તન્ત્રાલોક · અધ્યાય 12

અથાધ્વનો@સ્ય પ્રકૃત ઉપયોગઃ પ્રકાશ્યતે ॥ 1બ્

ઇત્થમધ્વા સમસ્તો@યં યથા સંવિદિ સંસ્થિતઃ ।
તદ્દ્વારા શૂન્યધીપ્રાણનાડીચક્રતનુષ્વથો ॥ 2

બહિશ્ચ લિઙ્ગમૂર્ત્યગ્નિસ્થણ્ડિલાદિષુ સર્વતઃ ।
તથા સ્થિતઃ સમસ્તશ્ચ વ્યસ્તશ્ચૈષ ક્રમાક્રમાત્ ॥ 3

આસંવિત્તત્ત્વમાબાહ્યં યો@યમધ્વા વ્યવસ્થિતઃ ।
તત્ર તત્રોચિતં રૂપં સ્વં સ્વાતન્ત્ર્યેણ ભાસયેત્ ॥ 4

સર્વં સર્વત્ર રૂપં ચ તસ્યાપિ ન ન ભાસતે ।
નહ્યવચ્છેદિતાં ક્વાપિ સ્વપ્ને@પિ વિષહામહે ॥ 5

એવં વિશ્વાધ્વસંપૂર્ણં કાલવ્યાપારચિત્રિતમ્ ।
દેશકાલમયસ્પન્દસદ્મ દેહં વિલોકયેત્ ॥ 6

તથા વિલોક્યમાનો@સૌ વિશ્વાન્તર્દેવતામયઃ ।
ધ્યેયઃ પૂજ્યશ્ચ તર્પ્યશ્ચ તદાવિષ્ટો વિમુચ્યતે ॥ 7

ઇત્થં ઘટં પટં લિઙ્ગં સ્થણ્ડિલં પુસ્તકં જલમ્ ।
યદ્વા કિંચિત્ક્વચિત્પશ્યેત્તત્ર તન્મયતાં વ્રજેત્ ॥ 8

તત્રાર્પણં હિ વસ્તૂનામભેદેનાર્ચનં મતમ્ ।
તથા સંપૂર્ણરૂપત્વાનુસંધિર્ધ્યાનમુચ્યતે ॥ 9

સંપૂર્ણત્વાનુસંધાનમકમ્પં દાર્ઢ્યમાનયન્ ।
તથાન્તર્જલ્પયોગેન વિમૃશઞ્જપભાજનમ્ ॥ 10

તત્રાર્પિતાનાં ભાવાનાં સ્વકભેદવિલાપનમ્ ।
કુર્વંસ્તદ્રશ્મિસદ્ભાવં દદ્યાદ્ધોમક્રિયાપરઃ ॥ 11

તથૈવંકુર્વતઃ સર્વં સમભાવેન પશ્યતઃ ।
નિષ્કમ્પતા વ્રતં શુદ્ધં સામ્યં નન્દિશિખોદિતમ્ ॥ 12

તથાર્ચનજપધ્યાનહોમવ્રતવિધિક્રમાત્ ।
પરિપૂર્ણાં સ્થિતિં પ્રાહુઃ સમાધિં ગુરવઃ પુરા ॥ 13

અત્ર પૂજાજપાદ્યેષુ બહિરન્તર્દ્વયસ્થિતૌ ।
દ્રવ્યૌઘે ન વિધિઃ કો@પિ ન કાપિ પ્રતિષિદ્ધતા ॥ 14

કલ્પનાશુદ્ધિસંધ્યાદેર્નોપયોગો@ત્ર કશ્ચન ।
ઉક્તં શ્રીત્રિકસૂત્રે ચ જાયતે યજનં પ્રતિ ॥ 15

અવિધિજ્ઞો વિધિજ્ઞશ્ચેત્યેવમાદિ સુવિસ્તરમ્ ।
યદા યથા યેન યત્ર સ્વા સમ્વિત્તિઃ પ્રસીદતિ ॥ 16

તદા તથા તેન તત્ર તત્તદ્ભોગ્યં વિધિશ્ચ સઃ ।
લૌકિકાલૌકિકં સર્વં તેનાત્ર વિનિયોજયેત્ ॥ 17

નિષ્કમ્પત્વે સકમ્પસ્તુ કમ્પં નિર્હ્રાસયેદ્બલાત્ ।
યથા યેનાભ્યુપાયેન ક્રમાદક્રમતો@પિ વા ॥ 18

વિચિકિત્સા ગલત્યન્તસ્તથાસૌ યત્નવાન્ભવેત્ ।
ધીકર્માક્ષગતા દેવીર્નિષિદ્ધૈરેવ તર્પયેત્ ॥ 19

વીરવ્રતં ચાભિનન્દેદિતિ ભર્ગશિખાવચઃ ।
તથાહિ શઙ્કા માલિન્યં ગ્લાનિઃ સંકોચ ઇત્યદઃ ॥ 20

સંસારકારાગારાન્તઃ સ્થૂલસ્થૂણાઘટાયતે ।
મન્ત્રા વર્ણસ્વભાવા યે દ્રવ્યં યત્પાઞ્ચભૌતિકમ્ ॥ 21

યચ્ચિદાત્મ પ્રાણિજાતં તત્ર કઃ સંકરઃ કથમ્ ।
સંકરાભાવતઃ કેયં શઙ્કા તસ્યામપિ સ્ફુટમ્ ॥ 22

ન શઙ્કેત તથા શઙ્કા વિલીયેતાવહેલયા ।
શ્રીસર્વાચારવીરાલીનિશાચરક્રમાદિષુ ॥ 23

શાસ્ત્રેષુ વિતતં ચૈતત્તત્ર તત્રોચ્યતે યતઃ ।
શઙ્કયા જાયતે ગ્લાનિઃ શઙ્કયા વિઘ્નભાજનમ્ ॥ 24

ઉવાચોત્પલદેવશ્ચ શ્રીમાનસ્મદ્ગુરોર્ગુરુઃ ।
સર્વાશઙ્કાશનિં માર્ગં નુમો માહેશ્વરં ત્વિતિ ॥ 25

અનુત્તરપદાપ્તયે તદિદમાણવં દર્શિતાભ્યુપાયમતિવિસ્તરાન્નનુ વિદાંકુરુધ્વં બુધાઃ ।