સ્કંદ પુરાણ · શ્લોક 5.58-3

ઉત્તાનપાદ ઉવાચ -
અથાતો દેવદેવેશ ભાનુમત્યકરોચ્ચ કિમ્ ।
એષ મે સંશયો દેવ કથયસ્વ પ્રસાદતઃ

ઈશ્વર ઉવાચ -
ચિન્તયિત્વા મુહૂર્તં સા ગતા કુણ્ડસ્ય સન્નિધૌ ।
દૃષ્ટ્વા કુણ્ડસ્ય માહાત્મ્યં રાજ્ઞી હર્ષેણ પૂરિતા

વિપ્રાન્ બહૂન્ સમાહૂય પૂજયામાસ તત્ક્ષણાત્ ।
દત્ત્વા તુ વિધિવદ્દાનં બ્રાહ્મણેભ્યો નૃપાત્મજ

નિશ્ચયં પરમં કૃત્વા સ્થિતા શાન્તેન ચેતસા ।
તતઃ સમ્પૂજ્ય વિધિવત્પિતૄન્દેવાન્નરાધિપ

ક્ષપયિત્વા પક્ષમેકં મધુમાસસ્ય સા સ્થિતા ।
અમાવાસ્યાં તતો રાજ્ઞી ગતા પર્વતસન્નિધૌ

નગશૃઙ્ગં સમારુહ્ય કૃત્વા મુકુલિતૌ કરૌ ।
વિજ્ઞાપ્ય બ્રાહ્મણાન્ સર્વાનિદં વચનમબ્રવીત્

મમ માતા પિતા ભ્રાતા યે ચાન્યે સખિબાન્ધવાઃ ।
ક્ષમાપયિત્વા સર્વાંસ્તાન્વચનં મમ કથ્યતામ્

ત્વત્પુત્રી શૂલભેદે તુ તપઃ કૃત્વા સ્વશક્તિતઃ ।
વિસૃજ્ય ચૈવ સાત્માનં તસ્મિંસ્તીર્થે દિવં યયૌ

બ્રાહ્મણા ઊચુઃ ।
સંદેશં કથયિષ્યામસ્ત્વયોક્તં શોભનવ્રતે ।
માતાપિતૃભ્યાં સુશ્રોણિ મા તેઽભૂદત્ર સંશયઃ

તતો વિસૃજ્ય તાંલ્લોકાન્ સ્થિતા પર્વતમૂર્ધનિ ।
અર્ધોત્તરીયવસ્ત્રેણ ગાઢં બદ્ધા પુનઃપુનઃ

તતશ્ચિક્ષેપ સાત્માનમેકચિત્તા નરાધિપ ।
નગાર્દ્ધે પતિતા યાવત્તાવદ્દૃષ્ટાઃ સુરાઙ્ગનાઃ

ભોભો વત્સે મહાભાગે ભાનુમત્યતિતાપસિ ।
દિવ્યં વિમાનમારુહ્ય કૈલાસં પ્રતિ ગમ્યતામ્

તતઃ સા પશ્યતાં તેષાં જનાનાં ત્રિદિવં ગતા

માર્કણ્ડેય ઉવાચ -
ઇતિ તે કથિતઃ સર્વઃ શૂલભેદસ્ય વિસ્તરઃ ।
યઃ શ્રુતઃ શઙ્કરાત્પૂર્વમૃષિદેવસમાગમે

ય ઇદં પઠતે ભક્ત્યા તીર્થે દેવકુલેઽપિ વા ।
સ મુચ્યતે મહાપાપાદપિ જન્મશતાર્જિતાત્

બ્રહ્મહા ચ સુરાપી ચ સ્તેયી ચ ગુરુતલ્પગઃ ।
ગોઘાતી સ્ત્રીવિઘાતી ચ દેવબ્રહ્મસ્વહારકઃ

સ્વામિદ્રોહી મિત્રઘાતી તથા વિશ્વાસઘાતકઃ ।
પરન્યાસાપહારી ચ પરનિક્ષેપલોપકઃ

રસભેદી તુલાભેદી તથા વાર્દ્ધુષિકસ્તુ યઃ ।
યઃ કન્યાવિઘ્નકર્તા ચ તથા વિક્રયકારકઃ

પરભાર્યા ભ્રાતૃભાર્યા ગૌઃ સ્નુષા કન્યકા તથા ।
અભિગામી પરદ્વેષી તથા ધર્મપ્રદૂષકઃ

મુચ્યન્તે સર્વે એવૈતે શૂલભેદપ્રભાવતઃ

ય ઇદં શ્રાવયેચ્છ્રાદ્ધે વિપ્રાણાં ભુઞ્જતાં નૃપ ।
મુદં પ્રયાન્તિ સંહૃષ્ટાઃ પિતરસ્તસ્ય સર્વશઃ

યશ્ચેદં શૃણુયાદ્ભક્ત્યા પઠ્યમાનં નરો વશી ।
સ મુક્તઃ સર્વપાપેભ્યઃ સર્વકલ્યાણભાગ્ભવેત્

ઇદં યશસ્યમાયુષ્યમિદં પાવનમુત્તમમ્ ।
પઠતાં શૃણ્વતાં નૃણામાયુઃકીર્તિવિવર્ધનમ્

ઇતિ કથિતમિદં તે શૂલભેદસ્ય પુણ્યં મહિમન હિ મનુષ્યૈઃ શ્રૂયતે યત્સપાપૈઃ ।
મદનરિપુતટિન્યા યામ્યકૂલસ્થિતસ્ય પ્રબલદુરિતકન્દોચ્છેદકુદ્દાલકલ્પમ્

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે શૂલભેદતીર્થમાહાત્મ્યવર્ણનં નામાષ્ટપઞ્ચાશત્તમોઽધ્યાયઃ॥
શૂલભેદમાહાત્મ્યં સમાપ્તમ્