઃ ।
નિર્ગુણો ગુણવાઞ્જાત ઇત્યાહુઃ સિદ્ધિદં ક્રમમ્

આત્મીયાનિ વિચિત્રાણિ ભુવનાન્યમરોત્તમાઃ ।
પ્રયાત નાસુખાયૈષા પ્રાહ્લાદી ગુણિતેહ વઃ

શ્રીવસિષ્ઠ ઉવાચ ।
ઇત્યુક્ત્વા વિબુધાંસ્તત્ર ક્ષીરોદાર્ણવવીચિષુ ।
અન્તર્ધાનં યયૌ દેવસ્તટતાપિચ્છગુચ્છવત્

સોઽપિ સંપૂજિતહરિઃ સુરૌઘો વ્રજદમ્બરમ્ ।
પુનર્મન્દરનિર્ધૂતાત્કણજાલમિવાર્ણવાત્

પ્રહ્લાદં પ્રતિ ગીર્વાણાસ્તતઃ સ્નિગ્ધત્વમાયયુઃ ।
મહાન્તો યત્ર નોદ્વિગ્નાસ્તત્ર વિશ્વાસવન્મનઃ

પ્રત્યહં પૂજયામાસ દેવદેવં જનાર્દનમ્ ।
મનસા કર્મણા વાચા પ્રહ્લાદો ભક્તિમાનિતિ

અથ પૂજાપરસ્યાસ્ય સમવર્ધન્ત કાલતઃ ।
વિવેકાનન્દવૈરાગ્યવિભવપ્રમુખા ગુણાઃ

નાભ્યનન્દદસૌ ભોગપૂગં શુષ્કમિવ દ્રુમમ્ ।
ન ચારમત કાન્તાસુ મૃગો લોકમહીષ્વિવ

ન રેમે લોકચર્યાસુ શાસ્ત્રાર્થકથનાદૃતે ।
ન જાયતે રતિસ્તસ્ય દૃશ્યે સ્થલ ઇવાજિની

ન વિશશ્રામ ચેતોઽસ્ય ભોગરોગાનુરઞ્જને ।
મુક્તાફલમસંશ્લિષ્ટં મુક્તાફલ ઇવામલે

ત્યક્તભોગાદિકલનં વિશ્રાન્તિમનુપાગતમ્ ।
ચેતઃ કેવલમસ્યાસીદ્દોલાયામિવ યોજિતમ્

પ્રાહ્લાદીં તાં સ્થિતિં વિષ્ણુર્દેવઃ ક્ષીરોદમન્દિરાત્ ।
વિવેદ સર્વગતયા ધિયા પરમકાન્તયા

અથ પાતાલમાર્ગેણ વિષ્ણુરાહ્લાદિતાગ્રતઃ ।
પૂજાદેવગૃહં તસ્ય પ્રહ્લાદસ્ય સમાયયૌ

વિજ્ઞાયાભ્યાગતં દેવં પૂજયા દ્વિગુણેદ્ધયા ।
દૈત્યેન્દ્રઃ પુણ્ડરીકાક્ષમાદરાત્પર્યપૂજયત્

પૂજાગૃહગતં દેવં પ્રત્યક્ષાવસ્થિતં હરિમ્ ।
પ્રહ્લાદઃ પરમપ્રીતો ગિરા તુષ્ટાવ પુષ્ટયા

પ્રહ્લાદ ઉવાચ ।
ત્રિભુવનભવનાભિરામકોશં સકલકલઙ્કહરં પરં પ્રકાશમ્ ।
અશરણશરણં શરણ્યમીશં હરિમજમચ્યુતમીશ્વરં પ્રપદ્યે

કુવલયદલનીલસંનિકાશં શરદમલામ્બરકોટરોપમાનમ્ ।
ભ્રમરતિમિરકજ્જલાઞ્જનાભં સરસિજચક્રગદાધરં પ્રપદ્યે

વિમલમલિકલાપકોમલાઙ્ગં સિતદલપઙ્કજકુડ્મલાભશઙ્ખમ્ ।
શ્રુતિરણિતવિરઞ્ચિચઞ્ચરીકં સ્વહૃદયપદ્મદલાશ્રયં પ્રપદ્યે

સિતનખગણતારકાવકીર્ણં સ્મિતધવલાનનપીવરેન્દુબિમ્બમ્ ।
હૃદયમણિમરીચિજાલગઙ્ગં હરિશરદમ્બરમાતતં પ્રપદ્યે

અવિરલકૃતસૃષ્ટિસર્વલીનં સતતમજાતમવર્ધનં વિશાલમ્ ।
ગુણશતજરઠાભિજાતદેહં તરુદલશાયિનમર્ભકં પ્રપદ્યે

નવવિકસિતપદ્મરેણુગૌરં સ્ફુટકમલાવપુષા વિભૂષિતાઙ્ગમ્ ।
દિનશમસમયારુણાઙ્ગરાગં કનકનિભામ્બરસુન્દરં પ્રપદ્યે

દિતિસુતનલિનીતુષારપાતં સુરનલિનીસતતોદિતાર્કબિમ્બમ્ ।
કમલજનલિનીજલાવપૂરં હૃદિ નલિનીનિલયં વિભું પ્રપદ્યે

ત્રિભુવનનલિનીસિતારવિન્દં તિમિરસમાનવિમોહદીપમગ્ર્યમ્ ।
સ્ફુટતરમજડં ચિદાત્મતત્ત્વં જગદખિલાર્તિહરં હરિં પ્રપદ્યે

શ્રીવસિષ્ઠ ઉવાચ ।
ઇતિ ગુણબહુલાભિર્વાગ્ભિરભ્યર્ચિતોઽસૌ હરિરસુરવિનાશઃ શ્રીનિષણ્ણાંસદેશઃ ।
જલદ ઇવ મયૂરં પ્રીતિમાન્પ્રીયમાણં કુવલયદલનીલઃ પ્રત્યુવાચાસુરેન્દ્રમ્

ઇત્યાર્ષે શ્રીવાસિષ્ઠમહારામાયણે વાલ્મીકીયે દે૦ મોક્ષોપાયેષૂપશમપ્રકરણે નારાયણાગમનં નામ ત્રયસ્ત્રિંશઃ સર્ગઃ