સ્કંદ પુરાણ · અધ્યાય 5.147

માર્કણ્ડેય ઉવાચ -
તતો ગચ્છેન્મહીપાલ સિદ્ધેશ્વરમનુત્તમમ્ ।
નર્મદાદક્ષિણે કૂલે તીર્થં પરમશોભનમ્

તત્ર તીર્થે તુ યઃ સ્નાત્વા પૂજયેદ્વૃષભધ્વજમ્ ।
સર્વપાપવિનિર્મુક્તો ગતિં યાત્યશ્વમેધિનામ્

તત્ર તીર્થે તુ યઃ સ્નાત્વા શ્રાદ્ધં કુર્યાત્પ્રયત્નતઃ ।
પિતૄણાં પ્રીણનાર્થાય સર્વં તેન કૃતં ભવેત્

તત્ર તીર્થે મૃતાનાં તુ જન્તૂનાં નૃપસત્તમ ।
ગર્ભવાસે મતિસ્તેષાં ન જાયેત કદાચન

ગર્ભવાસો હિ દુઃખાય ન સુખાય કદાચન ।
તત્તીર્થવારિણા સ્નાતુર્ન પુનર્ભવસમ્ભવઃ

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે સિદ્ધેશ્વરતીર્થમાહાત્મ્યવર્ણનં નામ સપ્તચત્વારિંશદધિકશતતમોઽધ્યાયઃ ॥