વરાહ પુરાણ · અધ્યાય 26

પ્રજાપાલ ઉવાચ ।
શરીરસ્ય કથં મૂર્તિગ્રહણં જ્યોતિષો દ્વિજ ।
એતન્મે સંશયં છિન્ધિ પ્રણતસ્ય દ્વિજોત્તમ

મહાતપા ઉવાચ ।
યોઽસાવાત્મા જ્ઞાનશક્તિરેક એવ સનાતનઃ ।
સ દ્વિતીયં યદા ચૈચ્છત્ તદા સ્વાત્મસ્થિતો જ્વલત્

યઃ સૂર્ય ઇતિ ભાસ્વાંસ્તુ અન્યોન્યેન મહાત્મનઃ ।
લોલીભૂતાનિ તેજાંસિ ભાસયન્તિ જગત્ત્રયમ્

તસ્મિન્ સર્વે સુરાઃ સિદ્ધા ગણાઃ સર્વે મહર્ષિભિઃ ।
સમં સૂતા ઇતિ વિભો તસ્માત્ સૂર્યો ભવન્ સ્તુતઃ

લોલીભૂતસ્ય તસ્યાશુ તેજસોઽભૂચ્છરીરકમ્ ।
પૃથક્ત્વેન રવિઃ સોઽથ કીર્ત્ત્યતે વેદવાદિભિઃ

ભાસયન્ સર્વલોકાંસ્તુ યતોઽસાવુત્થિતો દિવિ ।
અતોઽસૌ ભાસ્કરઃ પ્રોક્તઃ પ્રકર્ષાચ્ચ પ્રભાકરઃ

દિવા દિવસ ઇત્યુક્તસ્તત્કારિત્વાદ્ દિવાકરઃ ।
સર્વસ્ય જગતસ્ત્વાદિરાદિત્યસ્તેન ઉચ્યતે

એતસ્ય દ્વાદશાદિત્યાઃ સંભૂતાસ્તેજસા પૃથક્ ।
પ્રધાન એવ સર્વેષાં સર્વદા સ વિબુધ્યતે

તં દૃષ્ટ્વા જગતો વ્યાપ્તિં કુર્વાણં પરમેશ્વરમ્ ।
તસ્યૈવાન્તઃ સ્થિતા દેવા વિનિષ્ક્રમ્ય સ્તુતિં જગુઃ

દેવા ઊચુઃ ।
ભવાન્ પ્રસૂતિર્જગતઃ પુરાણઃ
ક્ષયામલૈવ પ્રદહન્ જગન્તિ ।
સમુત્થિતો નાથ શમં પ્રયાહિ
મા દેવલોકાન્ પ્લુષ કર્મસાક્ષિન્

ત્વયા તતં સર્વત એવ તેજઃ
પ્રતાપિના સૂર્ય યજુઃપ્રવૃત્તે ।
તિગ્મં રથાઙ્ગં તવ દેવકલ્પં
કાલાખ્યમધ્વાન્તકરં વદન્તિ

પ્રભાકરસક્ત્વં રવિરાદિદેવ
આત્મા સમસ્તસ્ય ચરાચરસ્ય ।
પિતામહસક્ત્વં વરુણો યમશ્ચ
ભૂતં ભવિષ્યચ્ચ વદન્તિ સિદ્ધાઃ

ધ્વાન્તં પ્રણુ ત્વં સુરલોકપૂજ્ય
પ્રયાહિ શાન્તિં પિતરો વદન્તિ ।
વેદાન્તવેદ્યોઽસિ મખેષુ દેવ
ત્વં હૂયસે વિષ્ણુરસિ પ્રસહ્ય ।
ઇતિ સ્તુતસ્તૈઃ સુરનાથ ભક્ત્યા
પ્રપાહિ શંભો ન ઇતિ પ્રસહ્ય

એવમુક્તસ્તદા દેવૈઃ સૌમ્યાં મૂર્ત્તિમથાકરોત્ ।
પ્રકાશત્વં જગામાશુ દેવતાનાં મહાપ્રભઃ

એતત્સર્વં સુરાણાં તુ દહનં શામિતં પુરા ।
સપ્તમ્યાં ખલુ સૂર્યેણ મૂર્ત્તિત્વં કૃતવાન્ ભુવિ

એતાં યઃ પુરુષો ભક્ત્યા ઉપાસ્તે સૂર્યમર્ચયેત્ ।
ભાસ્કરેણ ચ તસ્યાસૌ ફલમિષ્ટં પ્રયચ્છતિ

એતત્ તે કથિતં રાજન્ સૂર્યાખ્યાનં પુરાતનમ્ ।
આદિમન્વન્તરે વૃત્તં માતરઃ શ્રૃણુ સાંપ્રતમ્

॥ ઇતિ શ્રીવરાહપુરાણે ભગવચ્છાસ્ત્રે ષડ્વિંશોઽધ્યાયઃ