સ્કંદ પુરાણ · શ્લોક 5.61-3

શ્રીમાર્કણ્ડેય ઉવાચ -
તતો ગચ્છેત્પરં પુણ્યં નર્મદાદક્ષિણે તટે ।
શક્રતીર્થં સુવિખ્યાતમશેષાઘવિનાશનમ્

પુરા શક્રેણ તત્રૈવ તપો વૈ દુરતિક્રમમ્ ।
પ્રારબ્ધં પરયા ભક્ત્યા દેવં પ્રતિ મહેશ્વરમ્

તતઃ સંતોષિતો દેવ ઉમાપતિર્નરાધિપ ।
દેવેન્દ્રત્વં વરં રાજ્યં દાનવાનાં વધં દદૌ

લબ્ધં શક્રેણ નૃપતે નર્મદાતીર્થભાવતઃ ।
તતઃ પુણ્યતમં તીર્થં સંજાતં વસુધાતલે

કાર્ત્તિકસ્ય તુ માસસ્ય કૃષ્ણપક્ષે ત્રયોદશીમ્ ।
ઉપોષ્ય વૈ નરો ભક્ત્યા સર્વપાપૈઃ પ્રમુચ્યતે

દુઃસ્વપ્નસમ્ભવૈઃ પાપૈર્દુર્નિમિત્તસમુદ્ભવૈઃ ।
ગ્રહશાકિનિસમ્ભૂતૈર્મુચ્યતે પાણ્ડુનન્દન

શક્રેશ્વરં નૃપશ્રેષ્ઠ યે પ્રપશ્યન્તિ ભક્તિતઃ ।
તેષાં જન્મકૃતં પાપં નશ્યતે નાત્ર સંશયઃ

અગમ્યાગમને ચૈવ અવાહ્યે ચૈવ વાહિતે ।
સ્વામિમિત્રવિઘાતે યન્નશ્યતે નાત્ર સંશયઃ

ગોપ્રદાનં પ્રકર્તવ્યં શુભં બ્રાહ્મણપુંગવે ।
ધુર્યં વા દાપયેત્તસ્મિન્ સર્વાઙ્ગરુચિરં નૃપ

દાતવ્યં પરયા ભક્ત્યા સ્વર્ગે વાસમભીપ્સતા ।
એતત્તે સર્વમાખ્યાતં શક્રેશ્વરફલં નૃપ

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે શક્રેશ્વરતીર્થમાહાત્મ્યવર્ણનં નામૈકષષ્ટિતમોઽધ્યાયઃ ॥