તન્ત્રાલોક · અધ્યાય 37

ઉક્તનીત્યૈવ સર્વત્ર વ્યવહારે પ્રવર્તિતે ।
પ્રસિદ્ધાવુપજીવ્યાયામવશ્યગ્રાહ્ય આગમઃ ॥ 1

યથા લૌકિકદૃષ્ટ્યાન્યફલભાક્ તત્પ્રસિદ્ધિતઃ ।
સમ્યગ્વ્યવહરંસ્તદ્વચ્છિવભાક્ તત્પ્રસિદ્ધિતઃ ॥ 2

તદવશ્યગ્રહીતવ્યે શાસ્ત્રે સ્વાંશોપદેશિનિ ।
મનાક્ફલે@ભ્યુપાદેયતમં તદ્વિપરીતકમ્ ॥ 3

યથા ખગેશ્વરીભાવનિઃશઙ્કત્વાદ્વિષં વ્રજેત્ ।
ક્ષયં કર્મસ્થિતિસ્તદ્વદશઙ્કાદ્ભૈરવત્વતઃ ॥ 4

યદાર્ષે પાતહેતૂક્તં તદસ્મિન્વામશાસને ।
આશુસિદ્ધ્યૈ યતઃ સર્વમાર્ષં માયોદરસ્થિતમ્ ॥ 5

તચ્ચ યત્સર્વસર્વજ્ઞદૃષ્ટં તચ્ચાપિ કિં ભવેત્ ।
યદશેષોપદેશેન સૂયતે@નુત્તરં ફલમ્ ॥ 6

યથાધરાધરપ્રોક્તવસ્તુતત્ત્વાનુવાદતઃ ।
ઉત્તરં કથિતં સંવિત્સિદ્ધં તદ્ધિ તથા ભવેત્ ॥ 7

યદુક્તાધિકસંવિત્તિસિદ્ધવસ્તુનિરૂપણાત્ ।
અપૂર્ણસર્વવિત્પ્રોક્તિર્જ્ઞાયતે@ધરશાસને ॥ 8

ઊર્ધ્વશાસનવસ્ત્વંશે દૃષ્ટ્વાપિચ સમુજ્ઝિતે ।
અધઃ શાસ્ત્રેષુ માયાત્વં લક્ષ્યતે સર્ગરક્ષણાત્ ॥ 9

શ્રીમદાનન્દશાસ્ત્રાદૌ પ્રોક્તં ચ પરમેશિના ।
ઋષિવાક્યં બહુક્લેશમધ્રુવાલ્પફલં મિતમ્ ॥ 10

નૈવ પ્રમાણયેદ્વિદ્વાન્ શૈવમેવાગમં શ્રયેત્ ।
તદાર્ષે પાતહેતૂક્તં તદસ્મિન્ વામશાસને ॥ 11

આશુસિદ્ધ્યૈ યતઃ સર્વમાર્ષં માયોદરસ્થિતમ્ ।
યથા ખગેશ્વરીભાવનિઃશઙ્કત્વાદ્વિષં વ્રજેત્ ॥ 12

ક્ષયં કર્મસ્થિતિસ્તદ્વદશઙ્કાદ્ભૈરવત્વતઃ ।
અજ્ઞત્વાનુપદેષ્ટૃત્વસંદષ્ટે@ધરશાસને ॥ 13

એતદ્વિપર્યયાદ્ગ્રાહ્યમવશ્યં શિવશાસનમ્ ।
દ્વાવાપ્તૌ તત્ર ચ શ્રીમચ્છ્રીકણ્ઠલકુલેશ્વરૌ ॥ 14

દ્વિપ્રવાહમિદં શાસ્ત્રં મમ્યઙ્નિઃશ્રેયસપ્રદમ્ ।
પ્રાચ્યસ્ય તુ યથાભીષ્ટભોગદત્વમપિ સ્થિતમ્ ॥ 15

તચ્ચ પઞ્ચવિધં પ્રોક્તં શક્તિવૈચિત્ર્યચિત્રિતમ્ ।
પઞ્ચસ્રોત ઇતિ પ્રોક્તં શ્રીમચ્છ્રીકણ્ઠશાસનમ્ ॥ 16

દશાષ્ટાદશધા સ્રોતઃપઞ્ચકં યત્તતો@પ્યલમ્ ।
ઉત્કૃષ્ટં ભૈરવાભિખ્યં ચતુઃષષ્ટિવિભેદિતમ્ ॥ 17

શ્રીમદાનન્દશાસ્ત્રાદૌ પ્રોક્તં ભગવતા કિલ ।
સમૂહઃ પીઠમેતચ્ચ દ્વિધા દક્ષિણવામતઃ ॥ 18

મન્ત્રો વિદ્યેતિ તસ્માચ્ચ મુદ્રામણ્ડલગં દ્વયમ્ ।
મનનત્રાણદં યત્તુ મન્ત્રાખ્યં તત્ર વિદ્યયા ॥ 19

ઉપોદ્બલનમાપ્યાયઃ સા હિ વેદ્યાર્થભાસિની ।
મન્ત્રપ્રતિકૃતિર્મુદ્રા તદાપ્યાયનકારકમ્ ॥ 20

મણ્ડલં સારમુક્તં હિ મણ્ડશ્રુત્યા શિવાહ્વયમ્ ।
એવમન્યોન્યસંભેદવૃત્તિ પીઠચતુષ્ટયમ્ ॥ 21

યતસ્તસ્માદ્ભવેત્સર્વં પીઠે પીઠે@પિ વસ્તુતઃ ।
પ્રધાનત્વાત્તસ્ય તસ્ય વસ્તુનો ભિન્નતા પુનઃ ॥ 22

કથિતા સાધકેન્દ્રાણાં તત્તદ્વસ્તુપ્રસિદ્ધયે ।
પ્રત્યેકં તચ્ચતુર્ધૈવં મણ્ડલં મુદ્રિકા તથા ॥ 23

મન્ત્રો વિદ્યેતિ ચ પીઠમુત્કૃષ્ટં ચોત્તરોત્તમ્ ।
વિદ્યાપીઠપ્રધાનં ચ સિદ્ધયોગીશ્વરીમતમ્ ॥ 24

તસ્યાપિ પરમં સારં માલિનીવિજયોત્તરમ્ ।
ઉક્તં શ્રીરત્નમાલાયામેતચ્ચ પરમેશિના ॥ 25

અશેષતન્ત્રસારં તુ વામદક્ષિણમાશ્રિતમ્ ।
એકત્ર મિલિતં કૌલં શ્રીષડર્ધકશાસને ॥ 26

સિદ્ધાન્તે કર્મ બહુલં મલમાયાદિરૂષિતમ્ ।
દક્ષિણં રૌદ્રકર્માઢ્યં વામં સિદ્ધિસમાકુલમ્ ॥ 27

સ્વલ્પપુણ્યં બહુક્લેશં સ્વપ્રતીતિવિવર્જિતમ્ ।
મોક્ષવિદ્યાવિહીનં ચ વિનયં ત્યજ દૂરતઃ ॥ 28

યસ્મિન્કાલે ચ ગુરુણા નિર્વિકલ્પં પ્રકાશિતમ્ ।
મુક્તસ્તેનૈવ કાલેન યન્ત્રં તિષ્ઠતિ કેવલમ્ ॥ 29

મયૈતત્સ્રોતસાં રૂપમનુત્તરપદાદ્ધ્રુવાત્ ।
આરભ્ય વિસ્તરેણોક્તં માલિનીશ્લોકવાર્તિકે ॥ 30

જિજ્ઞાસુસ્તત એવેદમવધારયિતું ક્ષમઃ ।
વયં તૂક્તાનુવચનમફલં નાદ્રિયામહે ॥ 31

ઇત્થં દદદનાયાસાજ્જીવન્મુક્તિમહાફલમ્ ।
યથેપ્સિતમહાભોગદાતૃત્વેન વ્યવસ્થિતમ્ ॥ 32

ષડર્ધસારં સચ્છાસ્ત્રમુપાદેયમિદં સ્ફુટમ્ ।
ષટ્ત્રિંશતા તત્ત્વબલેન સૂતા યદ્યપ્યનન્તા ભુવનાવલીયમ્ ।
બ્રહ્માણ્ડમત્યન્તમનોહરં તુ વૈચિત્ર્યવર્જં નહિ રમ્યભાવઃ ॥ 33

ભૂરાદિસપ્તપુરપૂર્ણતમે@પિ તસ્મિન્ મન્યે દ્વિતીયભુવનં ભવનં સુખસ્ય ।
ક્વાન્યત્ર ચિત્રગતિસૂર્યશશાઙ્કશોભિરાત્રિન્દિવપ્રસરભોગવિભાગભૂષા ॥ 34

તત્રાપિચ ત્રિદિવભોગમહાર્ઘવર્ષદ્વીપાન્તરાદધિકમેવ કુમારિકાહ્વમ્ ।
યત્રાધરાધરપદાત્પરમં શિવાન્તમારોઢુમપ્યધિકૃતિઃ કૃતિનામનર્ઘા ॥ 35

પ્રાક્કર્મભોગિપશુતોચિતભોગભાજા કિં જન્મના નનુ સુખૈકપદે@પિ ધામ્નિ ।
સર્વો હિ ભાવિનિ પરં પરિતોષમેતિ સંભાવિતે નતુ નિમેષિણિ વર્તમાને ॥ 36

કન્યાહ્વયે@પિ ભુવને@ત્ર પરં મહીયાન્ દેશઃ સ યત્ર કિલ શાસ્ત્રવરાણિ ચક્ષુઃ ।
જાત્યન્ધસદ્મનિ ન જન્મ ન કો@ભિનિન્દેદ્ભિન્નાઞ્જનાયિતરવિપ્રમુખપ્રકાશે ॥ 37

નિઃશેષશાસ્ત્રસદનં કિલ મધ્યદેશસ્તસ્મિન્નજાયત ગુણાભ્યધિકો દ્વિજન્મા ।
કો@પ્યત્રિગુપ્ત ઇતિ નામનિરુક્તગોત્રઃ શાસ્ત્રાબ્ધિચર્વણકલોદ્યદગસ્ત્યગોત્રઃ ॥ 38

તમથ લલિતાદિત્યો રાજા નિજં પુરમાનયત્ પ્રણયરભસાત્ કશ્મીરાખ્યં હિમાલયમૂર્ધગમ્ ।
અધિવસતિ યદ્ગૌરીકાન્તઃ કરૈર્વિજયાદિભિર્યુગપદખિલં ભોગાસારં રસાત્ પરિચર્ચિતુમ્ ॥ 39

સ્થાને સ્થાને મુનિભિરખિલૈશ્ચક્રિરે યન્નિવાસા યચ્ચાધ્યાસ્તે પ્રતિપદમિદં સ સ્વયં ચન્દ્રચૂડઃ ।
તન્મન્યે@હં સમભિલષિતાશેષસિદ્ધેર્નસિદ્ધ્યૈ કશ્મીરેભ્યઃ પરમથ પુરં પૂર્ણવૃત્તેર્ન તુષ્ટ્યૈ ॥ 40

યત્ર સ્વયં શારદચન્દ્રશુભ્રા શ્રીશારદેતિ પ્રથિતા જનેષુ ।
શાણ્ડિલ્યસેવારસસુપ્રસન્ના સર્વં જનં સ્વૈર્વિભવૈર્યુનક્તિ ॥ 41

નારઙ્ગારુણકાન્તિ પાણ્ડુવિકચદ્બલ્લાવદાતચ્છવિ પ્રોદ્ભિન્નામલમાતુલુઙ્ગકનકચ્છાયાભિરામપ્રભમ્ ।
કેરીકુન્તલકન્દલીપ્રતિકૃતિશ્યામપ્રભાભાસ્વરં યસ્મિઞ્શક્તિચતુષ્ટયોજ્જ્વલમલં મદ્યં મહાભૈરવમ્ ॥ 42

ત્રિનયનમહાકોપજ્વાલાવિલીન ઇહ સ્થિતો મદનવિશિખવ્રાતો મદ્યચ્છલેન વિજૃમ્ભતે ।
કથમિતરથા રાગં મોહં મદં મદનજ્વરં વિદધદનિશં કામાતઙ્કૈર્વશીકુરુતે જગત્ ॥ 43

યત્કાન્તાનાં પ્રણયવચસિ પ્રૌઢિમાનં વિદત્તે યન્નિર્વિઘ્નં નિધુવનવિધૌ સાધ્વસં સંધુનોતિ ।
યસ્મિન્ વિશ્વાઃ કલિતરુચયો દેવતાશ્ચક્રચર્યસ્તન્માર્દ્વીકં સપદિ તનુતે યત્ર ભોગાપબર્ગૌ ॥ 44

ઉદ્યદ્ગૌરાઙ્કુરવિકસિતૈઃ શ્યામરક્તૈઃ પલાશૈરન્તર્ગાઢારુણરુચિલસત્કેસરાલીવિચિત્રૈઃ ।
આકીર્ણા ભૂઃ પ્રતિપદમસૌ યત્ર કાશ્મીરપુષ્પૈઃ સમ્યગ્દેવીત્રિતયયજનોદ્યાનમાવિષ્કરોતિ ॥ 45

સર્વો લોકઃ કવિરથ બુધો યત્ર શૂરો@પિ વાગ્મી ચન્દ્રોદ્દ્યોતા મસૃણગતયઃ પૌરનાર્યશ્ચ યત્ર ।
યત્રાઙ્ગારોજ્જ્વલવિકસિતાનન્તસૌષુમ્ણમાર્ગગ્રસ્તાર્કેન્દુર્ગગનવિમલો યોગિનીનાં ચ વર્ગઃ ॥ 46

શ્રીમત્પરં પ્રવરનામ પુરં ચ તત્ર યન્નિર્મમે પ્રવરસેન ઇતિ ક્ષિતીશઃ ।
યઃ સ્વપ્રતિષ્ઠિતમહેશ્વરપૂજનાન્તે વ્યોમોત્પતન્નુદસૃજત્કિલ ધૂપઘણ્ટામ્ ॥ 47

આન્દોલનોદિતમનોહરવીરનાદૈઃ સા ચાસ્ય તત્સુચરિતં પ્રથયાંબભૂવ ।
સદ્વૃત્તસારગુરુતૈજસમૂર્તયો હિ ત્યક્તા અપિ પ્રભુગુણાનધિકં ધ્વનન્તિ ॥ 48

સંપૂર્ણચન્દ્રવિમલદ્યુતિવીરકાન્તાગાઢાઙ્ગરાગઘનકુઙ્કુમપિઞ્જરશ્રીઃ ।
પ્રોદ્ધૂતવેતસલતાસિતચામરૌઘૈરાજ્યાભિષેકમનિશં દદતી સ્મરસ્ય ॥ 49

રોધઃપ્રતિષ્ઠિતમહેશ્વરસિદ્ધલિઙ્ગસ્વાયંભુવાર્ચનવિલેપનગન્ધપુષ્પૈઃ ।
આવર્જ્યમાનતનુવીચિનિમજ્જનૌઘવિધ્વસ્તપાપ્મમુનિસિદ્ધમનુષ્યવન્દ્યા ॥ 50

ભોગાપવર્ગપરિપૂરણકલ્પવલ્લી ભોગૈકદાનરસિકાં સુરસિદ્ધસિન્ધુમ્ ।
ન્યક્કુર્વતી હરપિનાકકલાવતીર્ણા યદ્ભૂષયત્યવિરતં તટિની વિતસ્તા ॥ 51

તસ્મિન્ કુવેરપુરચારિસિંતાંશુમૌલિસાંમુખ્યદર્શનવિરૂઢપવિત્રભાવે ।
વૈતસ્તરોધસિ નિવાસમમુષ્ય ચક્રે રાજા દ્વિજસ્ય પરિકલ્પિતભૂરિસંપત્ ॥ 52

તસ્યાન્વયે મહતિ કો@પિ વરાહગુપ્તનામા બભૂવ ભગવાન્ સ્વયમન્તકાલે ।
ગીર્વાણસિન્ધુલહરીકલિતાગ્રમૂર્ધા યસ્યાકરોત્ પરમનુગ્રહમાગ્રહેણ ॥ 53

તસ્યાત્મજશ્ચુખલકેતિ જને પ્રસિદ્ધશ્ચન્દ્રાવદાતધિષણો નરસિંહગુપ્તઃ ।
યં સર્વશાસ્ત્રરસમજ્જનશુભ્રચિત્તં માહેશ્વરી પરમલંકુરુતે સ્મ ભક્તિઃ ॥ 54

તારુણ્યસાગરતરઙ્ગભરાનપોહ્ય વૈરાગ્યપોતમધિરુહ્ય દૃઢં હઠેન ।
યો ભક્તિરોહણમવાપ્ય મહેશચિન્તારત્નૈરલં દલયતિ સ્મ ભવાપદસ્તાઃ ॥ 55

તસ્યાત્મજો@ભિનવગુપ્ત ઇતિ પ્રસિદ્ધઃ શ્રીચન્દ્રચૂડચરણાબ્જપરાગપૂતઃ ।
માતા વ્યયૂયુજદમું કિલ બાલ્ય એવ દૈવં હિ ભાવિપરિકર્મણિ સંસ્કરોતિ ॥ 56

માતા પરં બન્ધુરિતિ પ્રવાદઃ સ્નોહો@તિગાઢીકુરુતે હિ પાશાન્ ।
તન્મૂલબન્ધે ગલિતે કિલાસ્ય મન્યે સ્થિતા જીવત એવ મુક્તિઃ ॥ 57

પિત્રા સ શબ્દગહને કૃતસંપ્રવેશસ્તર્કાર્ણવોર્મિપૃષતામલપૂતચિત્તઃ ।
સાહિત્યસાન્દ્રરસભોગપરો મહેશભક્ત્યા સ્વયંગ્રહણદુર્મદયા ગૃહીતઃ ॥ 58

સ તન્મયીભૂય ન લોકવર્તનીમજીગણત્ કામપિ કેવલં પુનઃ ।
તદીયસંભોગવિવૃદ્ધયે પુરા કરોતિ દાસ્યં ગુરુવેશ્મસુ સ્વયમ્ ॥ 59

આનન્દસંતતિમહાર્ણવકર્ણધારઃ સદ્દૈશિકૈરકવરાત્મજવામનાથઃ ।
શ્રીનાથસંતતિમહામ્બરઘર્મકાન્તિઃ શ્રીભૂતિરાજતનયઃ સ્વપિતૃપ્રસાદઃ ॥ 60

ત્રૈયમ્બકપ્રસરસાગરશાયિસોમાનન્દાત્મજોત્પલજલક્ષ્મણગુપ્તનાથઃ ।
તુર્યાખ્યસંતતિમહોદધિપૂર્ણચન્દ્રઃ શ્રીસોમતઃ સકલવિત્કિલ શંભુનાથઃ ॥ 61

શ્રીચન્દ્રશર્મભવભક્તિવિલાસયોગાનન્દાભિનન્દશિવશક્તિવિચિત્રનાથાઃ ।
અન્યે@પિ ધર્મશિવવામનકોદ્ભટશ્રીભૂતેશભાસ્કરમુખપ્રમુખા મહાન્તઃ ॥ 62

એતે સેવારસવિરચિતાનુગ્રહાઃ શાસ્ત્રસારપૌઢાદેશપ્રકટસુભગં સ્વાધિકારં કિલાસ્મૈ ।
યત્ સંપ્રાદુર્યદપિ ચ જનાન્નૈક્ષતાક્ષેત્રભૂતાન્ સ્વાત્મારામસ્તદયમનિશં તત્ત્વસેવારસો@ભૂત્ ॥ 63

સો@નુગ્રહીતુમથ શાંભવભક્તિભાજં સ્વં ભ્રાતરમખિલશાસ્ત્રવિમર્શપૂર્ણમ્ ।
યાવન્મનઃ પ્રણિદધાતિ મનોરથાખ્યં તાવજ્જનઃ કતિપયસ્તમુપાસસાદ ॥ 64

શ્રીશૌરિસંજ્ઞતનયઃ કિલ કર્ણનામા યો યૌવને વિદિતશાંભવતત્ત્વસારઃ ।
દેહં ત્યજન્ પ્રથયતિ સ્મ જનસ્ય સત્યં યોગચ્યુતં પ્રતિ મહામુનિકૃષ્ણવાક્યમ્ ॥ 65

તદ્બાલમિત્રમથ મન્ત્રિસુતઃ પ્રસિદ્ધઃ શ્રીમન્દ્ર ઇત્યખિલસારગુણાભિરામઃ ।
લક્ષ્મીસરસ્વતિ સમં યમલંચકાર સાપત્નકં તિરયતે સુભગપ્રભાવઃ ॥ 66

અન્યે પિતૃવ્યતનયાઃ શિવશક્તિશુભ્રાઃ ક્ષેમોત્પલાભિનવચક્રકપદ્મગુપ્તાઃ ।
યે સંપદં તૃણમમંસત શંભુસેવાસંપૂરિતં સ્વહૃદયં હૃદિ ભાવયન્તઃ ॥ 67

ષડર્ધશાસ્ત્રેષુ સમસ્તમેવ યેનાધિજગ્મે વિધિમણ્ડલાદિ ।
સ રામગુપ્તો ગુરુશંભુશાસ્ત્રસેવાવિધિવ્યગ્રસમગ્રમાર્ગઃ ॥ 68

અન્યો@પિ કશ્ચન જનઃ શિવશક્તિપાતસંપ્રેરણાપરવશસ્વકશક્તિસાર્થઃ ।
અભ્યર્થનાવિમુખભાવમશિક્ષિતેન તેનાપ્યનુગ્રહપદં કૃત એષ વર્ગઃ ॥ 69

આચાર્યમભ્યર્થયતે સ્મ ગાઢં સંપૂર્ણતન્ત્રાધિગમાય સમ્યક્ ।
જાયેત દૈવાનુગૃહીતબુદ્ધેઃ સંપત્પ્રબન્ધૈકરસૈવ સંપત્ ॥ 70

સો@પ્યભ્યુપાગમદભીપ્સિતમસ્ય યદ્વા સ્વાતોદ્યમેવ હિ નિનર્તિષતો@વતીર્ણમ્ ।
સો@નુગ્રહપ્રવણ એવ હિ સદ્ગુરૂણામાજ્ઞાવશેન શુભસૂતિમહાઙ્કુરેણ ॥ 71

વિક્ષિપ્તભાવપરિહારમથો ચિકીર્ષન્ મન્દ્રઃ સ્વકે પુરવરે સ્થિતિમસ્ય વવ્રે ।
આબાલગોપમપિ યત્ર મહેશ્વરસ્ય દાસ્યં જનશ્ચરતિ પીઠનિવાસકલ્પે ॥ 72

તસ્યાભવત્ કિલ પિતૃવ્યવધૂર્વિધાત્રા યા નિર્મમે ગલિતસંસૃતિચિત્રચિન્તા ।
શીતાંશુમૌલિચરણાબ્જપરાગમાત્રભૂષાવિધિર્વિહિતવત્સલિકોચિતાખ્યા ॥ 73

મૂર્તા ક્ષમેવ કરુણેવ ગૃહીતદેહા ધારેવ વિગ્રહવતી શુભશીલતાયાઃ ।
વૈરાગ્યસારપરિપાકદશેવ પૂર્ણા તત્ત્વાર્થરત્નરુચિરસ્થિતિરોહણોર્વી ॥ 74

ભ્રાતાપિ તસ્યાઃ શશિશુભ્રમૌલેર્ભક્ત્યા પરં પાવિતચિત્તવૃત્તિઃ ।
સ શૌરિરાત્તેશ્વરમન્ત્રિભાવસ્તત્યાજ યો ભૂપતિમન્ત્રિભાવમ્ ॥ 75

તસ્ય સ્નુષા કર્ણવધૂર્વિધૂતસંસારવૃત્તિઃ સુતમેકમેવ ।
યાસૂત યોગેશ્વરિદત્તસંજ્ઞં નામાનુરૂપસ્ફુરદર્થતત્ત્વમ્ ॥ 76

યામગ્રગે વયસિ ભર્તૃવિયોગદીનામન્વગ્રહીત્ ત્રિનયનઃ સ્વયમેવ ભક્ત્યા ।
ભાવિપ્રભાવરભસેષુ જનેષ્વનર્થઃ સત્યં સમાકૃષતિ સો@ર્થપરમ્પરાણામ્ ॥ 77

ભક્ત્યુલ્લસત્પુલકતાં સ્ફુટમઙ્ગભૂષાં શ્રીશંભુનાથનતિમેવ લલાટિકાં ચ ।
શૈવશ્રુતિં શ્રવણભૂષણમપ્યવાપ્ય સૌભાગ્યમભ્યધિકમુદ્વહતિ સ્મ યાન્તઃ ॥ 78

અમ્બાભિધાના કિલ સા ગુરું તં સ્વં ભ્રાતરં શંભુદૃશાભ્યપશ્યત્ ।
ભાવિપ્રભાવોજ્જ્વલભવ્યબુદ્ધિઃ સતો@વજાનાતિ ન બન્ધુબુદ્ધ્યા ॥ 79

ભ્રાતા તદીયો@ભિનવશ્ચ નામ્ના ન કેવલં સચ્ચરિતૈરપિ સ્વૈઃ ।
પીતેન વિજ્ઞાનરસેન યસ્ય તત્રૈવ તૃષ્ણા વવૃધે નિકામમ્ ॥ 80

સો@ન્યશ્ચ શાંભવમરીચિચયપ્રણશ્યત્સંકોચહાર્દનલિનીઘટિતોજ્જ્વલશ્રીઃ ।
તં લુમ્પકઃ પરિચચાર સમુદ્યમેષુ સાધુઃ સમાવહતિ હન્ત કરાવલમ્બમ્ ॥ 81

ઇત્થં ગૃહે વત્સલિકાવિતીર્ણે સ્થિતઃ સમાધાય મતિં બહૂનિ ।
પૂર્વશ્રુતાન્યાકલયન્ સ્વબુદ્ધ્યા શાસ્ત્રાણિ તેભ્યઃ સમવાપ સારમ્ ॥ 82

સ તન્નિબન્ધં વિદધે મહાર્થં યુક્ત્યાગમોદીરિતતન્ત્રતત્ત્વમ્ ।
આલોકમાસાદ્ય યદીયમેષ લોકઃ સુખં સંચરિતા ક્રિયાસુ ॥ 83

સન્તો@નુગૃહ્ણીત કૃતિં તદીયાં હૃહ્ણીત પૂર્વં વિધિરેષ તાવત્ ।
તતો@પિ ગૃહ્ણાતુ ભવન્મતિં સા સદ્યો@નુગૃહ્ણાતુ ચ તત્ત્વદૃષ્ટ્યા ॥ 84

ઇદમભિનવગુપ્તપ્રોમ્ભિતં શાસ્ત્રસારં શિવ નિશમય તાવત્ સર્વતઃશ્રોત્રતન્ત્રઃ ।
તવ કિલ નુતિરેષા સા હિ ત્વદ્રૂપચર્ચેત્યભિનવપરિતુષ્ટો લોકમાત્મીકુરુષ્વ ॥ 85