સ્કંદ પુરાણ · અધ્યાય 5.179

માર્કણ્ડેય ઉવાચ -
તતો ગચ્છેત્તુ રાજેન્દ્ર ગૌતમેશ્વરમુત્તમમ્ ।
સર્વપાપહરં તીર્થં ત્રિષુ લોકેષુ વિશ્રુતમ્

ગૌતમેન તપસ્તપ્તં તત્ર તીર્થે યુધિષ્ઠિર ।
દિવ્યં વર્ષસહસ્રં તુ તતસ્તુષ્ટો મહેશ્વરઃ

પ્રણમ્ય શિરસા તત્ર સ્થાપિતઃ પરમેશ્વરઃ ।
સ્થાપિતો ગૌતમેનેશો ગૌતમેશ્વર ઉચ્યતે

તત્ર દેવૈશ્ચ ગન્ધર્વૈરૃષિભિઃ પિતૃદૈવતૈઃ ।
સમ્પ્રાપ્તા હ્યુત્તમા સિદ્ધિરારાધ્ય પરમેશ્વરમ્

તત્ર તીર્થે તુ યઃ સ્નાત્વા પૂજયેત્પિતૃદેવતાઃ ।
પૂજયેત્પરમીશાનં સર્વપાપૈઃ પ્રમુચ્યતે

બહવસ્તન્ન જાનન્તિ વિષ્ણુમાયાવિમોહિતાઃ ।
તત્ર સંનિહિતં દેવં શૂલપાણિં મહેશ્વરમ્

બ્રહ્મચારી તુ યો ભૂત્વા તત્ર તીર્થે નરેશ્વર ।
સ્નાત્વાર્ચયેન્મહાદેવં સોઽશ્વમેધફલં લભેત્

બ્રહ્મચારી તુ યો ભૂત્વા તર્પયેત્પિતૃદેવતાઃ ।
પૂજયેત્પરમીશાનં સર્વપાપૈઃ પ્રમુચ્યતે

તત્ર તીર્થે તુ યો દાનં ભક્ત્યા દદ્યાદ્દ્વિજાતયે ।
તદક્ષયફલં સર્વં નાત્ર કાર્યા વિચારણા

માસે ચાશ્વયુજે રાજન્ કૃષ્ણપક્ષે ચતુર્દશીમ્ ।
સ્નાત્વા તત્ર વિધાનેન દીપકાનાં શતં દદેત્

પૂજયિત્વા મહાદેવં ગન્ધપુષ્પાદિભિર્નરઃ ।
મુચ્યતે સર્વપાપેભ્યો મૃતઃ શિવપુરં વ્રજેત્

અષ્ટમ્યાં ચ ચતુર્દશ્યાં કાર્ત્તિક્યાં તુ વિશેષતઃ ।
ઉપોષ્ય પ્રયતો ભૂત્વા ઘૃતેન સ્નાપયેચ્છિવમ્

પઞ્ચગવ્યેન મધુના દધ્ના વા શીતવારિણા ।
સ ચ સર્વસ્ય યજ્ઞસ્ય ફલં પ્રાપ્નોતિ માનવઃ

ભક્ત્યા તુ પૂજયેત્પશ્ચાત્સ લભેત્ફલમુત્તમમ્ ।
બિલ્વપત્રૈરખણ્ડૈશ્ચ પુષ્પૈરુન્મત્તકોદ્ભવૈઃ

કુશાપામાર્ગસહિતૈઃ કદમ્બદ્રોણજૈરપિ ।
મલ્લિકાકરવીરૈશ્ચ રક્તપીતૈઃ સિતાસિતૈઃ

પુષ્પૈરન્યૈર્યથાલાભં યો નરઃ પૂજયેચ્છિવમ્ ।
નૈરન્તર્યેણ ષણ્માસં યોઽર્ચયેદ્ગૌતમેશ્વરમ્ ।
સર્વાન્કામાનવાપ્નોતિ મૃતઃ શિવપુરં વ્રજેત્

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે ગૌતમેશ્વરતીર્થમાહાત્મ્યવર્ણનં નામ એકોનાશીત્યધિકશતતમોઽધ્યાયઃ ॥