વરાહ પુરાણ · અધ્યાય 40

દુર્વાસા ઉવાચ ।
તથૈવ પૌષમાસે તુ અમૃતં મથિતં સુરૈઃ ।
તત્ર કૂર્મો ભવેદ્ દેવઃ સ્વયમેવ જનાર્દનઃ

તસ્યેયં તિથિરુદ્દિષ્ટા હરેર્વૈ કૂર્મરૂપિણઃ ।
પુષ્યમાસસ્ય યા શુદ્ધા દ્વાદશી શુક્લપક્ષતઃ

તસ્યાં પ્રાગેવ સંકલ્પ્ય પ્રાગ્વત્ સ્નાન્નાદિકાઃ ક્રિયાઃ ।
નિર્વર્ત્યારાધયેદ્ રાત્ર્યામેકાદશ્યાં જનાર્દનમ્ ।
પૃથઙ્મન્ત્રૈર્મુનિશ્રેષ્ઠ દેવદેવં જનાર્દનમ્

ૐકૂર્માય પાદૌ પ્રથમં પ્રપૂજ્ય
નારાયણેતિ હરેઃ કટિં ચ ।
સંકર્ષણાયેત્યુદરં વિશોકે-
ત્યુરોભવાયેતિ તથૈવ કણ્ઠમ્ ।
સુબાહવેત્યેવ ભુજૌ શિરશ્ચ
નમો વિશાલાય રથાઙ્ગસારમ્

સ્વનામમન્ત્રેણ સુગન્ધપુષ્પૈ-
ર્નાનાનિવેદ્યૈર્વિવિધૈઃ ફલૈશ્ચ ।
અભ્યર્ચ્ય દેવં કલશં તદગ્રે
સંસ્થાપ્ય માલ્યૈઃ સિતકણ્ઠદામ

તં રત્નગર્ભં તુ પુરેવ કૃત્વા
સ્વશક્તિતો હેમમયં તુ દેવમ્ ।
સમન્દરં કૂર્મરૂપેણ કૃત્વા
સંસ્થાપ્ય તામ્રે ઘૃતપૂર્ણપાત્રે ।
પૂર્ણઘટસ્યોપરિ સંનિવેશ્ય
શ્વો બ્રાહ્મણાયૈવમેવં તુ દદ્યાત્

શ્વો બ્રાહ્મણાન્ ભોજ્ય સદક્ષિણાંશ્ચ
યથાશક્ત્યા પ્રીણયેદ્ દેવદેવમ્ ।
નારાયણં કૂર્મરૂપેણ પશ્ચાદ્
તથા સ્વયં ભુઞ્જીત સભૃત્યવર્ગઃ

એવં કૃતે વિપ્ર સમસ્તપાપં
વિનશ્યતે નાત્ર કુર્યાદ્ વિચારમ્ ।
સંસારચક્રં તુ વિહાય શુદ્ધં
પ્રાપ્નોતિ લોકં ચ હરેઃ પુરાણમ્ ।
પ્રયાન્તિ પાપાનિ વિનાશમાશુ
શ્રીમાંસ્તથા જાયતે સત્યધર્મઃ

અનેકજન્માન્તરસંચિતાનિ
નશ્યન્તિ પાપાનિ નરસ્ય ભક્ત્યા ।
પ્રાગુક્તરૂપં તુ ફલં ભવેત
નારાયણસ્તુષ્ટિમાયાતિ સદ્યઃ

॥ ઇતિ શ્રીવરાહપુરાણે ભગવચ્છાસ્ત્રે ચત્વારિંશોઽધ્યાયઃ