વરાહ પુરાણ · અધ્યાય 60

અગસ્ત્ય ઉવાચ ।
શાન્તિવ્રતં પ્રવક્ષ્યામિ તવ રાજન્ શ્રૃણુષ્વ તત્ ।
યેન ચીર્ણેન શાન્તિઃ સ્યાત્ સર્વદા ગૃહમેધિનામ્

પઞ્ચમ્યાં શુક્લપક્ષસ્ય કાર્ત્તિકે માસિ સુવ્રત ।
આરભેદ્ વર્ષમેકં તુ ભુઞ્જીયાદમ્લવર્જિતમ્

નક્તં દેવં તુ સંપૂજ્ય હરિં શેષોપરિ સ્થિતમ્ ।
અનન્તાયેતિ પાદૌ તુ વાસુકાયેતિ વૈ કટિમ્

તક્ષકાયેતિ જઠરમુરઃ કર્કોટકાય ચ ।
પદ્માય કણ્ઠં સંપૂજ્ય મહાપદ્માય દોર્યુગમ્

શઙ્ખપાલાય વક્ત્રં તુ કુટિલાયેતિ વૈ શિરઃ ।
એવં વિષ્ણુગતં પૂજ્ય પૃથક્ત્વેન ચ પૂજયેત્

ક્ષીરેણ સ્નપનં કુર્યાત્ તાનુદ્દિશ્ય હરેઃ પુનઃ ।
તદગ્રે હોમયેત્ ક્ષીરં તિલૈઃ સહ વિચક્ષણઃ

એવં સંવત્સરસ્યાન્તે કુર્યાદ્ બ્રાહ્મણભોજનમ્ ।
નાગં તુ કાઞ્ચનં કુર્યાદ્ બ્રાહ્મણાય નિવેદયેત્

એવં યઃ કુરુતે ભક્ત્યા વ્રતમેતન્નરાધિપઃ ।
તસ્ય શાન્તિર્ભવેન્નિત્યં નાગાનાં ન ભયં તથા

॥ ઇતિ શ્રીવરાહપુરાણે ભગવચ્છાસ્ત્રે ષષ્ટિતમોઽધ્યાયઃ