સ્કંદ પુરાણ · શ્લોક 7.56-2

॥ ઈશ્વર ઉવાચ ॥ ॥
અથ તે પંચમં વચ્મિ સિદ્ધલિગં મહાપ્રભમ્ ॥
બ્રહ્મણો નૈરૃતે ભાગે ધનુષાં ષોડશે સ્થિતમ્

રાહુલિંગસ્ય ચાભ્યાશે લિંગં ધનદનિર્મિતમ્ ॥
ધનદત્વં ચ સંપ્રાપ્તો યત્ર તપ્ત્વા મહત્તપઃ

સંસ્થાપ્ય વિધિવત્પૂજ્ય લિંગં વર્ષસહસ્રકમ્ ॥
અલકાધિપતિર્જાતસ્તત્ર શંભોઃ પ્રસાદતઃ

જાતિં સ્મૃત્વા પૂર્વિકાં તુ જ્ઞાત્વા દીપદશાફલમ્ ॥
શિવરાત્રે પ્રભાવં તુ પ્રભાસં પુનરાગતઃ

પ્રભાવાતિશયં જ્ઞાત્વા સ્થાપયામાસ શંકરમ્ ॥
તત્ર પ્રત્યક્ષતાં નીતસ્તપસા યેન શંકરઃ

મહાભક્ત્યા મહાદેવિ તસ્મિઁલ્લિંગેઽવતારિતઃ ॥
તં દૃષ્ટ્વા માનવો ભક્ત્યા પૂજયિત્વા યથાવિધિ

પઞ્ચોપચારૈઃ સદ્ભક્ત્યા ગન્ધધૂપાનુલેપનૈઃ ॥
તસ્યાન્વયે દરિદ્રશ્ચ કદાપિ ન ભવિષ્યતિ

યે ચૈતત્પૂજયિષ્યંતિ લિંગં ભક્તિયુતા નરાઃ ॥
અજેયાસ્તે ભવિષ્યંતિ શત્રૂણાં દર્પનાશનાઃ

ઇતિ તે કથિતં સર્વં ધનદેશમહોદયમ્ ॥
શ્રુત્વાનુમોદ્ય યત્નેન દરિદ્રો નૈવ જાયતે

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે ધનદેશ્વરમાહાત્મ્યવર્ણનંનામ ષટ્પઞ્ચાશોઽધ્યાયઃ