સ્કંદ પુરાણ · અધ્યાય 7.184

॥ ઈશ્વર ઉવાચ ॥ ॥
તતો ગચ્છેન્મહાદેવિ મંકીશ્વરમનુત્તમમ્ ॥
ત્રિસંગમસમીપસ્થં સર્વપાતકનાશનમ્

મંકીનામ ઋષિઃ પૂર્વમાસીત્સ તપતાં વરઃ ॥
સ ચ જ્ઞાત્વા મહાક્ષેત્રં પ્રભાસં શંકરપ્રિયમ્

અતપદ્વૈ તપો ઘોરં કન્દમૂલફલાશનઃ ॥
વર્ષાણામયુતં સાગ્રં પ્રતિષ્ઠાપ્ય મહેશ્વરમ્

તતસ્તુષ્ટો મહાદેવો દદૌ પ્રીતો વરં તદા ॥
સ વવ્રે યદિ તુષ્ટોઽસિ અસ્મિન્સ્થાને સ્થિતો ભવ

મન્નામાંકિતલિંગસ્તુ વસ કલ્પાયુતાયુતમ્ ॥
એવમસ્ત્વિત્યથેત્યુક્ત્વા તત્રૈવાન્તરધીયત

તદાપ્રભૃતિ તલ્લિંગં મંકીશ્વરમિતિ શ્રુતમ્॥
માઘે માસે ત્રયોદશ્યાં ચતુર્દશ્યામથાપિ વા

પૂજ્યાઃ પંચોપચારેણ પ્રાપ્નુયાદીપ્સિતં ફલમ્ ॥
ગોદાનં તત્ર વૈ દેયં સમ્યગ્યાત્રાફલેપ્સુભિઃ

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે મંકીશ્વરમાહાત્મ્યવર્ણનંનામ ચતુરશીત્યુત્તરશતતમોઽધ્યાયઃ