સ્કંદ પુરાણ · શ્લોક 5.30-3

શ્રીમાર્કણ્ડેય ઉવાચ -
નર્મદોત્તરકૂલે તુ દારુતીર્થમનુત્તમમ્ ।
યત્ર સિદ્ધો મહાભાગ તપસ્તપ્ત્વા દ્વિજોત્તમઃ

યુધિષ્ઠિર ઉવાચ -
કોઽસૌ દ્વિજવરશ્રેષ્ઠઃ સિદ્ધસ્તત્ર મહામુને ।
દારુકેતિ સુતઃ કસ્ય એતન્મે વક્તુમર્હસિ

શ્રીમાર્કણ્ડેય ઉવાચ -
ભાર્ગવે વિપુલે વંશે ધીમતો દેવશાર્મણઃ ।
દારુર્નામ મહાભાગો વેદવેદાઙ્ગપારગઃ

બ્રહ્મચારી ગૃહસ્થશ્ચ વાનપ્રસ્થો વિધિક્રમાત્ ।
યતિધર્મવિધાનેન ચચાર વિપુલતપઃ

ધ્યાયન્વૈ સ મહાદેવં નિરાહારો યુધિષ્ઠિર ।
ઉવાસ તીર્થે તસ્મિન્ વૈ યાવત્પ્રાણપરિક્ષયમ્

તસ્ય નામ્ના તુ તત્તીર્થં ત્રિષુ લોકેષુ વિશ્રુતમ્ ।
તત્ર સ્નાત્વા વિધાનેન અર્ચયેત્પિતૃદેવતાઃ

સત્યવાદી જિતક્રોધઃ સર્વભૂતહિતે રતઃ ।
સર્વાન્કામાનવાપ્નોતિ રાજન્નત્રૈવ સવર્થા

યઃ કુર્યાદુપવાસં ચ સત્યશૌચપરાયણઃ ।
સૌત્રામણિફલં ચાસ્ય સમ્ભવત્યવિચારિતમ્

ઋગ્વેદજાપી ઋગ્વેદી સામ વા સામપારગઃ ।
યજુર્વેદી યજુર્જપ્ત્વા લભતે ફલમુત્તમમ્

પ્રાણાંસ્ત્યજતિ યો મર્ત્યસ્તસ્મિંસ્તીર્થે વિધાનતઃ ।
અનિવર્તિકા ગતિસ્તસ્ય ઇત્યેવં શઙ્કરોઽબ્રવીત્

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે દારુતીર્થમાહાત્મ્યવર્ણનં નામ ત્રિંશોઽધ્યાયઃ ॥