તન્ત્રસાર · ભાગ 2121

પાનોપભોગલીલાહાસાદિષુ યો ભવેદ્ વિમર્શમયઃ ।
અવ્યક્તધ્વનિરાવસ્ફોટશ્રુતિનાદનાદાન્તૈઃ ॥ અભ્ત્સ્_22.38
અવ્યુચ્છિન્નાનાહતપરમાર્થૈર્ મન્ત્રવીર્યં તત્ ।
ગમનાગમવિશ્રાન્તિષુ કર્ણે નયને દ્વિલક્ષ્યસમ્પર્કે ॥ અભ્ત્સ્_22.39
તત્સમ્મીલનયોગે દેહાન્તાખ્યે ચ યામલે ચક્રે ।
કુચમધ્યહૃદયદેશાદ્ ઓષ્ઠાન્તે કણ્ઠગં યદ્ અવ્યક્તમ્ ॥ અભ્ત્સ્_22.40
તચ્ ચક્રદ્વયમધ્યગમ્ આકર્ણ્ય ક્ષોભવિગમસમયે યત્ ।
નિર્વાન્તિ તત્ર ચૈવં યો ઽષ્ટવિધો નાદભૈરવઃ પરમઃ ॥ અભ્ત્સ્_22.41
જ્યોતિર્ ધ્વનિશ્ ચ યસ્માત્ સા માન્ત્રી વ્યાપ્તિર્ ઉચ્યતે પરમા ।
કર્મણિ કર્મણિ વિદુષઃ સ્યાજ્ જીવતો મુક્તિઃ ॥ અભ્ત્સ્_22.42
તજ્જ્ઞઃ શાસ્ત્રે મુક્તઃ પરકુલવિજ્ઞાનભાજનં ગર્ભઃ ।
શૂન્યાશૂન્યાલયં કુર્યાદ્ એકદણ્ડે ઽનલાનિલૌ ॥ અભ્ત્સ્_22.43
શૂલં સમરસીકૃત્ય રસે રસમ્ ઇવ સ્થિતમ્ ।
ત્યક્તાશઙ્કો નિરાચારો નાહમ્ અસ્મીતિ ભાવયન્ ॥ અભ્ત્સ્_22.44
દેહસ્થા દેવતાઃ પશ્યન્ હ્લાદોદ્વેગાદિ ચિદ્ધને ।
કર્ણાક્ષિમુખનાસાદિચક્રસ્થં દેવતાગણમ્ ॥ અભ્ત્સ્_22.45
ગ્રહીતારં સદા પશ્યન્ ખેચર્યા સિધ્યતિ ધ્રુવમ્ ॥ અભ્ત્સ્_22.47
શ્વભ્રે સુદૂરે ઝટિતિ સ્વદેહં સંપાતયન્ વાસમ્ અસાહસેન ।
આકુઞ્ચ્ય હસ્તદ્વિતયં પ્રપશ્યન્ મુદ્રામ્ ઇમાં વ્યોમચરીં ભજેત ॥ અભ્ત્સ્_22.48
ઇત્ય્ એષ યામલયાગઃ ॥ અભ્ત્સ્_22.49
ઉક્તવ્યાપ્તિકે પ્રાણે વિશ્વમયે પ્રોક્તસંવિદ્વ્યાપ્ત્યા તર્પણાન્નગન્ધધૂપાદિસમર્પણેન ઉપોદ્બલનં પ્રાણયાગઃ ॥ અભ્ત્સ્_22.50
વિશ્રાન્તિરૂઢિસ્ તુ સંવિદ્યાગઃ પ્રાગ્ એવ નિરૂપિતઃ ॥ અભ્ત્સ્_22.51
એવમ્ એતેભ્યો યાગેભ્યો ઽન્યતમં કૃત્વા યદિ તથાવિધનિર્વિચિકિત્સતાપચિત્રિતહૃદયઃ શિષ્યો ભવતિ તદા તસ્મૈ તદ્યાગદર્શનપૂર્વકં તિલાજ્યાહુતિપૂર્વકનિરપેક્ષમ્ એવ પૂર્વોક્તવ્યાપ્ત્યા અનુસંધાનક્રમેણ અવલોકનયા દીક્ષાં કુર્યાત્ પરોક્ષદીક્ષાદિકે નૈમિત્તિકાન્તે તુ પૂર્વ એવ વિધિઃ ॥ અભ્ત્સ્_22.52
કેવલમ્ એતદ્ યાગપ્રધાનતયા ઇતિ ॥ અભ્ત્સ્_22.53
ગુરુશરીરે સપ્તમઃ કુલયાગઃ સર્વોત્તમઃ સો ઽપિ પ્રાગ્ યાગસાહિત્યેન સકૃદ્ એવ કૃતઃ સર્વં પૂરયતિ ઇતિ શિવમ્ ॥ અભ્ત્સ્_22.54