વરાહ પુરાણ · અધ્યાય 19

મહાતપા ઉવાચ ।
વિષ્ણોર્વિભૂતિમાહાત્મ્યં કથિતં તે પ્રસઙ્ગતઃ ।
તિથીનાં શ્રૃણુ માહાત્મ્યં કથ્યમાનં મયા નૃપ

ઇત્થંભૂતો મહાનગ્નિર્બ્રહ્મક્રોધોદ્ભવો મહાન્ ।
ઉવાચ દેવં બ્રહ્માણં તિથિર્મે દીયતાં વિભો ।
યસ્યામહં સમસ્તસ્ય જગતઃ ખ્યાતિમાપ્નુયામ્

બ્રહ્મોવાચ ।
દેવાનામથ યક્ષાણાં ગન્ધર્વાણાં ચ સત્તમ ।
આદૌ પ્રતિપદા યેન ત્વમુત્પન્નોઽસિ પાવક

ત્વત્પદાત્ પ્રતિપદં ચાન્યા સંભવિષ્યન્તિ દેવતાઃ ।
અતસ્તે પ્રતિપન્નામ તિથિરેષા ભવિષ્યતિ

તસ્યાં તિથૌ હવિષ્યેણ પ્રાજાપત્યેન મૂર્તિના ।
હોષ્યન્તિ તેષાં પ્રીતાઃ સ્યુઃ પિતરઃ સર્વદેવતાઃ

ચતુર્વિધાનિ ભૂતાનિ મનુષ્યાઃ પશવોઽસુરાઃ ।
દેવાઃ સર્વે સગન્ધર્વાઃ પ્રીતાઃ સ્યુસ્તર્પિતે ત્વયિ

યશ્ચોપવાસં કુર્વીત ત્વદ્ભક્તઃ પ્રતિપદ્દિને ।
ક્ષીરાશનો વા વર્ત્તેત શ્રૃણુ તસ્ય ફલં મહત્

ચતુર્યુગાનિ ષટ્ત્રિંશત્ સ્વર્લોકેઽસૌ મહીયતે ।
તેજસ્વી રૂપસંપન્નો દ્રવ્યવાન્ જાયતે નરઃ

ઇહ જન્મન્યસૌ રાજા પ્રેત્ય સ્વર્ગે મહીયતે ।
તૂષ્ણીં બભૂવ સોપ્યગ્નિર્બ્રહ્મદત્તાશ્રયં યયૌ

ય ઇદં શ્રૃણુયાન્નિત્યં પ્રાતરુત્થાય માનવઃ ।
અગ્નેર્જન્મ સ પાપેભ્યો મુચ્યતે નાત્ર સંશયઃ

॥ ઇતિ શ્રીવરાહપુરાણે ભગવચ્છાસ્ત્રે એકોનવિંશોઽધ્યાયઃ