વાયુપુરાણમ્ · અધ્યાય 20

બૃહસ્પતિરુવાચ॥
યમસ્તુ યાનિ શ્રાદ્ધાનિ પ્રોવાચ શશ(શિવ)બિન્દવે।
તાનિ મે શ્રૃણુ કાર્ત્સ્ન્યેન નક્ષત્રેષુ પૃથક્ પૃથક્

શ્રાદ્ધં યઃ કૃત્તિકાયોગે કરોતિ સતતં નરઃ।
અગ્નીનાધાય સાપત્યો જાયતે સ ગતજ્વરઃ

અપત્યકામો રોહિણ્યાં સૌમ્યેનૌજસ્વિતા ભવેત્ ।
પ્રાયશઃ ક્રૂરકર્મ્મા તુ ચાર્દ્રાયાં શ્રાદ્ધમાચરેત્

ક્ષેત્રભાગી ભવેત્ પુત્રી શ્રાદ્ધં કુર્વ્વન્ પુનર્વ્વસૌ।
ધનધાન્યસમાકીર્ણઃ પુત્રપૌત્રસમાકુલઃ

તુષ્ટિકામઃ પુનસ્તિષ્યે શ્રાદ્ધં કુર્વીત માનવઃ।
આશ્લેષાસુ પિતૄનાર્ચ્ય વીરાન્ પુત્રાનવાપ્નુયાત્

શ્રેષ્ઠો ભવતિ જ્ઞાતીનાં મઘાસુ શ્રાદ્ધમાચરન્।
ફલ્ગુનીષુ પિતૄનાર્ચ્ય સૌભાગ્યં લભતે નરઃ

પ્રધાનશીલઃ સાપત્ય ઉત્તરાસુ કરોતિ યઃ।
સ સત્સુ મુખ્યો ભવતિ હસ્તે યસ્તર્પયેત્પિતૄન્

ચિત્રાયાં ચૈવ યઃ કુર્યાત્ પશ્યેદ્રૂપવતઃ સુતાન્।
સ્વાતિના ચૈવ યઃ કુર્યાદ્વિદ્વાઁલ્લાભમવાપ્નુયાત્

પુત્રાર્થન્તુ વિશાખાસુ શ્રાદ્ધમીહેત માનવઃ।
અનુરાધાસુ કુર્વ્વાણો નરશ્ચક્રં પ્રવર્ત્તયેત્

આધિપત્યં લભેચ્છ્રૈષ્ઠ્યં જ્યેષ્ઠાયાં સતતં તુ યઃ।
મૂલેનારોગ્યમિચ્છન્તિ આષાઢાસુ મહદ્યશઃ

આષાઢાભિશ્ચોત્તરાભિર્વીતશોકો ભવેન્નરઃ।
શ્રવણાયાં સુલોકેષુ પ્રાપ્રુયાત્ પરમાં ગતિમ્

રાજ્યભાગ્વૈ ધનિષ્ઠાસુ પ્રાપ્નુયાદ્વિપુલં ધનમ્।
શ્રાદ્ધં ત્વભિજિતા કુર્વન્ વિન્દતેઽજાવિકં ફલમ્

નક્ષત્રે વારુણે કુર્વ્વન્ ભિષક્સિદ્ધિમવાપ્નુયાત્।
પૂર્વ્વે પ્રોષ્ઠપદે કુર્વ્વન્ વિન્દતેઽજાવિકં ફલમ્

ઉત્તરાસ્વનતિક્રમ્ય વિન્દેદ્ઘા વૈ સહસ્રશઃ।
બહુરૂપકૃતં દ્રવ્યં વિન્દેત્ કુર્વ્વંસ્તુ રેવતીમ્।
અશ્વાંશ્ચૈવાશ્વિનીયુક્તો ભરણ્યામાયુરુત્તમમ્

ઇમં શ્રાદ્ધવિધિં કુર્વ્વઞ્છશબિન્દુર્મહીમિમામ્।
કૃત્સ્નાં તુ લેભે સ કૃત્સ્નાં લબ્ધા ચ પ્રશશંસ તમ્

ઇતિ શ્રીમહાપુરાણે વાયુપ્રોક્તે નક્ષત્રવિશેષે શ્રાદ્ધફલવર્ણનં નામ વિંશોઽધ્યાયઃ