સુશ્રુતસંહિતા · અધ્યાય 1.41.4

તત્ર સ્થૂલસારસાન્દ્રમન્દસ્થિરગુરુકઠિનં ગન્ધબહુલમીષત્કષાયં પ્રાયશો મધુરમિતિ પાર્થિવં તત્ સ્થૈર્યબલગૌરવસંઘાતોપચયકરં વિશેષતશ્ચાધોગતિસ્વભાવમિતિ ॥

શીતસ્તિમિતસ્નિગ્ધમન્દગુરુસરસાન્દ્રમૃદુપિચ્છિલં રસબહુલમીષત્કષાયામ્લલવણં મધુરરસપ્રાયમાપ્યં તત્ સ્નેહનહ્લાદનક્લેદનબન્ધનવિષ્યન્દનકરમિતિ ॥

ઉષ્ણતીક્ષ્ણસૂક્ષ્મરૂક્ષખરલઘુવિશદં રૂપ(આ.ગુણ)બહુલમીષદમ્લલવણં કટુકરસપ્રાયં વિશેષતશ્ચોર્ધ્વગતિસ્વભાવમિતિ તૈજસં તદ્દહનપચનદારણતાપનપ્રકાશનપ્રભાવર્ણકરમિતિ ॥

સૂક્ષ્મરૂક્ષખરશિશિરલઘુવિશદં સ્પ્રર્શબહુલમીષત્તિક્તં વિશેષતઃ કષાયમિતિ વાયવીયં તદ્વૈશદ્યલાઘવગ્લપનવિરૂક્ષણવિચારણકરમિતિ ॥

શ્લક્ષ્ણસૂક્ષ્મમૃદુવ્યવાયિવિશદવિવિક્તમવ્યક્તરસં શબ્દબહુલમાકાશીયં તન્માર્દવશૌષિર્યલાઘવકરમિતિ ॥