સ્કંદ પુરાણ · શ્લોક 3.12-2

॥ ઋષભ ઉવાચ ॥ ॥
નમસ્કૃત્ય મહાદેવં વિશ્વવ્યાપિનમીશ્વરમ્ ॥
વક્ષ્યે શિવમયં વર્મ સર્વરક્ષાકરં નૃણામ્

શુચૌ દેશે સમાસીનો યથાવત્કલ્પિતાસનઃ ॥
જિતેંદ્રિયો જિતપ્રાણશ્ચિંતયેચ્છિવમવ્યયમ્

હૃત્પુંડરીકાંતરસન્નિવિષ્ટં સ્વતેજસા વ્યાપ્તનભોવકાશમ્ ॥
અતીંદ્રિયં સૂક્ષ્મમનંતમાદ્યં ધ્યાયેત્પરાનંદમયં મહેશમ્

ધ્યાનાવધૂતાખિલકર્મબંધશ્ચિરં ચિદાનંદનિમગ્નચેતાઃ ॥
ષડક્ષરન્યાસસમાહિતાત્મા શૈવેન કુર્યા ત્કવચેન રક્ષામ્

માં પાતુ દેવોઽખિલદેવતાત્મા સંસારકૂપે પતિતં ગભીરે ॥
તન્નામ દિવ્યં વરમંત્રમૂલં ધુનોતુ મે સર્વમઘં હૃદિસ્થમ્

સર્વત્ર માં રક્ષતુ વિશ્વમૂર્ત્તિર્જ્યોતિર્મયાનંદઘનશ્ચિદાત્મા ॥
અણોરણીયાનુરુશક્તિરેકઃ સ ઈશ્વરઃ પાતુ ભયાદશેષાત્

યો ભૂસ્વરૂપેણ બિભર્તિ વિશ્વં પાયાત્સ ભૂમેર્ગિરિશોઽષ્ટમૂર્તિઃ ॥
યોઽપાં સ્વરૂપેણ નૃણાં કરોતિ સંજીનં સોઽવતુ માં જલેભ્યઃ

કલ્પાવસાને ભુવનાનિ દગ્ધ્વા સર્વાણિ યો નૃત્યતિ ભૂરિલીલઃ ॥
સ કાલરુદ્રોઽવતુ માં દવાગ્નેર્વાત્યાદિભીતેરખિલાચ્ચ તાપાત્

પ્રદીપ્તવિદ્યુત્કનકાવભાસો વિદ્યાવરાભીતિકુઠારપાણિઃ॥
ચતુર્મુખસ્તત્પુરુષસ્ત્રિનેત્રઃ પ્રાચ્યાં સ્થિતં રક્ષતુ મામજસ્રમ્

કુઠારવેદાંકુશપાશશૂલકપાલઢક્કાક્ષગુણાન્દધાનઃ ॥
ચતુર્મુખો નીલરુચિસ્ત્રિનેત્રઃ પાયાદઘોરો દિશિ દક્ષિણસ્યામ્

કુંદેન્દુશંખસ્ફટિકાવભાસો વેદાક્ષમાલાવરદાભયાંકઃ ॥
ત્ર્યક્ષશ્ચતુર્વક્ત્ર ઉરુપ્રભાવઃ સદ્યોધિજાતોવતુ માં પ્રતીચ્યામ્

વરાક્ષમાલાભયટંકહસ્તઃ સરોજકિંજલ્કસમાનવર્ણઃ ॥
ત્રિલોચનશ્ચારુચતુર્મુખો માં પાયાદુદીચ્યાં દિશિ વામદેવઃ

વેદાભયેષ્ટાંકુશટંકપાશકપાલઢક્કાક્ષકશૂલપાણિઃ ॥
સિતદ્યુતિઃ પંચમુખોઽવતાન્મામીશાન ઊર્દ્ધ્વં પરમપ્રકાશઃ

મૂર્ધાનમવ્યાન્મમ ચંદ્રમૌ લિર્ભાલં મમાવ્યાદથ ભાલનેત્રઃ ॥
નેત્રે મમાવ્યાદ્ભગનેત્રહારી નાસાં સદા રક્ષતુ વિશ્વનાથઃ

પાયાચ્છ્રુતી મે શ્રુતિગીતકીર્તિઃ કપોલમવ્યા ત્સતતં કપાલી ॥
વક્ત્રં સદા રક્ષતુ પંચવક્ત્રો જિહ્વાં સદા રક્ષતુ વેદજિહ્વઃ

કંઠં ગિરીશોઽવતુ નીલકંઠઃ પાણિદ્વયં પાતુ પિનાકપાણિઃ ॥
દોર્મૂલમવ્યાન્મમ ધર્મબાહુર્વક્ષઃસ્થલં દક્ષમખાંતકોઽવ્યાત્

મમોદરં પાતુ ગિરીંદ્રધન્વા મધ્યં મમાવ્યાન્મદનાન્તકારી ॥
હેરંબતાતો મમ પાતુ નાભિં પાયાત્કટી ધૂર્જટિરીશ્વરો મે

ઊરુદ્વયં પાતુ કુબેરમિત્રો જાનુદ્વયં મે જગદીશ્વરોઽવ્યાત્ ॥
જંઘાયુગં પુંગવકેતુરવ્યાત્પાદૌ મમાવ્યા ત્સુરવંદ્યપાદઃ

મહેશ્વરઃ પાતુ દિનાદિયામે માં મધ્યયામેઽવતુ વામદેવઃ ॥
ત્રિયંબકઃ પાતુ તૃતીયયામે વૃષધ્વજઃ પાતુ દિનાંત્યયામે ॥

પાયાન્નિશાદૌ શશિશેખરો માં ગંગાધરો રક્ષતુ માં નિશીથે ॥
ગૌરીપતિઃ પાતુ નિશાવસાને મૃત્યુંજયો રક્ષતુ સર્વકાલમ્

અંતઃસ્થિતં રક્ષતુ શંકરો માં સ્થાણુઃ સદા પાતુ બહિઃસ્થિતં મામ્ ॥
તદંતરે પાતુ પતિઃ પશૂનાં સદા શિવો રક્ષતુ માં સમંતાત્

તિષ્ઠંતમવ્યા દ્ભુવનૈકનાથઃ પાયાદ્વ્રજંતં પ્રમથાધિનાથઃ ॥
વેદાંતવેદ્યોઽવતુ માન્નિષણ્ણં મામવ્યયઃ પાતુ શિવઃ શયાનમ્

માર્ગેષુ માં રક્ષતુ નીલકંઠઃ શૈલાદિદુર્ગેષુ પુરત્રયારિઃ ॥
અરણ્યવાસાદિમહાપ્રવાસે પાયાન્મૃગવ્યાધ ઉદારશક્તિઃ

કલ્પાંતકાટોપપટુપ્રકોપઃ સ્ફુટાટ્ટહાસોચ્ચલિતાંડકોશઃ ॥
ઘોરારિસેનાર્ણવદુર્નિવારમહાભયાદ્રક્ષતુ વીરભદ્રઃ

પત્ત્યશ્વમાતંગઘટાવરૂથસહસ્રલક્ષાયુતકોટિભીષણમ્ ॥
અક્ષૌહિણીનાં શતમાતતાયિનાં છિંદ્યા ન્મૂઢો ઘોરકુઠારધારયા

નિહંતુ દસ્યૂન્પ્રલયાનલાર્ચિર્જ્વલત્ત્રિશૂલં ત્રિપુરાંતકસ્ય ॥
શાર્દૂલસિંહર્ક્ષવૃકાદિહિંસ્રાન્સંત્રાસયત્વીશધનુઃપિનાકમ્॥

દુઃસ્વપ્નદુઃશકુનદુર્ગતિદૌર્મનસ્યદુર્ભિક્ષદુર્વ્યસનદુઃસહદુર્યશાંસિ।
ઉત્પાતતાપવિષભીતિમસદ્ગ્રહાર્તિવ્યાધીંશ્ચ નાશયતુ મે જગતામધીશઃ

ઓંનમો ભગવતે સદાશિવાય સકલતત્ત્વાત્મકાય સકલતત્ત્વવિહારાય સકલલોકૈકકર્ત્રે સકલલૌકૈકભર્ત્રે સકલલોકૈકહર્ત્રે સકલલોકૈકગુરવે સકલલોકૈકસાક્ષિણે સકલનિગમગુહ્યાય સકલવરપ્રદાય સકલદુરિતાર્તિભંજનાય સકલજગદભયંકરાય સકલલોકૈકશંકરાય શશાંકશેખરાય શાશ્વ તનિજાભાસાય નિર્ગુણાય નિરુપમાય નીરૂપાય નિરાભાસાય નિરામયાય નિષ્પ્રપંચાય નિષ્કલંકાય નિર્દ્વંદ્વાય નિઃસંગાય નિર્મલાય નિર્ગમાય નિત્યરૂપવિભવાય નિરુપમવિભવાય નિરાધારાય નિત્યશુદ્ધબુદ્ધપરિપૂર્ણસચ્ચિદાનંદાદ્વયાય પરમશાંતપ્રકાશતેજોરૂપાય જયજય મહારુદ્ર મહારૌદ્ર ભદ્રાવતાર દુઃખદાવદારણ મહાભૈરવ કાલભૈરવ કલ્પાન્તભૈરવ કપાલમાલાધર ખટ્વાંગખડ્ગચર્મપાશાંકુશડમરુશૂલચાપબાણગદાશક્તિભિં ડિપાલતોમરમુસલમુદ્ગરપટ્ટિશપરશુપરિઘભુશુંડીશતઘ્નીચક્રાદ્યાયુધભીષણકરસહસ્ર મુખદંષ્ટ્રાકરાલ વિકટાટ્ટહાસવિસ્ફારિતબ્રહ્મામણ્ડલ નાગેંદ્ર કુણ્ડલ નાગેંદ્રહાર નાગેંદ્રવલય નાગેંદ્રચર્મધર મૃત્યુંજય ત્ર્યંબક ત્રિપુરાંતક વિરૂપાક્ષ વિશ્વેશ્વર વિશ્વરૂપ વૃષભવાહન વિષભૂષણ વિશ્વતોમુખ સર્વતો રક્ષરક્ષ માં જ્વલજ્વલ મહામૃત્યુભયમપમૃત્યુભયં નાશયનાશય રોગભયમુત્સાદયોત્સાદય વિષસર્પભયં શમયશમય ચોરભયં મારયમારય મમ શત્રૂનુચ્ચા ટયોચ્ચાટય શૂલેન વિદારયવિદારય કુઠારેણ ભિંધિભિંધિ ખડ્ગેન છિંધિછિંધિ ખટ્વાંગેન વિપોથયવિપોથય મુસલેન નિષ્પેષયનિષ્પેષય બાણૈઃ સંતાડય સંતાડય રક્ષાંસિ ભીષયભીષય ભૂતાનિ વિદ્રાવયવિદ્રાવય કૂષ્માંડવેતાલમારીગણબ્રહ્મરાક્ષસાન્સંત્રાસયસંત્રાસય મમાભયં કુરુકુરુ વિત્રસ્તં મામાશ્વાસ યાશ્વાસય નરકભયાન્મામુદ્ધારયોદ્ધારય સંજીવયસંજીવય ક્ષુત્તૃડ્ભ્યાં મામાપ્યાયયાપ્યાયય દુઃખાતુરં મામાનન્દયાનંદય શિવકવચેન મામાચ્છાદયા ચ્છાદય ત્ર્યંબક સદાશિવ નમસ્તેનમસ્તેનમસ્તે ॥
॥ ઋષભ ઉવાચ ॥ ॥
ઇત્યેતત્કવચં શૈવં વરદં વ્યાહૃતં મયા ॥
સર્વબાધાપ્રશમનં રહસ્યં સર્વ દેહિનામ્

યઃ સદા ધારયેન્મર્ત્યઃ શૈવં કવચમુત્તમમ્ ॥
ન તસ્ય જાયતે ક્વાપિ ભયં શમ્ભોરનુગ્રહાત્

ક્ષીણાયુર્મૃત્યુમાપન્નો મહારોગહતોઽપિ વા ॥
સદ્યઃ સુખમવાપ્નોતિ દીર્ઘમાયુશ્ચ વિંદતિ

સર્વદારિદ્ર્યશમનં સૌમંગલ્યવિવર્ધનમ્ ॥
યો ધત્તે કવચં શૈવં સ દેવૈરપિ પૂજ્યતે

મહાપાતકસંઘાતૈર્મુચ્યતે ચોપપાતકૈઃ ॥
દેહાંતે શિવમાપ્નોતિ શિવવર્માનુભાવતઃ

ત્વમપિ શ્રદ્ધયા વત્સ શૈવં કવચ મુત્તમમ્॥
ધારયસ્વ મયા દત્તં સદ્યઃ શ્રેયો હ્યવાપ્સ્યસિ

॥ સૂત ઉવાચ ॥ ॥
ઇત્યુક્ત્વા ઋષભો યોગી તસ્મૈ પાર્થિવસૂનવે ॥
દદૌ શંખં મહારાવં ખડ્ગં ચારિનિષૂદનમ્

પુનશ્ચ ભસ્મ સંમંત્ર્ય તદંગં સર્વતોઽસ્પૃશત્ ॥
ગજાનાં ષટ્સહસ્રસ્ય દ્વિગુણં ચ બલં દદૌ

ભસ્મપ્રભાવાત્સંપ્રાપ્ય બલૈશ્વર્યધૃતિસ્મૃતીઃ ॥
સ રાજપુત્રઃ શુશુભે શરદર્ક ઇવ શ્રિયા

તમાહ પ્રાંજલિં ભૂયઃ સ યોગી રાજનંદનમ્ ॥
એષ ખડ્ગો મયા દત્તસ્તપોમંત્રાનુભાવતઃ

શિતધારમિમં ખડ્ગં યસ્મૈ દર્શયસિ સ્ફુટમ્ ॥
સ સદ્યો મ્રિયતે શત્રુઃ સાક્ષાન્મૃત્યુરપિ સ્વયમ્ ॥

અસ્ય શંખસ્ય નિહ્રાદં યે શૃણ્વંતિ તવાહિતાઃ.॥
તે મૂર્ચ્છિતાઃ પતિષ્યંતિ ન્યસ્તશસ્ત્રા વિચેતના

ખડ્ગશંખાવિમૌ દિવ્યૌ પરસૈન્યવિનાશિનૌ ॥
આત્મસૈન્યસ્વપક્ષાણાં શૌર્યતેજોવિવર્ધનૌ

એતયોશ્ચ પ્રભાવેન શૈવેન કવચેન ચ ॥
દ્વિષટ્સહસ્રનાગાનાં બલેન મહતાપિ ચ

ભસ્મધારણસામર્થ્યાચ્છત્રુસૈન્યં વિજેષ્યસિ ॥
પ્રાપ્ય સિંહાસનં પૈત્ર્યં ગોપ્તાસિ પૃથિવીમિમામ્

ઇતિ ભદ્રાયુષં સમ્યગનુશાસ્ય સમાતૃકમ્॥
તાભ્યાં સંપૂજિતઃ સોઽથ યોગી સ્વૈરગતિર્યયૌ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં તૃતીયે બ્રહ્મોત્તર ખંડે સીમંતિનીમાહાત્મ્યે ભદ્રાયૂપાખ્યાને શિવકવચકથનં નામ દ્વાદશોઽધ્યાયઃ