સ્કંદ પુરાણ · શ્લોક 5.66-3

શ્રીમાર્કણ્ડેય ઉવાચ -
તતો ગચ્છેત્તુ રાજેન્દ્ર માતૃતીર્થમનુત્તમમ્ ।
સઙ્ગમસ્ય સમીપસ્થં નર્મદાદક્ષિણે તટે

માતરસ્તત્ર રાજેન્દ્ર સંજાતા નર્મદાતટે ।
ઉમાર્ધનારિર્દેવેશો વ્યાલયજ્ઞોપવીતધૃક્

ઉવાચ યોગિનીવૃન્દં કષ્ટંકષ્ટમહો હર ।
અજેયાઃ સર્વદેવાનાં ત્વત્પ્રસાદાન્મહેશ્વર

તીર્થમત્ર વિધાનેન પ્રખ્યાતં વસુધાતલે ।
એવં ભવતુ યોગિન્ય ઇત્યુક્ત્વાન્તરધાચ્છિવઃ

શ્રીમાર્કણ્ડેય ઉવાચ -
તત્ર તીર્થે તુ યો ભક્ત્યા નવમ્યાં નિયતઃ શુચિઃ ।
ઉપોષ્ય પરયા ભક્ત્યા પૂજયેન્માતૃગોચરમ્

તસ્ય સ્યુર્માતરઃ પ્રીતાઃ પ્રીતોઽયં વૃષવાહનઃ ।
વન્ધ્યાયા મૃતવત્સાયા અપુત્રાયા યુધિષ્ઠિર

સ્નાપનં ચારભેત્તત્ર મન્ત્રશાસ્ત્રવિદુત્તમઃ ।
સહિરણ્યેન કુમ્ભેન પઞ્ચરત્નફલાન્વિતઃ

સ્નાપયેત્પુત્રકામાયાઃ કાંસ્યપાત્રેણ દેશિકઃ ।
પુત્રં સા લભતે નારી વીર્યવન્તં ગુણાન્વિતમ્

યો યં કામમભિધ્યાયેત્તતઃ સ લભતે નૃપ ।
માતૃતીર્થાત્પરં તીર્થં ન ભૂતં ન ભવિષ્યતિ

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે માતૃતીર્થમાહાત્મ્યવર્ણનં નામ ષટ્ષષ્ટિતમોઽધ્યાયઃ ॥