સ્કંદ પુરાણ · અધ્યાય 5.177

શ્રીમાર્કણ્ડેય ઉવાચ -
ભૂતીશ્વરં તતો ગચ્છેત્સર્વતીર્થેષ્વનુત્તમમ્ ।
દર્શનાદેવ રાજેન્દ્ર યસ્ય પાપં પ્રણશ્યતિ

તત્ર સ્થાને પુરા પાર્થ દેવદેવેન શૂલિના ।
ઉદ્ધૂલનં કૃતં ગાત્રે તેન ભૂતીશ્વરં તુ તત્

પુષ્યે વા જન્મનક્ષત્રે અમાવાસ્યાં વિશેષતઃ ।
ભૂતીશ્વરે નરઃ સ્નાત્વા કુલકોટિં સમુદ્ધરેત્

તત્ર સ્થાને તુ યો ભક્ત્યા કુરુતે હ્યઙ્ગગુણ્ઠનમ્ ।
તસ્ય યત્ફલમુદ્દિષ્ટં તચ્છૃણુષ્વ નરાધિપ

યાવન્તો ભૂતિકણિકા ગાત્રે લગ્નાઃ શિવાલયે ।
તાવદ્વર્ષસહસ્રાણિ શિવલોકે મહીયતે

સર્વેષામેવ સ્નાનાનાં ભસ્મસ્નાનં પરં સ્મૃતમ્ ।
પુરાણૈરૃષિભિઃ પ્રોક્તં સર્વશાસ્ત્રેષ્વનુત્તમમ્

એકકાલં દ્વિકાલં વા ત્રિકાલં ચાપિ યઃ સદા ।
સ્નાનં કરોતિ ચાગ્નેયં પાપં તસ્ય પ્રણશ્યતિ

દિવ્યસ્નાનાદ્વરં સ્નાનં વાયવ્યં ભરતર્ષભ ।
વાયવ્યાદુત્તમં બ્રાહ્મ્યં વરં બ્રાહ્મ્યાત્તુ વારુણમ્

આગ્નેયં વારુણાચ્છ્રેષ્ઠં યસ્માદુક્તં સ્વયમ્ભુવા ।
તસ્માત્સર્વપ્રયત્નેન હ્યાગ્નેયં સ્નાનમાચરેત્

યુધિષ્ઠિર ઉવાચ -
આગ્નેયં વારુણં બ્રાહ્મ્યં વાયવ્યં દિવ્યમેવ ચ ।
કિમુક્તં શ્રોતુમિચ્છામિ પરં કૌતૂહલં હિ મે

માર્કણ્ડેય ઉવાચ -
આગ્નેયં ભસ્મના સ્નાનમવગાહ્ય ચ વારુણમ્ ।
આપોહિષ્ઠેતિ ચ બ્રાહ્મ્યં વાયવ્યં ગોરજઃ સ્મૃતમ્

સૂર્યે દૃષ્ટે તુ યત્સ્નાનં ગઙ્ગાતોયેન તત્સમમ્ ।
તત્સ્નાનં પઞ્ચમં પ્રોક્તં દિવ્યં પાણ્ડવસત્તમ

તસ્માત્સર્વપ્રયત્નેન સ્નાત્વા ભૂતીશ્વરે તુ યઃ ।
પૂજયેદ્દેવમીશાનં સ બાહ્યાભ્યન્તરઃ શુચિઃ

તત્ર સ્થાને તુ યે નિત્યં ધ્યાયન્તિ પરમં પદમ્ ।
સૂક્ષ્મં ચાતીન્દ્રિયં નિત્યં તે ધન્યા નાત્ર સંશયઃ

મુક્તિતીર્થં તુ તત્તીર્થં સર્વતીર્થેષ્વનુત્તમમ્ ।
દર્શનાદેવ યસ્યૈવ પાપં યાતિ મહત્ક્ષયમ્

જાયતે પૂજયા રાજ્યં તત્ર સ્તુત્વા મહેશ્વરમ્ ।
જપેન પાપસંશુદ્ધિર્ધ્યાનેનાનન્ત્યમશ્નુતે

ઓં જ્યોતિઃ સ્વરૂપમનાદિમધ્યમનુત્પાદ્યમાનમનુચાર્યમાણાક્ષરમ્ ।
સર્વભૂતસ્થિતં શિવં સર્વયોગેશ્વરં સર્વલોકેશ્વરં મોહશોકહીનં મહાજ્ઞાનગમ્યમ્

તત્ર તીર્થે તુ યો ગત્વા સ્નાનં કુર્યાન્નરેશ્વર ।
અશ્વમેધસ્ય યજ્ઞસ્ય ફલં પ્રાપ્નોતિ માનવઃ ।
એવમ્ભૂતં ન જાનન્તિ મોક્ષાપેક્ષણિકા નરાઃ

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે ભૂતીશ્વરતીર્થમાહાત્મ્યવર્ણનં નામ સપ્તસપ્તત્યધિકશતતમોઽધ્યાયઃ ॥