સ્કંદ પુરાણ · શ્લોક 7.43-2

॥ પ્રહ્લાદ ઉવાચ ॥ ॥
સાવિત્રીં ચ ભવાનીં ચ દુર્ગાં ચૈવ સરસ્વતીમ્ ॥
યોઽર્ચયેત્તુલસીપત્રૈઃ સર્વકામસમન્વિતઃ

ગૃહીત્વા તુલસીપત્રં ભક્ત્યા વિષ્ણું સમર્ચયેત્ ॥
અર્ચિતં તેન સકલં સદેવાસુરમાનુષમ્

ચતુર્દ્દશ્યાં મહેશાનં પૌર્ણમાસ્યાં પિતામહમ્ ॥
યેઽર્ચયન્તિ ચ સપ્તમ્યાં તુલસ્યા ચ ગણાધિપમ્

શંખોદકં તીર્થવરાદ્વરિષ્ઠં પાદોદકં તીર્થવરાદ્વરિષ્ઠમ્॥
નૈવેદ્યશેષં ક્રતુકોટિતુલ્યં નિર્માલ્યશેષં વ્રતદાનતુલ્યમ્

મુકુન્દાશનશેષં તુ યો ભુનક્તિ દિનેદિને ॥
સિક્થેસિક્થે ભવેત્પુણ્યં ચાન્દ્રાયણશતાધિકમ્

નૈવેદ્યશેષં તુલસીવિમિશ્રં વિશેષતઃ પાદજલેન વિષ્ણોઃ ॥
યોઽશ્નાતિ નિત્યં પુરુષો મુરારેઃ પ્રાપ્નોતિ યજ્ઞાયુતકોટિપુણ્યમ્

યઃ શ્રાદ્ધકાલે હરિભુક્તશેષં દદાતિ ભક્ત્યા પિતૃદેવતાનામ્ ॥
તેનૈવ પિંડાત્સુતિલૈર્વિમિશ્રાદાકલ્પકોટિં પિતરઃ સુતૃપ્તાઃ

સ્નાનાર્ચનક્રિયાકાલે ઘંટાવાદ્યં કરોતિ યઃ ॥
પુરતો વાસુદેવસ્ય ગવાં કોટિફલં લભેત્

સર્વવાદ્યમયી ઘંટા કેશવસ્ય સદા પ્રિયા ॥
વાદનાલ્લભતે પુણ્યં યજ્ઞકોટિફલં નરઃ

વાદિત્રાણામભાવે તુ પૂજાકાલે ચ સર્વદા ॥
ઘંટાવાદ્યં નરૈઃ કાર્ય્યં સર્વવાદ્યમયી યતઃ

તુલસીકાષ્ઠસંભૂતં ચન્દનં યચ્છતે હરેઃ ॥
નિર્દ્દહેત્પાતકં સર્વં પૂર્વજન્મશતાર્જિતમ્

દદાતિ પિતૃ પિંડેષુ તુલસીકાષ્ઠચન્દનમ્ ॥
પિતૄણાં જાયતે તૃપ્તિર્ગયાશ્રાદ્ધેન વૈ તથા

સર્વેષામેવ દેવાનાં તુલસીકાષ્ઠચન્દનમ્ ॥
પિતૄણાં ચ વિશેષેણ સદાઽભીષ્ટં હરેઃ કલૌ

હરેર્ભાગવતા ભૂત્વા તુલસીકાષ્ઠચન્દનમ્ ॥
નાર્પયતિ સદા વિષ્ણોર્ન તે ભાગવતાઃ કલૌ

શરીરં દહ્યતે યસ્ય તુલસીકાષ્ઠવહ્નિના ॥
નીયમાનો યમેનાપિ વિષ્ણુલોકં સ ગચ્છતિ

યદ્યેકં તુલસીકાષ્ઠં મધ્યે કાષ્ઠસ્ય યસ્ય હિ ॥
દાહકાલે ભવેન્મુક્તઃ પાપકોટિશતાયુતૈઃ

દહ્યમાનં નરં દૃષ્ટ્વા તુલસીકાષ્ઠવહ્નિના ॥
જન્મકોટિસહસ્રૈસ્તુ તોષિતસ્તૈર્જનાર્દનઃ

દહ્યમાનં નરં સર્વે તુલસીકાષ્ઠવહ્નિના ॥
વિમાનસ્થાઃ સુરગણાઃ ક્ષિપંતિ કુસુમાંજલીન્

નૃત્યંત્યોઽપ્સરસો હૃષ્ટા ગીતં ગાયન્તિ સુસ્વરમ્ ॥
જ્વલતે યત્ર દૈત્યેન્દ્ર તુલસીકાષ્ઠપાવકઃ

કુરુતે વીક્ષણં વિષ્ણુઃ સન્તુષ્ટઃ સહ શંભુના

ગૃહીત્વા તં કરે શૌરિઃ પુરુષં સ્વયમગ્રતઃ॥
માર્જતે તસ્ય પાપાનિ પશ્યતાં ત્રિદિવૌકસામ્ ॥
મહોત્સવં ચ કૃત્વા તુ જયશબ્દપુરઃસરમ્

॥ સૂત ઉવાચ ॥ ॥
પ્રહ્લાદેનોદિતં શ્રુત્વા માહાત્મ્યં દ્વારકાભવમ્ ॥
પ્રહૃષ્ટા ઋષયઃ સર્વે તથા દૈત્યેશ્વરો બલિઃ

તતઃ સર્વેઽભિનન્દ્યૈનં પ્રહ્લાદં દૈત્યપુઙ્ગવમ્ ॥
ઉદ્યુક્તા દ્વારકાં ગત્વા દ્રષ્ટું કૃષ્ણમુખામ્બુજમ્

તતસ્તે બલિના સાર્ધં મુનયઃ સંશિતવ્રતાઃ ॥
આગત્ય દ્વારકાં સ્નાત્વા ગોમત્યાં વિધિપૂર્વકમ્

કૃષ્ણં દૃષ્ટ્વા સમભ્યર્ચ્ય કૃત્વા યાત્રાં યથાવિધિ ॥
દત્ત્વા દાનાનિ બહુશઃ કૃતકૃત્યાસ્તતોઽભવન્

જગ્મુઃ સ્વીયાનિ સ્થાનાનિ બલિઃ પાતાલમાયયૌ ॥
પ્રહ્લાદં ચ પ્રણમ્યાશુ મેને સ્વસ્ય કૃતાર્થતામ્

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે ચતુર્થે દ્વારકામાહાત્મ્યે દ્વારકામાહાત્મ્યશ્રવણાદિફલશ્રુતિવર્ણનપુરઃસરતુલસીપત્રકાષ્ઠમહિમવર્ણનપૂર્વકં પ્રહ્લાદદ્વિજસંવાદ સમાપ્ત્યનંતરં બલિના સહ દ્વિજકૃતદ્વારકાયાત્રાવિધિવર્ણનંનામ ત્રિચત્વારિંશત્તમોઽધ્યાયઃ