સુધાલહરી · શ્લોક 21-30

આ પાથોજાસનાયુઃ ક્ષણલવઘટિકાદ્યાત્મકં કાલચક્રં પ્રાહુઃ પૂર્વે પુરાણાગમવિષયવિદો યસ્ય લીલાવિલાસમ્ ।
ભાવાનાં ષડ્વિકારાનથ ખલુ ગતિભિર્યશ્ચ નિત્યં પ્રસૂતે સ પ્રાતઃ પૌરુહૂતે પરિલસતિ હરિન્મણ્ડલે ચણ્ડભાનુઃ

અઙ્ગાનિ બ્રાહ્મણાનામુષસિ હિમભરાસઙ્ગતો ભઙ્ગુરાણિ વ્યાલક્ષ્ય દ્રાક્પ્રપાતા રિપુજનિતરુષેવારુણા વાસવાશામ્ ।
ધર્મધ્વંસોદ્ધુરાણામખિલમપિ કુલં જક્ષતઃ શોભિતક્ષ્મા યક્ષ્માણં મે હરન્તુ ત્વરિતમઘભિદો ભાનવશ્ચણ્ડભાનોઃ

વિશ્રાન્તિં બ્રાહ્મણાનાં સુખમતિશયિતં કામિનાં સ્થાયિલીલામમ્ભોજાનાં પ્રબોધં કુમુદપરિષદાં યશ્ચિકીર્ષન્દયાર્દ્રઃ ।
નિર્યાત્યન્તઃસમુદ્રં સકલમપિ નૃણાં ભારમાધાય વહ્નાવહ્નાયાહ્નામધીશઃ સ ભવતુ ભવતાં ભૂયસે મઙ્ગલાય

દ્રાગાહત્ય પ્રભાતે રજનિહિમવતઃ કૌમુદીઃ કૌતુકેન પ્રોદ્યત્પ્રૌઢાનુકમ્પાઃ પુનરપિ ખલુ યે સાયમુજ્જીવયન્તિ ।
આરુણ્યે પલ્લવાનામથ ગુરુચરણાઃ શક્રગોપાવલીનાં તે યુષ્મદ્ભાવલીનાં દિનકરકિરણાઃ ક્લાન્તિમુન્મૂલયન્તુ

દ્રાગદ્વૈતં વિતન્વંસ્ત્રિભુવનમભિતઃ કૌઙ્કુમીનાં દ્યુતીનાં ન્યક્કુર્વન્માન્દ્યમુદ્રામથ રજનિરુજાં કોકસીમન્તિનીનામ્ ।
તન્દ્રાન્ધાનાન્ધ્યસિન્ધોરિહ વિતતતરૈરુદ્દધાનં કરાગ્રૈઃ સ્વાન્તધ્વાન્તં ધુનીતામુદયગિરિશિરશ્ચુમ્બિ માર્તણ્ડબિમ્બમ્

શુદ્ધં બ્રહ્માલવાલં પ્રકૃતિશબલિતં યસ્ય મૂલં કરાસ્તદ્દ્રાધિષ્ટસ્વર્ણશાખા વિકસદરુણિમા પલ્લવાનાં વિલાસઃ ।
નીલં વ્યોમાલિમાલા સુરસફલભરો ધર્મકામાર્થમોક્ષાઃ સ શ્રીમાન્વાઞ્છિતાર્થં વિતરતુ સતતં સૂર્યકલ્પદ્રુમો વઃ

નીહારં નિમ્નગાભ્યો નિખિલનયનતો નીરજેભ્યશ્ચ નિદ્રાં નીડેભ્યો નીડજાનાં નિકરમુષસિ યે નિત્યમુદ્વાસયન્તિ ।
સાયં તેષ્વેવ તેષાં પુનરપિ ઘૃણયા કલ્પયન્તે ચ વાસં તે વઃ સન્તુ પ્રયાસં ઘૃણિઘનઘૃણયો હન્તુમાબદ્ધકક્ષાઃ

સંહૃત્ય દ્રાગ્બહિઃસ્થં તિમિરકુલમથાભ્યન્તરં હર્તુકામા રન્ધ્રાલીભિર્ગૃહાણામુદરમનુદિનં યે વિશઙ્કં વિશન્તિ ।
ભાનોસ્તે ઽમી હૃષીકાણ્યખિલતનુભૃતાં હર્ષયન્તો હિતેહા હૃદ્રોગં સંહરન્તાં હિમમહિમહૃતો હેમહૃદ્યાઃ કરા નઃ

બ્રહ્માણ્ડં મણ્ડયન્તો વિયતિ વલયિનો મણ્ડલૈરણ્ડજાનાં પાખણ્ડાન્દણ્ડયન્તો દનુતનુજનુષાં શોભિતાખણ્ડાલાશાઃ ।
યે ખણ્ડાન્પૌણ્ડરીકાન્વિદલયિતુમથોદ્દણ્ડપાણ્ડિત્યભાજસ્તે ચણ્ડાંશોરચણ્ડાસ્ત્વરિતમિહ કરાઃ પાણ્ડુતાં ખણ્ડયન્તુ

ઊર્ધ્વં પાપાવલિભ્યઃ સ્થિત ઇતિ જગદે યસ્ય વેદૈરુદાખ્યા નિન્યુઃ કે ઽપ્યાસનાર્થં ખલુ સહચરતાં નેત્રયોઃ પુણ્ડરીકમ્ ।
ઓષ્ઠાવૃક્સામ યસ્ય દ્રુતકનકનિભશ્મશ્રુકેશાખિલાઙ્ગઃ સો ઽયં સર્વાન્તરાત્મા તવ દિશતુતરાં વાસરેશઃ શિવાનિ