સ્કંદ પુરાણ · અધ્યાય 5.206

શ્રીમાર્કણ્ડેય ઉવાચ -
ગચ્છેત્તતઃ ક્ષોણિનાથ તીર્થં પરમશોભનમ્ ।
સર્વપાપહરં પુણ્યં દશકન્યેતિ વિશ્રુતમ્ ।
મહાદેવકૃતં પુણ્યં સર્વકામફલપ્રદમ્

તત્ર તીર્થે મહાદેવો દશકન્યા ગુણાન્વિતાઃ ।
બ્રહ્મણો વરયામાસ હ્યુદ્વાહેન યુયોજ હ

તદાપ્રભૃતિ તત્તીર્થં દશકન્યેતિ વિશ્રુતમ્ ।
સર્વપાપહરં પુણ્યમક્ષયં કીર્તિતં ફલમ્

તત્ર તીર્થે તુ યઃ કન્યાં દદાતિ સમલંકૃતામ્ ।
પ્રાપ્નોતિ પુરુષો દત્ત્વા યથાશક્ત્યા સ્વલંકૃતામ્

તેન દાનોત્થપુણ્યેન પૂતાત્માનો નરાધિપ ।
વસન્તિ રોમસંખ્યાનિ વર્ષાણિ શિવસન્નિધૌ

તતઃ કાલેન મહતા ત્વિહ લોકે નરેશ્વર ।
માનુષ્યં પ્રાપ્ય દુષ્પ્રાપ્યં ધનકોટીપતિર્ભવેત્

તત્ર તીર્થે તુ યો ભક્ત્યા સ્નાત્વા વિપ્રાય કાઞ્ચનમ્ ।
સમ્પ્રયચ્છતિ શાન્તાય સોઽત્યન્તં સુખમશ્નુતે

વાચિકં માનસં વાપિ કર્મજં યત્પુરા કૃતમ્ ।
તત્સર્વં વિલયં યાતિ સ્વર્ણદાનેન ભારત

નરો દત્ત્વા સુવર્ણં ચાપિ વાલાગ્રમાત્રકમ્ ।
તત્ર તીર્થે દિવં યાતિ મૃતો નાસ્ત્યત્ર સંશયઃ

તત્ર વિદ્યાધરૈઃ સિદ્ધૈર્વિમાનવરમાસ્થિતઃ ।
પૂજ્યમાનો વસેત્તાવદ્યાવદાભૂતસમ્પ્લવમ્

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે દશકન્યાતીર્થમાહાત્મ્યવર્ણનં નામ ષડુત્તરદ્વિશતતમોઽધ્યાયઃ ॥