વરાહ પુરાણ · અધ્યાય 43

દુર્વાસા ઉવાચ ।
એવમેવ મુને માસિ ચૈત્રે સંકલ્પ્ય દ્વાદશીમ્ ।
ઉપોષ્યારાધયેત્ પશ્ચાત્ દેવદેવં જનાર્દનમ્

વામનાયેતિ પાદૌ તુ વિષ્ણવે કટિમર્ચયેત્ ।
વાસુદેવેતિ જઠરમુરઃ સંપૂર્ણકાય ચ

કણ્ઠં વિશ્વકૃતે પૂજ્ય શિરો વૈ વ્યોમરૂપિણે ।
બાહૂ વિશ્વજિતે પૂજ્ય સ્વનામ્ના શંખચક્રકૌ

અનેન વિધિનાભ્યર્ચ્ય દેવદેવં સનાતનમ્ ।
પ્રાગ્વદેવોત્તરં કુમ્ભં સયુગ્મં પુરતો ન્યસેત્

પ્રાગુક્તપાત્રે સંસ્થાપ્ય વામનં કાઞ્ચનં બુધઃ ।
યથાશક્ત્યા કૃતં હ્રસ્વં સિતયજ્ઞોપવીતિનમ્

કુણ્ડિકાં સ્થાપયેત્ પાર્શ્વે છત્રિકાં પાદુકે તથા ।
અક્ષમાલાં ચ સંસ્થાપ્ય વૃસિકાં ચ વિશેષતઃ

એતૈરુપસ્કરૈર્યુક્તં પ્રભાતે સ દ્વિજાતયે ।
દાપયેત્ પ્રીયતાં વિષ્ણુર્હ્રસ્વરૂપીત્યુદીરયેત્

માસનામ્ના તુ સંયુક્તં પ્રાદુર્ભાવવિધાનકમ્ ।
પ્રીયતામિતિ સર્વત્ર વિધિરેષ પ્રકીર્તિતઃ

શ્રૂયતે ચ પુરા રાજા હર્યશ્વઃ પૃથિવીપતિઃ ।
અપુત્રઃ સ તપસ્તેપે પુત્રમિચ્છંસ્તપોધનમ્

તસ્યૈવ કુર્વતો વ્યુષ્ટિં પુત્રાર્થે મુનિસત્તમ ।
આજગામ હરિઃ પૂર્વં દ્વિજરૂપં સમાશ્રિતઃ

ઉવાચ તપસા રાજન્ કિં તે વ્યવસિતં પ્રભો ।
પુત્રાર્થમિતિ પ્રોવાચ તં વિપ્રઃ પ્રત્યુવાચ હ

ઇદમેવ વિધાનં તુ કુરુ રાજન્નુવાચ હ ।
એવમુક્ત્વા તુ રાજાનં ક્ષણાદન્તર્હિતઃ પ્રભુઃ

રાજાઽપિ તં ચકારાશુ મન્ત્રવન્તં દ્વિજાતયે ।
દરિદ્રાય તથા પ્રાદાત્ જ્યોતિર્ગાર્ગાય ધીમતે

યથાદિતેરપુત્રાયાઃ સ્વયં પુત્રત્વમાગતઃ ।
ભગવંસ્તેન સત્યેન મમાપ્યસ્તુ સુતો વરઃ

અનેન વિધિના દત્તે તસ્ય પુત્રોઽભવન્મુને ।
કુવલાશ્વ ઇતિ ખ્યાતશ્ચક્રવર્તી મહાબલઃ

અપુત્રો લભતે પુત્રમધનો લભતે ધનમ્ ।
ભ્રષ્ટરાજ્યો લભેદ્ રાજ્યં મૃતો વિષ્ણુપુરં વ્રજેત્

કીર્ત્તિત્વા સુચિરં તત્ર ઇહ મર્ત્યમુપાગતઃ ।
ચક્રવર્તી ભવેદ્ ધીમાન્ યયાતિરિવ નાહુષઃ

॥ ઇતિ શ્રીવરાહપુરાણે ભગવચ્છાસ્ત્રે ત્રયશ્ચત્વારિંશોઽધ્યાયઃ