યોગવાસિષ્ઠ · અધ્યાય 3.83

ત્ર્યશીતિતમઃ સર્ગઃ

શ્રીવસિષ્ઠ ઉવાચ ।
કિરાતમણ્ડલે તસ્મિન્યે ભવન્તિ મહીભૃતઃ ।
તૈસ્તૈઃ સહ પરા મૈત્રી તસ્યાઃ સમભિજાયતે

સર્વાંસ્તત્ર મહોત્પાતાન્પિશાચાદિભયાન્યપિ ।
રોગાંશ્ચ યોગસંસિદ્ધા નિવારયતિ રાક્ષસી

બહુવર્ષગણેનૈષા ધ્યાનાદ્વિરતિમાગતા ।
તત્રાગત્ય સમસ્તાંસ્તાન્વધ્યાઞ્જન્તૂન્સુસંચિતાન્

અદ્યાપિ તત્ર યે વધ્યાસ્તે તદર્થં મહીભુજા ।
નીયન્તે મિત્રસન્માને કે હિ નાધ્યવસાયિનઃ

તસ્યાં ધ્યાનનિષણ્ણાયાં કિરાતજનમણ્ડલે ।
અનાયાન્ત્યાં ચિરં કાલં જનૈર્દોષપ્રશાન્તયે

સા દેવી કન્દરાનામ્ની મઙ્ગલેતરનામિકા ।
સંપ્રતિષ્ઠાપિતા મૂર્ત્યા પુરે ગગનકોટરે

તતઃપ્રભૃતિ તત્રત્યો યો યો ભવતિ ભૂમિપઃ ।
સ કન્દરાં ભગવતીં પ્રતિષ્ઠાપયતિ સ્વયમ્

યઃ કન્દરાપ્રતિષ્ઠાં ચ ન કરોતિ નૃપાધમઃ ।
તસ્યોપતાપનિચયાઃ પ્રજા નિઘ્નન્તિ યત્નતઃ

તત્પૂજનાદવાપ્નોતિ જનસ્તન્નિખિલં ફલમ્ ।
સ્વવાસનાવશોચ્છૂનમનર્થં યાત્યપૂજનાત્

વધ્યલોકોપહારેણ સા દેવી પરિપૂજ્યતે ।
પ્રતિમા સા સ્થિતાદ્યાપિ ચિત્રસ્થા ફલદાયિની

સકલકોમલમઙ્ગલકારિણી કવલિતાખિલવધ્યમહાજના ।
જયતિ સાત્ર કિરાતજનાસ્પદે પરમબોધવતી ચિરદેવતા

ઇત્યાર્ષે શ્રીવાસિષ્ઠમહારામાયણે વાલ્મીકીયે ઉત્પત્તિપ્રકરણે કર્ક૦ કન્દરાપૂજનં નામ ત્ર્યશીતિતમઃ સર્ગઃ