તન્ત્રાલોક · અધ્યાય 20

અથ દીક્ષાં બ્રુવે મૂઢજનાશ્વાસપ્રદાયિનીમ્ ॥ 1

ત્રિકોણે વહ્નિસદને વહ્નિવર્ણોજ્જ્વલે@ભિતઃ ।
વાયવ્યપુરનિર્ધૂતે કરે સવ્યે સુજાજ્વલે ॥ 2

બીજં કિંચિદ્ગૃહીત્વૈતત્તથૈવ હૃદયાન્તરે ।
કરે ચ દહ્યમાનં સચ્ચિન્તયેત્તજ્જપૈકયુક્ ॥ 3

વહ્નિદીપિતફટ્કારધોરણીદાહપીડિતમ્ ।
બીજં નિર્બીજતામેતિ સ્વસૂતિકરણાક્ષમમ્ ॥ 4

તપ્તં નૈતત્પ્રરોહાય તેનૈવ પ્રત્યયેન તુ ।
મલમાયાખ્યકર્માણિ મન્ત્રધ્યાનક્રિયાબલાત્ ॥ 5

દગ્ધાનિ ન સ્વકાર્યાય નિર્બીજપ્રત્યયં ત્વિમમ્ ।
સ શ્રીમાન્સુપ્રસન્નો મે શંભુનાથો ન્યરૂપયત્ ॥ 6

બીજસ્યાપ્યત્ર કાર્યા ચ યોજના કૃપયા ગુરોઃ ।
યતો દીક્ષા સુદીપ્તત્વાત્સ્થાવરાણ્યપિ મોચયેત્ ॥ 7

યો ગુરુર્જપહોમાર્ચાધ્યાનસિદ્ધત્વમાત્મનિ ।
જ્ઞાત્વા દીક્ષાં ચરેત્તસ્ય દીક્ષા સપ્રત્યયા સ્મૃતા ॥ 8

અવધૂતે નિરાચારે તત્ત્વજ્ઞે નત્વયં વિધિઃ ।
સાચારૈઃ ક્રિયતે દીક્ષા યા દૃષ્ટપ્રત્યયાન્વિતા ॥ 9

નિરાચારેણ દીક્ષાયાં પ્રત્યયસ્તુ ન ગદ્યતે ।
જ્ઞાનં સ્વપ્રત્યયં યસ્માન્ન ફલાન્તરમર્હતિ ॥ 10

ધ્યાનાદિ તુ ફલાત્સાધ્યમિતિ સિદ્ધામતોદિતમ્ ।
તુલાશુદ્ધિપરીક્ષાં વા કુર્યાત્પ્રત્યયયોગિનીમ્ ॥ 11

યથા શ્રીતન્ત્રસદ્ભાવે કથિતા પરમેશિના ।
શ્રીપૂર્વશાસ્ત્રે@પ્યેષા ચ સૂચિતા પરમેશિના ॥ 12

આનન્દ ઉદ્ભવઃ કમ્પો નિદ્રા ઘૂર્ણિશ્ચ પઞ્ચમી ।
ઇત્યેવંવદતા શક્તિતારતમ્યાભિધાયિના ॥ 13

ઉદ્ભવો લઘુભાવેન દેહગ્રહતિરોહિતેઃ ।
દેહો હિ પાર્થિવો મુખ્યસ્તદા મુખ્યત્વમુજ્ઝતિ ॥ 14

ભાવિલાઘવમન્ત્રેણ શિષ્યં ધ્યાત્વા સમુત્પ્લુતમ્ ।
કર્માણિ તત્રાશેષાણિ પૂર્વોક્તાન્યાચરેદ્ગુરુઃ ॥ 15

ઉક્તા સેયં તુલાશુદ્ધિદીક્ષા પ્રત્યયદાયિની ।