સ્કંદ પુરાણ · શ્લોક 5.81-2

શ્રીમાર્કણ્ડેય ઉવાચ -
તતો ગચ્છેન્મહારાજ વરુણેશ્વરમુત્તમમ્ ।
યત્ર સિદ્ધો મહાદેવો વરુણો નૃપસત્તમ

પિણ્યાકશાકપર્ણૈશ્ચ કૃચ્છ્રચાન્દ્રાયણાદિભિઃ ।
આરાધ્ય ગિરિજાનાથં તતઃ સિદ્ધિં પરાં ગતઃ

તત્ર તીર્થે તુ યઃ સ્નાત્વા સંતર્પ્ય પિતૃદેવતાઃ ।
પૂજયેચ્છઙ્કરં ભક્ત્યા સ યાતિ પરમાં ગતિમ્

કુણ્ડિકાં વર્ધનીં વાપિ મહદ્વા જલભાજનમ્ ।
અન્નેન સહિતં પાર્થ તસ્ય પુણ્યફલં શૃણુ

યત્ફલં લભતે મર્ત્યઃ સત્રે દ્વાદશવાર્ષિકે ।
તત્ફલં સમવાપ્નોતિ નાત્ર કાર્યા વિચારણા

સર્વેષામેવ દાનાનામન્નદાનં પરં સ્મૃતમ્ ।
સદ્યઃ પ્રીતિકરં તોયમન્નં ચ નૃપસત્તમ

તત્રતીર્થે મૃતાનાં તુ નરાણાં ભાવિતાત્મનામ્ ।
વરુણસ્ય પુરે વાસો યાવદાભૂતસંપ્લવમ્

પશ્ચાત્પૂર્ણે તતઃ કાલે મર્ત્યલોકે પ્રજાયતે ।
અન્નદાનપ્રદો નિત્યં જીવેદ્વર્ષશતં નરઃ

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે વરુણેશ્વરતીર્થમાહાત્મ્યવર્ણનં નામૈકાશીતિતમોઽધ્યાયઃ ॥