વરાહ પુરાણ · અધ્યાય 93

શ્રીવરાહ ઉવાચ ।
તતો મહિષદૈત્યસ્તુ કામરૂપી મહાબલઃ ।
મત્તહસ્તિનામારુહ્ય યિયાસુર્મેરુપર્વતમ્

તત્રૈન્દ્રં પુરમાસાદ્ય દેવૈઃ સહ શતક્રતુમ્ ।
અભિદુદ્રાવ દૈત્યેન્દ્રસ્તતો દેવાઃ ક્રુધાન્વિતાઃ

આદાય સ્વાનિ શસ્ત્રાણિ વાહનાનિ વિશેષતઃ ।
અધિષ્ઠાયાસુરાનાજૌ દુદ્રુવુર્મુદિતા ભૃશમ્

તેષાં પ્રવવૃતે યુદ્ધં તુમુલં લોમહર્ષણમ્ ।
ઘોરં પ્રચણ્ડયોધાનામન્યોન્યમભિગર્જતામ્

તત્રાઞ્જનો નીલકુક્ષિર્મેઘવર્ણો બલાહકઃ ।
ઉદરાક્ષો લલાટાક્ષઃ સુભીમો ભીમવિક્રમઃ ।
સ્વર્ભાનુશ્ચેતિ દૈત્યાષ્ટૌ વસૂન્ દુદ્રુવુરાહવે

યથાસંખ્યેન તદ્વચ્ચ દૈત્યા દ્વાદશ ચાપરે ।
આદિત્યાન્ દૈત્યવર્યાસ્તુ તેષાં પ્રાધાન્યતઃ શ્રૃણુ

ભીમો ધ્વઙ્ક્ષો ધ્વસ્તકર્ણઃ શઙ્કુકર્ણસ્તથૈવ ચ ।
વજ્રકાયોઽતિવીર્યશ્ચ વિદ્યુન્માલી તથૈવ ચ

રક્તાક્ષો ભીમદંષ્ટ્રસ્તુ વિદ્યુજ્જિહ્વસ્તથૈવ ચ ।
અતિકાયો મહાકાયો દીર્ઘબાહુઃ કૃતાન્તકઃ

એતે દ્વાદશ દૈત્યેન્દ્રા આદિત્યાન્ યુધિ દુદ્રુવુઃ ।
સ્વકં સૈન્યમુપાદાય તદ્વદન્યેઽપિ દાનવાઃ ।
રુદ્રાન્ દુદ્રુવુરવ્યગ્રા યથાસંખ્યેન કોપિતાઃ

કાલઃ કૃતાન્તો રક્તાક્ષો હરણો મિત્રહાઽનિલઃ ।
યજ્ઞહા બ્રહ્મહા ગોઘ્નઃ સ્ત્રીઘ્નઃ સંવર્ત્તકસ્તથા

ઇત્યેતે દશ ચૈકશ્ચ દૈત્યેન્દ્રા યુદ્ધદુર્મદાઃ ।
યથાસંખ્યેન રુદ્રાંસ્તુ દુદ્રુવુર્ભીમવિક્રમાઃ

શેષાન્ દેવાન્ શેષદૈત્યા યથાયોગમુપાદ્રવન્ ।
સ્વયં મહિષદૈત્યસ્તુ ઇન્દ્રં દુદ્રાવ વેગિતઃ

સ ચાપિ બલવાન્ દૈત્યો બ્રહ્મણો વરદર્પિતઃ ।
અવધ્યઃ પુરુષેણાજૌ યદ્યપિ સ્યાત્ પિનાકધૃક્

આદિત્યૈર્વસુભિઃ સાધ્યૈ રુદ્રૈશ્ચ નિહતા ભૃશમ્ ।
અસુરા યાતુધાનાશ્ચ સંખ્યાપૂરણકેવલાઃ

દેવાનામપિ સૈન્યાનિ નિહતાન્યસુરૈર્યુધિ ।
એવં ભૂતે તદા ભગ્ને દેવેન્દ્રે વિદ્રુતાઃ સુરાઃ

અર્દિતા વિવિધૈઃ શસ્ત્રૈઃ શૂલપટ્ટિશમુદ્ગરૈઃ ।
ગતવન્તો બ્રહ્મલોકમસુરૈરર્દિતાઃ સુરાઃ

॥ ઇતિ શ્રીવરાહપુરાણે ભગવચ્છાસ્ત્રે ત્રિનવતિતમોઽધ્યાયઃ