વરાહ પુરાણ · અધ્યાય 59

અગસ્ત્ય ઉવાચ ।
અથાવિઘ્નકરં રાજન્ કથયામિ શ્રૃણુષ્વ મે ।
યેન સમ્યક્ કૃતેનાપિ ન વિઘ્નમુપજાયતે

ચતુર્થ્યાં ફાલ્ગુને માસિ ગ્રહીતવ્યં વ્રતં ત્વિદમ્ ।
નક્તાહારેણ રાજેન્દ્ર તિલાન્નં પારણં સ્મૃતમ્ ।
તદેવાગ્નૌ તુ હોતવ્યં બ્રાહ્મણાય ચ તદ્ ભવેત્

ચાતુર્માસ્યં વ્રતં ચૈતત્ કૃત્વા વૈ પઞ્ચ મે તથા ।
સૌવર્ણં ગજવક્ત્રં તુ કૃત્વા વિપ્રાય દાપયેત્

પાયસૈઃ પઞ્ચભિઃ પાત્રૈરુપેતં તુ તિલૈસ્તથા ।
એવં કૃત્વા વ્રતં ચૈતત્ સર્વવિઘ્નૈર્વિમુચ્યતે

હયમેધસ્ય વિઘ્ને તુ સંજાતે સગરઃ પુરા ।
એતદેવ ચરિત્વા તુ હયમેધં સમાપ્તવાન્

તથા રુદ્રેણ દેવેન ત્રિપુરં નિઘ્નતા પુરા ।
એતદેવ કૃતં તસ્માત્ ત્રિપુરં તેન પાતિતમ્ ।
મયા સમુદ્રં પિબતા એતદેવ કૃતં વ્રતમ્

અન્યૈરપિ મહીપાલૈરેતદેવ કૃતં પુરા ।
તપોઽર્થિભિર્જ્ઞાનકૃતૈર્નિર્વિઘ્નાર્થે પરંતપ

શૂરાય ધીરાય ગજાનનાય
લમ્બોદરાયૈકદંષ્ટ્રાય ચૈવ ।
એવં પૂજ્યસ્તદ્દિને તત્ પુનશ્ચ
હોમં કુર્યાદ્ વિઘ્નવિનાશહેતોઃ

અનેન કૃતમાત્રેણ સર્વવિઘ્નૈર્વિમુચ્યતે ।
વિનાયકસ્ય કૃપયા કૃતકૃત્યો નરો ભવેત્

॥ ઇતિ શ્રીવરાહપુરાણે ભગવચ્છાસ્ત્રે નવપઞ્ચાશોઽધ્યાયઃ