સુભાષિતાવલિ · શ્લોક 0001-0020

તાં ભવાનીં ભવાનીતક્લેશનાશવિશારદામ્ ।
શારદાં શારદામ્ ભોદસિતંસિહાસનાં નુમઃ ॥

અનપેક્ષિતગુરુવચના સર્વાન્ગ્રન્થીન્વિભેદયતિ સમ્યક્ ।
પ્રકટયતિ પરરહસ્યં વિમર્શશક્તિર્નિજા જયતિ ॥

દિક્કાલાદ્યનવચ્છિન્નાનન્તચિન્માત્રમૂર્તયે ।
સ્વાનુભૂત્યેકમાનાય નમઃ શાન્તાય તેજસે ॥

જગત્સિસૃક્ષાપ્રલયક્રિયાવિધૌ
પ્રયત્નમુન્મેષનિમેષવિભ્રમમ્ ।
વદન્તિ યસ્યેક્ષણલોલપક્ષ્મણાં
પરાય તસ્મૈ પરમેષ્ઠિને નમઃ ॥

નમસ્ત્રિભુવનોત્પત્તિસ્થિતિસંહારહેતવે ।
વિષ્ણવેપારસંસારપારોત્તરણસેતવે ॥

સુરાસુરશિરોરત્નકાન્તિવિચ્છુરિતાઙ્ઘ્રયે ।
નમસ્ત્રિભુવનેશાય હરયે સિંહરૂપિણે ॥

નમસ્તસ્મૈ વરાહાય હેલયોદ્ધરતે મહીમ્ ।
ખુરમધ્યગતો યસ્ય મેરુઃ ખુરખુરાયતે ॥

નમસ્તુઙ્ગશિરશ્ચુમ્બિચન્દ્રચામરચારવે ।
ત્રૈલોક્યનગરારમ્ભમૂલસ્તમ્ભાય શંભવે ॥

અભિપ્રેતાર્થસિદ્ધ્યર્થં પૂજિતો યઃ સુરૈરપિ ।
સર્વવિઘ્નચ્છિદે તસ્મૈ ગણાધિપતયે નમઃ ॥

નિતમ્બાલસગામિન્યઃ પીનોન્નતપયોધરાઃ ।
મન્મથાય નમસ્તસ્મૈ યસ્યાયતનમઙ્ગનાઃ ॥

અનન્તમામધેયાય સર્વાકરવિધાયિને ।
સમસ્તમન્ત્રવાચ્યાય વિશ્વૈકપતયે નમઃ ॥

ઓં નમઃ પરમાર્થૈકરૂપાય પરમાત્મને ।
સ્વેચ્છાવભાસિતાસત્યભેદભિન્નાય શંભવે ॥

કુલશૈલદલં પૂર્ણસુવર્ણગિરિકર્ણિકમ્ ।
નમોધિતિષ્ઠતેનન્તનાલં કમલવિષ્ટરમ્ ॥

કર્ણિકાદિષ્વિવ સ્વર્ણમર્ણવાદિષ્વિવોદકમ્ ।
ભેદિષ્વભેદિ યત્તસ્મૈ પરસ્મૈ મહસે નમઃ ॥

નમો વાઙ્મનસાતીતમહિમ્ને પરમેષ્ઠિને ।
ત્રિગુણાષ્ટગુણાનન્તગુણન્નિર્ગુણમૂર્તયે ॥

નમઃ શિવાય નિઃશેષક્લેશપ્રશમશાલિને ।
ત્રિગુણગ્રન્થિદુર્ભેદભવબન્ધવિભેદિને ॥

સમસ્તલક્ષણાયોગ એવ યસ્યોપલક્ષણમ્ ।
તસ્મૈ નમોસ્તુ દેવાય કસ્મૈચિદપિ શંભવે ॥

સંસારૈકનિમિત્તાય સંસારૈકવિરોધિને ।
નમઃ સંસારરૂપાય નિઃસંસારાય શંભવે ॥

યથા તથાપિ યઃ પૂજ્યો યત્ર તત્રાપિ યોર્ચિતઃ ।
યોપિ વા સોપિ વા યોસૌ દેવસ્તસ્મૈ નમોસ્તુ તે ॥

સદસત્ત્વેન ભાવાનાં યુક્તા યા દ્વિતયી સ્થિતિઃ ।
તામુલ્લઙ્ઘ્ય તૃતીયસ્મૈ નમશ્ચિત્રાય શંભવે ॥