સ્કંદ પુરાણ · અધ્યાય 7.231

॥ ઈશ્વર ઉવાચ ॥ ॥
તતો ગચ્છેન્મહાદેવિ યત્ર જાંબવતી નદી ॥
પુરા જાંબવતીનામ વિષ્ણોર્યા મહિષીપ્રિયા ॥
અપૃચ્છદર્જુનં સાધ્વી વદ વાર્તાં કુરૂ દ્વહ

તસ્યાસ્તદ્વચનં શ્રુત્વા અર્જુનો નિશ્વસન્મુહુઃ ॥
વાષ્પગદ્ગદયા વાચા ઇદં વચનમબ્રવીત્

પરિત્યક્તા વયં ભદ્રે યાદવૈઃ સુમહાત્મભિઃ ॥૯
બલદેવસ્ય વીરસ્ય સાત્યકેશ્ચ મહાત્મનઃ

અન્યેષાં યદુવીરાણાં પાપકર્માતિનિર્ઘૃણઃ ॥
જિજીવિષુરિહ પ્રાપ્તો વાસુદેવનિરાકૃતઃ

સા શ્રુત્વા ભર્તૃનિધનમર્જુનાચ્ચ મહાસતી ॥
ગંગાતીરે સમુત્પાદ્ય પાવકં પાવકપ્રભા ॥
સમુત્સૃજ્ય મહાકાયં નદીભૂત્વા વિનિર્યયૌ

સા ગૃહીત્વા સતી ભર્તુર્ભસ્મ સર્વં ચિતેસ્તથા ॥
પ્રવિષ્ટા સાગરં દેવિ તદા જાંબવતી શુભા

યા નારી તત્ર દેવેશિ ભક્ત્યા સ્નાનં સમાચરેત્ ॥
તદન્વયેપિ કાચિત્સ્ત્રી ન વૈધવ્યમવાપ્નુયાત્

તસ્માત્સર્વપ્રયત્નેન તત્ર સ્નાનં સમાચરેત્ ॥
નરો વા યદિ વા નારી પ્રાપ્નોતિ પરમાં ગતિમ્

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખંડે પ્રથમે પ્રભાસક્ષેત્રમાહાત્મ્યે જાંબવતીનદીમાહાત્મ્યવર્ણનંનામૈકત્રિંશદુત્તરદ્વિ શતતમોઽધ્યાયઃ