વરાહ પુરાણ · અધ્યાય 44

દુર્વાસ ઉવાચ ।
વૈશાખેઽપ્યેવમેવં તુ સંકલ્પ્ય વિધિના નરઃ ।
તદ્વત્ સ્નાનાદિકં કૃત્વા તતો દેવાલયં વ્રજેત્

તત્રારાધ્ય હરિં ભક્ત્યા એભિર્મન્ત્રૈર્વિચક્ષણઃ ।
જામદગ્ન્યાય પાદૌ તુ ઉદરં સર્વધારિણે ।
મધુસૂદનાયેતિ કટિમુરઃ શ્રીવત્સધારિણે

ક્ષત્રાન્તકાય ચ ભુજૌ મણિકણ્ઠાય કણ્ઠકમ્ ।
સ્વનામ્ના શઙ્ખચક્રૌ તુ શિરો બ્રહ્માણ્ડધારિણે

એવમભ્યર્ચ્ય મેધાવી પ્રાગ્વત્ તસ્યાગ્રતો ઘટમ્ ।
વિન્યસ્ય સ્થગિતં તદ્વદ્ વસ્ત્રયુગ્મેન વેષ્ટિતમ્

વૈણવેન તુ પાત્રેણ તસ્મિન્ સંસ્થાપયેદ્ધરિમ્ ।
જામદગ્ન્યેતિ વિખ્યાતં નામ્ના ક્લેશવિનાશનમ્

દક્ષિણે પરશું હસ્તે તસ્ય દેવસ્ય કારયેત્ ।
સર્વગન્ધૈશ્ચ સંપૂજ્ય પુષ્પૈર્નાનાવિધૈઃ શુભૈઃ

તતસ્તસ્યાગ્રતઃ કુર્યાજ્જાગરં ભક્તિમાન્નરઃ ।
પ્રભાતે વિમલે સૂર્યે બ્રાહ્મણાય નિવેદયેત્ ।
એવં નિયમયુક્તસ્ય યત્ફલં તન્નિબોધ મે

આસીદ્ રાજા મહાભાગો વીરસેનો મહાબલઃ ।
અપુત્રઃ સ પુરા તીવ્રં તપસ્તેપે મહૌજસા

ચરતસ્તત્તપો ઘોરં યાજ્ઞવલ્ક્યો મહામુનિઃ ।
આજગામ મહાયોગી તં દૃષ્ટ્વા નાતિદૂરતઃ

તમાયાન્તમથો દૃષ્ટ્વા ઋષિં પરમવર્ચસમ્ ।
કૃતાઞ્જલિપુટો ભૂત્વા રાજાભ્યુત્થાનમાકરોત્

સ પૂજિતો મુનિઃ પ્રાહ કિમર્થં તપ્યતે તપઃ ।
રાજન્ કથય ધર્મજ્ઞ કિં તે કાર્યં વિવક્ષિતમ્

રાજોવાચ ।
અપુત્રોઽહં મહાભાગ નાસ્તિ મે પુત્રસંતતિઃ ।
તેન મે તપ આંસ્થાય કૃષ્યતે સ્વતનુર્દ્વિજ

યાજ્ઞવલ્ક્ય ઉવાચ ।
અલં તે તપસાઽનેન મહાક્લેશેન પાર્થિવ ।
અલ્પાયાસેન તે પુત્રો ભવિષ્યતિ ન સંશયઃ

રાજોવાચ ।
કથં મે ભવિતા પુત્રો અલ્પાયાસેન વૈ દ્વિજ ।
એતન્મે કથય પ્રીતો ભગવન્ પ્રણતસ્ય હ

દુર્વાસા ઉવાચ ।
એવમુક્તો મુનિસ્તેન પાર્થિવેન યશસ્વિના ।
આચખ્યૌ દ્વાદશીં ચેમાં વૈશાખે સિતપક્ષજામ્

સ હિ રાજા વિધાનેન પુત્રકામો વિશેષતઃ ।
ઉપોષ્ય લબ્ધવાન્ પુત્રં નલં પરમધાર્મિકમ્ ।
યોઽદ્યાપિ કીર્ત્યતે લોકે પુણ્યશ્લોકો નરોત્તમઃ

પ્રાસઙ્ગિકં ફલં હ્યેતદ્ ગતસ્યાસ્ય મહામુને ।
સુપુત્રો જાયતે વિત્તવિદ્યાવાન્ કાન્તિરુત્તમા

ઇહ જન્મનિ કિં ચિત્રં પરલોકે શ્રૃણુષ્વ મે ।
કલ્પમેકં બ્રહ્મલોકે વસિત્વાઽપ્સરસાં ગણૈઃ

ક્રીડત્યન્તે પુનઃ સૃષ્ટૌ ચક્રવર્તી ભવેદ્ ધ્રુવમ્ ।
ત્રિંશત્યબ્દસહસ્ત્રાણિ જીવતે નાત્ર સંશયઃ

॥ ઇતિ શ્રીવરાહપુરાણે ભવગચ્છાસ્ત્રે ચતુશ્ચત્વારિંશોઽધ્યાયઃ