સુવર્ણપ્રભાસસૂત્ર · અધ્યાય 1

સુવર્ણપ્રભાસસૂત્રમ્
॥ સુવર્ણપ્રભાસોત્તમસૂત્રેન્દ્રરાજઃ ॥
॥ નિદાનપરિવર્તઃ ॥
ઓમ્ નમઃ શ્રીસર્વબુદ્ધબોધિસત્ત્વેભ્યઃ ।
ઓમ્ નમઃ શ્રીભગવત્યૈ આર્યપ્રજ્ઞાપારમિતાયૈ ॥ તદ્યથા ।
ઓમ્ શ્રુતિસ્મૃતિગતિવિજયે સ્વાહા ॥
યસ્મિન્ પારમિતા દશોત્તમગુણાસ્તૈસ્તૈર્નયૈઃ સૂચિતાઃ
સર્વજ્ઞેન જગદ્ધિતાય દશ ચ પ્રખ્યાપિતા ભૂમયઃ ।
ઉચ્છેદધ્રુવવર્જિતા ચ વિમલા પ્રોક્તા ગતિર્મધ્યમા
તત્સૂત્રં સ્વર્ણપ્રભાનિગદિતં શૃણ્વન્તુ બોધ્યર્થિનઃ ॥
શ્રુતં મયૈકસમયે ગૃધ્રકૂટે તથાગતઃ ॥
વિજહાર ધર્મધાતૌ ગમ્ભીરે બુદ્ધગોચરે

બોધિસત્ત્વસમુચ્ચયયા મહાકુલદેવતયા, સરસ્વત્યા ચ મહાદેવતયા, શ્રિયા ચ મહાદેવતયા, દૃઢયા ચ મહાપૃથિવીદેવતયા, હારીત્યા ચ મહાદેવતયા, એવં પ્રમુખાભિર્મહાદેવતાભિરનેકદેવનાગયક્ષરાક્ષસગન્ધર્વાસુરગરુડકિન્નરમહોરગમનુષ્યામનુષ્યૈઃ સાર્ધમ્ । અથાયુષ્માનાનન્દો ભગવન્તમેતદવોચત્ । કિં તાસાં ભગવન્ધર્મવિનયં ભવિષ્યતીતિ?
ભગવાનાહ ગાથાભિઃ । ભાવનં ચ ન દુઃપૃચ્છયા વિરજસ્કં સમાધિં ધર્મસારં પ્રતિષ્ઠિતમ્ ।
શુદ્ધેષુ વિરજસ્કેષુ બોધિસત્ત્વોત્તમેષુ ચ ।
નિદાનં સૂત્રરાજેન્દ્રં સ્વર્ણપ્રભાસોત્તમમિદમ્

તતો ગમ્ભીરશ્રવણેન ગમ્ભીરવ્યુપપરીક્ષણેન ।
દિક્ષુ ચતસૃષુ બુદ્ધૈરધિષ્ઠાનમધિષ્ઠિતમ્

અક્ષોભ્યરાજઃ પૂર્વસ્મિન્દક્ષિણે રત્નકેતુના ।
પશ્ચિમાયામમિતાભ ઉત્તરે દુન્દુભિસ્વરઃ

તં પ્રવક્ષ્યામ્યધિષ્ઠાનં માઙ્ગલ્યદેશનોત્તમમ્ ।
સર્વપાપવિનાશાર્થં સર્વપાપક્ષયંકરમ્

સર્વસૌખ્યપ્રદાતારં સર્વદુઃખવિનાશનમ્ ।
મૂલં સર્વજ્ઞતત્ત્વસ્ય સર્વશ્રીસમલઙ્કૃતમ્

ઉપહતેન્દ્રિયા યે હિ સત્ત્વા નષ્ટા હતાયુષઃ ।
અલક્ષ્મ્યા પરિવિષ્ટા હિ દેવતાસુ પરાઙ્મુખાઃ

કાન્તયા તે જના દ્વિષ્ટાઃ કુટુમ્બાદિષ્વપદ્રુતાઃ ।
પરસ્પરવિરુદ્ધા વા અર્થનાશૈરુપદ્રુતાઃ

શોકાયાસેષ્વનર્થે ચ ભયે વ્યસન એવ ચ ।
ગ્રહનક્ષત્રપીડાયાં કાખોર્દદારુણગ્રહૈઃ

પાપકં પશ્યતિ સ્વપ્નં શોકાયાસસમુચ્છ્રિતમ્ ।
તેન ચ સ્નાનશુચિના શ્રોતવ્યં સૂત્રમુત્તમમ્

શૃણ્વન્તિ ય ઇદં સૂત્રં ગમ્ભીરં બુદ્ધગોચરમ્ ।
પ્રસન્નચિત્તાઃ સુમનસઃ શુચિવસ્ત્રૈરલઙ્કૃતાઃ

તેષાં સર્વે તથા નિત્યમુપસર્ગાઃ સુદારુણાઃ ।
તેજસા ચાસ્ય સૂત્રસ્ય શામ્યન્તે સર્વપ્રાણિનામ્

સ્વયં તે લોકપાલાશ્ચ સામાત્યાઃ સગણેશ્વરાઃ ।
તેષાં રક્ષાં કરિષ્યન્તિ હ્યનેકૈર્યક્ષકોટિભિઃ

સરસ્વતી મહાદેવી તથા નૈરઞ્જનવાસિની ।
હારીતી ભૂતમાતા ચ દૃઢા પૃથિવીદેવતા

બ્રહ્મેન્દ્રૈસ્ત્રિદશેન્દ્રૈશ્ચ મહર્દ્ધિકિન્નરેશ્વરૈઃ ।
ગરુડેન્દ્રૈસ્તથા સાર્ધં યક્ષગન્ધર્વપન્નગૈઃ

તે ચ તત્રોપસંક્રમ્ય સસૈન્યબલવાહનાઃ ।
તેષાં રક્ષાં કરિષ્યન્તિ દિવારાત્રૌ સમાહિતાઃ

ઇદં સૂત્રં પ્રકાશિષ્યે ગમ્ભીરં બુદ્ધગોચરમ્ ।
રહસ્યં સર્વબુદ્ધાનાં દુર્લભં કલ્પકોટિભિઃ

શૃણ્વન્તિ ય ઇદં સૂત્રં યે ચાન્યે શ્રાવયન્તિ ચ ।
યે કેચિદનુમોદન્તે યે ચ પૂજાં કરોન્તિ હિ

તે પૂજિતા ભવિષ્યન્તિ હ્યનેકૈઃ કલ્પકોટિભિઃ ।
દેવનાગમનુષ્યૈશ્ચ કિન્નરાસુરગુહ્યકૈઃ

પુણ્યસ્કન્ધમપર્યન્તમસંખ્યેયમચિન્તિતમ્ ।
યત્તેષાં પ્રસૃતં ભોતિ કૃતપુણ્યાન પ્રાણિનામ્

પ્રગૃહીતા ભવિષ્યન્તિ સર્વબુદ્ધૈર્દિશો દશ ।
ગમ્ભીરચરિતેભિશ્ચ બોધિસત્ત્વૈસ્તથૈવ ચ

ચૌક્ષચીવરપ્રાવૃત્ય સુગન્ધજલપાવનૈઃ ।
મૈત્રીચિત્તં સમુત્થાપ્ય પૂજિતવ્યમતન્દ્રિતૈઃ

વિપુલં વિમલં ચિત્તમાત્માનં પ્રકરિષ્યતિ ।
પ્રસાદયંશ્ચ ચેતાંસિ શૃણુધ્વં સૂત્રમુત્તમમ્

સ્વાગતં ચ મનુષ્યેષુ સુલબ્ધં મનુષં ફલમ્ ।
સુજીવિતાશ્ચ જીવન્તિ સૂત્રં શૃણ્વન્તિ યે ત્વિદમ્

ઉપ્તકુશલમૂલાસ્તે બહુબુદ્ધપ્રકાશિતાઃ ।
યેષામિદં કર્ણપુટે દેશિતં સંપ્રવિશ્યતીતિ