યોગવાસિષ્ઠ · અધ્યાય 3.39

શ્રીવસિષ્ઠ ઉવાચ ।
અથ વીર ઇવારક્તઃ કાલેનાસ્તમિતો રવિઃ ।
અસ્ત્રતેજઃપરિમ્લાનપ્રતાપોઽબ્ધૌ સમુજ્ઝિતઃ

રણરક્તરુચિર્વ્યોમદર્પણપ્રતિબિમ્બિતા ।
જહૌ સૂર્યશિરશ્છેદે સંધ્યાલેખોદભૂત્ક્ષણમ્

ભૂપાતાલનભોદિગ્ભ્યઃ પ્રલયબ્ધિજલૌઘવત્ ।
સમાજગ્મુસ્તનત્તાલા વેતાલા વલયા ઇવ

મૃષ્ટધ્વાન્તાસિવલિતે દિનનાગેન્દ્રમસ્તકે ।
સંધ્યારાગારુણં કીર્ણં તારાનિકરમૌક્તિકમ્

નિઃસત્ત્વેષુ તમોન્ધેષુ રસનારસશાલિષુ ।
સંકોચમાયયુઃ પદ્મામૃતાનાં હૃદયેષ્વિવ

મીલત્પક્ષાઃ ક્ષણાત્સુપ્તાઃ કૃચ્છ્રપ્રોચ્છ્રિતકન્ધરાઃ ।
કુલાયેષુ ખગા આસઞ્છવાઙ્ગેષ્વિવ હેતયઃ

આસન્નચન્દ્રસુભગા લોકાઃ કુસુમપઙ્ક્તયઃ ।
ઉલ્લસદ્ધૃદયા જાતા વીરપક્ષેષ્વિવ શ્રિયઃ

રક્તવારિમયી સાયમઙ્ગગુપ્તશિલીમુખા ।
સંકુચદ્વક્ત્રપદ્માભૂદ્રણભૂમિરિવાબ્જિની

ઉપર્યભૂદ્વ્યોમસરસ્તારાકુમુદમણ્ડિતમ્ ।
અધસ્ત્વભૂદ્વારિસરઃ સ્ફુરત્કુમુદતારકમ્

તમસ્યપેતભીતાનિ ભૂતાનિ મિલિતાન્યલમ્ ।
પયાંસીવ વિસેતૂનિ પ્રસૃતાનિ દિશં પ્રતિ

આસીદ્રણાઙ્ગણં ગાયદ્વેતાલકુલસંકુલમ્ ।
ક્વણત્કઙ્કાલકાઙ્કસ્થકઙ્કકાકોલકેલિમત્

અથ કાષ્ઠચિતાજ્વાલસતારામ્બરભાસ્વરમ્ ।
પચત્પચપચાશબ્દિમેદોમાંસમયાનલમ્

સર્વાઙ્ગાસ્થિસ્ફુટાસ્ફોટસ્ફુટચ્ચિતિચયોન્મુખમ્ ।
વેતાલલલનારબ્ધજલલીલાતિરોહિતમ્

શ્વકાકયક્ષવેતાલતાલકોલાહલોલ્બણમ્ ।
ગમાગમેન ભૂતાનાં સમુડ્ડીનવનોપમમ્

રક્તમાંસવસામેદોહરણવ્યગ્રડાકિનિ ।
ચર્વિતાસૃગ્વસામાંસસ્રવત્સૃક્કિપિશાચકમ્

મધ્યમધ્યચિતાલોકપ્રકટાસૃક્શવવ્રજમ્ ।
વિરૂપિકાનીયમાનસ્વાંસન્યસ્તમહાશવમ્

ઉત્તાણ્ડવોગ્રકુમ્ભાણ્ડમણ્ડલોડ્ડામરોદરમ્ ।
છમિચ્છમિત્પ્રલાપાન્તં મેદોસૃગ્વાષ્પસામ્બુદમ્

વહદ્રક્તનદીરંહોરૂઢભૂચરરૂપિકમ્ ।
વેતાલકુલકઙ્કાલકર્ષણાકુલકાકલમ્

મૃતેભોદરમઞ્જૂષાસુપ્તવેતાલબાલકમ્ ।
વિવિક્તૈકરણોદ્દેશપાનક્રીડાસ્થરાક્ષસમ્

મત્તવેતાલકલહચિતાલાતરણોજ્જ્વલમ્ ।
વહદ્રક્તવસામિશ્રગન્ધબન્ધુરમારુતમ્

રૂપિકાપેટિકાવાન્તારણદ્રટરટારવમ્ ।
અર્ધપક્વશવાસ્વાદલુબ્ધયક્ષોલ્લસત્કલિ

તુઙ્ગવઙ્ગકલિઙ્ગાઙ્ગતઙ્ગણાઙ્ગલગત્ખગમ્ ।
તારાપાતોપમહસત્સંમુખજ્વાલરૂપિકમ્

પતદ્વેતાલસોલ્લાસમધ્યસ્થાસૃગ્વિરૂપિકમ્ ।
પિશાચાકર્ણિતાભ્યર્ણયોગિનીગણનાયકમ્

પ્રસૃતાન્ત્રમહાતન્ત્રીપ્રાયસંપન્નવાદનમ્ ।
પિશાચવાસનોત્ક્રાન્તપિશાચીભૂતમાનવમ્

રૂપિકાલોકનાપૂર્વત્રાસાર્ધમૃતસદ્ભટમ્ ।
ક્વચિદ્વેતાલરક્ષોભિરપરીપૂર્ણમદ્રકમ્

સ્વરૂપિકાસ્કન્ધપતચ્છવત્રસ્તનિશાચરમ્ ।
નભઃસંઘટ્ટિતાપૂર્વભૂતપેટકસંકટમ્

અતિપ્રયત્નાપહૃતમ્રિયમાણનરામિષમ્ ।
સ્વભક્ષ્યાપેક્ષપક્ષેષુ વિક્ષિપ્તશવરાશિવત્

શિવામુખાનલશિખાખણ્ડોત્થમિતિરક્તગૈઃ ।
સમુડ્ડીનનવાશોકપુષ્પગુચ્છમિવાભિતઃ

કબન્ધકન્ધરાબન્ધવ્યગ્રવેતાલબાલકમ્ ।
યક્ષરક્ષઃપિશાચાદિકચદાકાશગોલ્મુકમ્

આકાશભૂધરનિકુઞ્જગુહાન્તરાલ-
પિણ્ડોપમણ્ડિતતમોમ્બુદપીઠપૂરમ્ ।
વ્યાલોલભૂતરભસાકુલકલ્પવાત-
વ્યાધૂતલોકકરકાણ્ડકપેટકલ્પમ્

ઇત્યાર્ષે શ્રીવાસિષ્ઠમહારામાયણે વાલ્મીકીયે ઉત્પત્તિપ્રકરણે લી૦ નિશાચરાકુલરાત્રિરણાઙ્ગણવર્ણનં નામૈકોનચત્વારિશઃ સર્ગઃ