સ્કંદ પુરાણ · અધ્યાય 7.25

॥ પુલસ્ત્ય ઉવાચ ॥ ॥
તતઃ પિંડારકં ગચ્છેત્તીર્થં પાપહરં નૃપ ॥
યત્ર પૂર્વં તપસ્તપ્તં મંકિના બ્રાહ્મણેન ચ ॥
સિદ્ધિં ગતસ્તથા રાજંસ્તીર્થસ્યાસ્ય પ્રભાવતઃ

પુરા મંકિરભૂદ્વિપ્રો નામમાત્રેણ ભૂપતે ॥
મૂર્ખો બ્રાહ્મણકૃત્યાનામનભિજ્ઞઃ સુમન્દધીઃ

અથાસૌ પર્વતે રમ્યે લોકાનાં નૃપસત્તમ ॥
મહિષી રક્ષયામાસ તતઃ પિંડારકર્મણિ

કસ્યચિત્ત્વથ કાલસ્ય તેન વિત્તમુપાર્જિતમ્॥
દૂરાત્કૃચ્છ્રેણ ચ સ્તોકં જગૃહે ગોયુગં તતઃ

।
તતસ્તદ્દમયામાસ ગોયુગં નૃપસત્તમ ॥
અથ દૈવવશાદ્રાજન્દમિતં તસ્ય ગોયુગમ્

નિબદ્ધમુષ્ટ્રમાસાદ્ય ગ્રીવાદેશે બલાત્સ્થિતમ્ ॥
અથોષ્ટ્રસ્ત્વરયા રાજન્નુત્થિતસ્ત્રાસતત્પરઃ

ગોયુગેન હિ ગ્રીવાયાં લમ્બમાનેન ભૂપતે ॥
તદ્દૃષ્ટ્વા સુમહાશ્ચર્યં વિનાશં ગોયુગસ્ય તુ

મંકિર્વૈરાગ્યમાપન્નસ્ત્યક્ત્વા ગ્રામં વનં યયૌ ॥
સ ગત્વા નિર્ઝરં કઞ્ચિદર્બુદે નૃપસત્તમ

ત્રિકાલં કુરુતે સ્નાનં ગાયત્રીજપમુત્તમમ્ ॥
તેનાસૌ ગતપાપોઽભૂદ્દિવ્યદર્શી ચ ભૂમિપ

એતસ્મિન્નેવ કાલે તુ તેન માર્ગેણ શંકરઃ ॥
સહ ગૌર્યા વિનિષ્ક્રાંતઃ ક્રીડાર્થં રમ્યપર્વતે

સ દૃષ્ટઃ સહસા તેન પિંડારેણ મહાત્મના ॥
પ્રણામમકરોદ્રાજંસ્તતસ્તં શંકરોઽબ્રવીત્

ન વૃથા દર્શનં મે સ્યાદ્વરો મે ગૃહ્યતાં દ્વિજ ॥
યદભીષ્ટં મહારાજ યદ્યપિ સ્યાત્સુદુર્લભમ્

॥ પિંડારક ઉવાચ ॥ ॥
ગણોઽહં તવ દેવેશ ભવાનિ ત્રિપુરાંતક ॥
યથા તથા કુરુ વિભો નાન્યન્મે હૃદિ વર્તતે

એતત્પિણ્ડારકં તીર્થ મમ નામ્ના પ્રસિધ્યતુ

॥ ભગવાનુવાચ ॥ ॥
ભવિષ્યસિ ગણોઽસ્માકં દેહાંતે ત્વં દ્વિજોત્તમ ॥
એતત્પિંડારકંનામ તીર્થમત્ર ભવિષ્યતિ

અહમત્ર મહાષ્ટમ્યાં નિવેક્ષ્યામિ મહામતે ॥
યે ચ સ્નાનં કરિષ્યંતિ સંપ્રાપ્તે ચાષ્ટમીદિને ॥
તે યાસ્યંતિ પરં સ્થાનં યત્રાહં નિત્યસંસ્થિતઃ

॥ પુલસ્ત્ય ઉવાચ ॥ ॥
એવમુક્ત્વા મહાદેવસ્તત્રૈવાંતરધીયત ॥।
મંકિઃ પિંડારકસ્તત્ર તપસ્તેપે દિવાનિશમ્

તતઃ કાલેન મહતા ત્યક્ત્વા દેહં દિવં ગતઃ ॥
યત્રાસ્તે ભગવાન્રુદ્રો ગણસ્તત્ર બભૂવ હ

।
તસ્માત્સર્વપ્રયત્નેન સ્નાનં મન્ત્રેણ ચાચરેત્

રાજેન્દ્ર મહિષીદાનમથાષ્ટમ્યાં વિશેષતઃ ॥
ય ઇચ્છતિ સદાઽભીષ્ટમિહ લોકે પરત્ર ચ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે તૃતીયેઽર્બુદખણ્ડે પિંડારકતીર્થમાહાત્મ્યવર્ણનંનામ પંચવિંશોઽધ્યાયઃ