સુશ્રુતસંહિતા · અધ્યાય 1.42.8

તત્ર શૈત્યરૌક્ષ્યલાઘવવૈશદ્યવૈષ્ટમ્ભ્યગુણલક્ષણો વાયુઃ તસ્ય સમાનયોનિઃ કષાયો રસઃ સોઽસ્ય શૈત્યાચ્છૈત્યં વર્ધયતિ રૌક્ષ્યાદ્રૌક્ષ્યં લાઘવાલ્લાઘવં વૈશદ્યાદ્વૈશદ્યં વૈષ્ટમ્ભ્યાદ્વૈષ્ટમ્ભ્યમિતિ ॥

ઔષ્ણ્યતૈક્ષ્ણ્યરૌક્ષ્યલાઘવવૈશદ્યગુણલક્ષણં પિત્તં તસ્ય સમાનયોનિઃ કટુકો રસઃ સોઽસ્યૌષ્ણ્યાદૌષ્ણં વર્ધયતિ તૈક્ષ્ણ્યાત્તૈક્ષ્ણ્યં રૌક્ષ્યાદ્રૌક્ષ્યં લાઘવાલ્લાઘવં વૈશદ્યાદ્વૈશદ્યમિતિ ॥

માધુર્યસ્નેહગૌરવશૈત્યપૈચ્છિલ્યગુણલક્ષણઃ શ્લેષ્મા તસ્ય સમાનયોનિર્મધુરો રસઃ સોઽસ્ય માધુર્યાન્માધુર્યં વર્ધયતિ સ્નેહાત્ સ્નેહં ગૌરવાદ્ગૌરવં શૈત્યાચ્છૈત્યં પૈચ્છિલ્યાત્પૈચ્છિલ્યમિતિ ॥