સ્કંદ પુરાણ · અધ્યાય 5.148

શ્રીમાર્કણ્ડેય ઉવાચ -
તતો ગચ્છેન્મહીપાલ તીર્થમઙ્ગારકં શિવમ્ ।
ઉત્તરે નર્મદાકૂલે સર્વપાપક્ષયંકરમ્

ચતુર્થ્યઙ્ગારકદિને સંકલ્પ્ય કૃતનિશ્ચયઃ ।
સ્નાયાદસ્તં ગતે સૂર્યે સન્ધ્યોપાસનતત્પરઃ

પૂજયેલ્લોહિતં ભક્ત્યા ગન્ધમાલ્યવિભૂષણૈઃ ।
સંસ્થાપ્યસ્થણ્ડિલે દેવં રક્તચન્દનચર્ચિતમ્

અઙ્ગારકાયેતિ નમઃ કર્ણિકાયાં પ્રપૂજયેત્ ।
કુજાય ભૂમિપુત્રાય રક્તાઙ્ગાય સુવાસસે

હરકોપોદ્ભવાયેતિ સ્વેદજાયાતિબાહવે ।
સર્વકામપ્રદાયેતિ પૂર્વાદિષુ દલેષુ ચ

એવં સમ્પૂજ્ય વિધિવદ્દદ્યાદર્ઘ્યં વિધાનતઃ ।
ભૂમિપુત્ર મહાવીર્ય સ્વેદોદ્ભવ પિનાકિનઃ

અઙ્ગારક મહાતેજા લોહિતાઙ્ગ નમોઽસ્તુ તે ।
કરકં વારિસંયુક્તં શાલિતંદુલપૂરિતમ્

સહિરણ્યં સવસ્ત્રં ચ મોદકોપરિ સંસ્થિતમ્ ।
બ્રાહ્મણાય નિવેદ્યં તત્કુજો મે પ્રીયતામિતિ

અર્ઘં દત્ત્વા વિધાનેન રક્તચન્દનવારિણા ।
રક્તપુષ્પસમાકીર્ણં તિલતંદુલમિશ્રિતમ્

કૃત્વા તામ્રમયે પાત્રે મણ્ડલે વર્તુલે શુભે ।
કૃત્વા શિરસિ તત્પાત્રં જાનુભ્યાં ધરણીં ગતઃ

મન્ત્રપૂતં મહાભાગ દદ્યાદર્ઘ્યં વિચક્ષણઃ ।
તતો ભુઞ્જીત મૌનેન ક્ષારતિલામ્લવર્જિતમ્

સ્નિગ્ધં મૃદુસમધુરમાત્મનઃ શ્રેય ઇચ્છતા ।
એવં ચતુર્થે સમ્પ્રાપ્તે ચતુર્થ્યઙ્ગારકે નૃપ

સૌવર્ણં કારયેદ્દેવં યથાશક્તિ સુરૂપિણમ્ ।
સ્થાપયેત્તામ્રકે પાત્રે ગુડપીઠસમન્વિતે

ગન્ધપુષ્પાદિભિર્દેવં પૂજયેદ્ગુડસંસ્થિતમ્ ।
ઈશાન્યાં સ્થાપયેદ્દેવં ગુડતોયસમન્વિતમ્

કાસારેણ તથાગ્નેય્યાં સ્થાપયેત્કરકં પરમ્ ।
રક્તતન્દુલસંમિશ્રં નૈરૃત્યાં વાયુગોચરે

સ્થાપયેન્મોદકૈઃ સાર્ધં ચતુર્થં કરકં બુધઃ ।
સૂત્રેણ વેષ્ટિતગ્રીવં ગન્ધમાલ્યૈરલંકૃતમ્

શઙ્ખતૂર્યનિનાદેન જયશબ્દાદિમઙ્ગલૈઃ ।
રક્તામ્બરધરં વિપ્રં રક્તમાલ્યાનુલેપનમ્

વેદિમધ્યગતં વાપિ મહદાસનસંસ્થિતમ્ ।
સુરૂપં સુભગં શાન્તં સર્વભૂતહિતે રતમ્

વેદવિદ્યાવ્રતસ્નાતં સર્વશાસ્ત્રવિશારદમ્ ।
પૂજયિત્વા યથાન્યાયં વાચયેત્પાણ્ડુનન્દન

રક્તાં ગાં ચ તતો દદ્યાદ્રક્તેનાનડુહા સહ ।
પ્રીયતાં ભૂમિજો દેવઃ સર્વદૈવતપૂજિતઃ

વિપ્રં પ્રદક્ષિણીકૃત્ય પત્નીપુત્રસમન્વિતઃ ।
પિતૃમાતૃસુહૃત્સાર્દ્ધં ક્ષમાપ્ય ચ વિસર્જયેત્

એવં કૃતસ્ય તસ્યાથ તસ્મિંસ્તીર્થે વિશેષતઃ ।
યત્પુણ્યં ફલમુદ્દિષ્ટં તત્તે સર્વં વદામ્યહમ્

સપ્ત જન્માનિ રાજેન્દ્ર સુરૂપઃ સુભગો ભવેત્ ।
તીર્થસ્યાસ્ય પ્રભાવેન નાત્ર કાર્યા વિચારણા

અકામો વા સકામો વા તત્ર તીર્થે મૃતો નરઃ ।
અઙ્ગારકપુરં યાતિ દેવગન્ધર્વપૂજિતઃ

ઉપભુજ્ય યથાન્યાયં દિવ્યાન્ભોગાનનુત્તમાન્ ।
ઇહ માનુષ્યલોકે વૈ રાજા ભવતિ ધાર્મિકઃ

સુરૂપઃ સુભગશ્ચૈવ સર્વવ્યાધિવિવર્જિતઃ ।
જીવેદ્વર્ષશતં સાગ્રં સર્વલોકનમસ્કૃતઃ

॥ ઇતિ શ્રીસ્કાન્દે મહાપુરાણે એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે મઙ્ગલેશ્વરતીર્થમાહાત્મ્યવર્ણનં નામાષ્ટાચત્વારિંશદધિકશતતમોઽધ્યાયઃ ॥