સ્કંદ પુરાણ · શ્લોક 5.32-3

શ્રીમાર્કણ્ડેય ઉવાચ -
પત્ત્રેશ્વરં તતો ગચ્છેત્સર્વપાપપ્રણાશનમ્ ।
યત્ર સિદ્ધો મહાભાગશ્ચિત્રસેનસુતો બલી

યુધિષ્ઠિર ઉવાચ -
કોઽસૌ સિદ્ધસ્તદા બ્રહ્મંસ્તસ્મિંસ્તીર્થે મહાતપાઃ ।
પુત્રઃ કસ્ય તુ કો હેતુરેતદિચ્છામિ વેદિતુમ્

શ્રીમાર્કણ્ડેય ઉવાચ -
ચિત્રોનામ મહાતેજા ઇન્દ્રસ્ય દયિતઃ પુરા ।
તસ્ય પુત્રો નૃપશ્રેષ્ઠ પત્ત્રેશ્વર ઇતિ શ્રુતઃ

રૂપવાન્ સુભગશ્ચૈવ સર્વશત્રુભયંકરઃ ।
ઇન્દ્રસ્ય દયિતોઽત્યર્થં જય ઇત્યેવ ચાપરઃ

સ કદાચિત્સભામધ્યે સર્વદેવસમાગમે ।
મેનકાનૃત્યગીતેન મોહિતઃ સુચિરં કિલ

તિષ્ઠતે ગતમર્યાદો ગતપ્રાણ ઇવ ક્ષણાત્ ।
તાવત્સુરપતિર્દેવઃ શશાપાથાજિતેન્દ્રિયમ્

યસ્માત્ત્વં સ્વર્ગસંસ્થોઽપિ મર્ત્યધર્મમુપેયિવાન્ ।
તસ્માન્મર્ત્યે ચિરં કાલં ક્ષપયિષ્યસ્યસંશયમ્

એવમુક્તઃ સુરેન્દ્રેણ ચિત્રસેનસુતો યુવા ।
વેપમાનઃ સુરશ્રેષ્ઠઃ કૃતાઞ્જલિરુવાચ હ

પત્ત્રેશ્વર ઉવાચ -
મયા પાપેન મૂઢેન અજિતેન્દ્રિયચેતસા ।
પ્રાપ્તં વૈ યત્ફલં તસ્ય પ્રસાદં કર્તુમર્હસિ

શક્ર ઉવાચ -
નર્મદાતટમાશ્રિત્ય દ્વાદશાબ્દં જિતેન્દ્રિયઃ ।
આરાધય શિવં શાન્તં પુનઃ પ્રાપ્સ્યસિ સદ્ગતિમ્

સત્યશૌચરતાનાં ચ ધર્મિષ્ઠાનાં જિતાત્મનામ્ ।
લોકોઽયં પાપિનાં નૈવ ઇતિ શાસ્ત્રસ્ય નિશ્ચયઃ

એવમુક્તે મહારાજ સહસ્રાક્ષેણ ધીમતા ।
ગન્ધર્વતનયો ધીમાન્પ્રણમ્યાગાત્તુ ભૂતલમ્

રેવાયા વિમલે તોયે બ્રહ્માવર્તસમીપતઃ ।
સ્નાત્વા જપ્ત્વા વિધાનેન અર્ચયિત્વા ચ શઙ્કરમ્

વાય્વમ્બુપિણ્યાકફલૈશ્ચ પુષ્પૈઃ પર્ણૈશ્ચ મૂલાશનયાવકેન ।
તતાપ પઞ્ચાગ્નિતપોભિરુગ્રૈસ્તતશ્ચ તોષં સમગાત્સ દેવઃ

પિનાકપાણિં વરદં ત્રિશૂલિનમુમાપતિં હ્યન્ધકનાશનં ચ ।
ચન્દ્રાર્ધમૌલિં ગજકૃત્તિવાસસં દૃષ્ટ્વા પપાતાગ્રગતં સમીક્ષ્ય

ઈશ્વર ઉવાચ -
વરં વૃણીષ્વ ભદ્રં તે વરદોઽહં તવાનઘ ।
યમિચ્છસિ દદામ્યદ્ય નાત્ર કાર્યા વિચારણા

પત્ત્રેશ્વર ઉવાચ -
યદિ તુષ્ટોઽસિ દેવેશ યદિ દેયો વરો મમ ।
અત્ર ત્વં સતતં તીર્થે મમ નામ્ના ભવ પ્રભો

એતચ્છ્રુત્વા મહાદેવો હર્ષગદ્ગદયા ગિરા ।
તથેત્યુક્ત્વા યયૌ હૃષ્ટ ઉમયા સહ શઙ્કરઃ

સોઽપિ તત્તીર્થમાપ્લુત્ય ગતે દેવે દિવં પ્રતિ ।
સ્નાત્વા જાપ્યવિધાનેન તર્પયિત્વા પિતૄન્ પુનઃ

સ્થાપયામાસ દેવેશં તસ્મિંસ્તીર્થે વિધાનતઃ ।
પત્ત્રેશ્વરં તુ વિખ્યાતં ત્રિષુ લોકેષુ ભારત

ઇન્દ્રલોકં ગતઃ શાપાન્મુક્તઃ સોઽપિ નરેશ્વર ।
હૃષ્ટઃ પ્રમુદિતો રમ્યં જયશબ્દાદિમઙ્ગલૈઃ

એષ તે કથિતઃ પ્રશ્નઃ પૃષ્ટો યો વૈ યુધિષ્ઠિર ।
તત્ર સ્નાનેન ચૈકેન સર્વપાપૈઃ પ્રમુચ્યતે

યસ્ત્વર્ચયેન્મહાદેવં તસ્મિંસ્તીર્થે યુધિષ્ઠિર ।
સ્નાત્વાભ્યર્ચ્ય પિત્ઃન્ દેવાન્ સોઽશ્વમેધફલં લભેત્

મૃતો વર્ષશતં સાગ્રં ક્રીડિત્વા ચ શિવે પુરે ।
રાજા વા રાજતુલ્યો વા પશ્ચાન્મર્ત્યેષુ જાયતે

વેદવેદાઙ્ગતત્ત્વજ્ઞો જીવેચ્ચ શરદઃ શતમ્ ।
વ્યાધિશોકવિનિર્મુક્તઃ પુનઃ સ્મરતિ તજ્જલમ્

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે પત્રેશ્વરતીર્થમાહાત્મ્યવર્ણનં નામ દ્વાત્રિંશોઽધ્યાયઃ ॥