સ્કંદ પુરાણ · શ્લોક 2.8-7

॥ અથ શ્રીનિવાસસ્ય લક્ષ્મ્યાદિકૃતપરિણયાલંકારઃ ॥ ॥
॥ શ્રીવરાહ ઉવાચ ॥ ॥
તતો દેવાધિદેવોઽપિ લક્ષ્મીમાહૂય ભામિનીમ્ ॥
કિં કાર્યં વદ કલ્યાણિ વિવાહાર્થં સુલોચને

આજ્ઞાપયસ્વ સ્વસખી રમે કાર્યં કુરુ પ્રિયમ્ ॥
શ્રીસ્તુ કૃષ્ણવચઃ શ્રુત્વા સખીરાહૂય ચોદયત્

શ્રિયાજ્ઞપ્તા તતઃ પ્રીતિઃ સુગંધં તૈલમાદદૌ ॥
શ્રુતિઃ ક્ષૌમં સમાદાય તસ્થૌ દેવસ્ય સન્નિધૌ

ભૂષણાનિ સમાદાય સ્મૃતિરપ્યાયયૌ મુદા ॥
ધૃતિરાદર્શમાધત્ત શાન્તિર્મૃગમદં દધૌ

યક્ષકર્દમમાદાય હ્રીઃ સ્થિતા પુરતો હરેઃ ॥
કીર્તિઃ કનકપટ્ટં ચ સરત્નં મુકુટં દધૌ

છત્રં દધૌ તદેંદ્રાણી ચામરં તુ સરસ્વતી ॥
દ્વિતીયં ચામરં ગૌરી વ્યજને વિજયાજયે

આગતાસ્તાઃ સમાલોક્ય શ્રીરુત્થાયાથ સત્વરા ॥
સુગંધં તૈલમાદાય દેવમભ્યજ્ય શીર્ષતઃ

ઉદ્વર્તિતં ગંધચૂર્ણૈર્દેવાંગં પરિમૃજ્ય ચ ॥
આનીતાન્કરિભિસ્તોયકલશાન્કાંચનાઞ્છતમ્

વિયદ્ગંગાદિતીર્થેભ્યઃ કર્પૂરાદિસુવાસિતાન્॥
એકમેકં સમાદાય ત્વભ્યષિંચદ્રમા હરિમ્

સંધૂપ્ય કેશાન્ધૂપેન તાનાશ્યામાન્બબંધ ચ ॥
સુગંધેનાનુલિપ્યાંગં સ્વર્ણવર્ણેન તદ્વિભોઃ

પીતકૌશેયકં બદ્ધ્વા કટ્યાં કાંચીસમન્વિતમ્ ॥
મુકુટાદિવિભૂષાભિર્ભૂષયામાસ ચેન્દિરા

અંગુલીયકરત્નાનિ સર્વાસ્વેવાંગુલીષુ ચ ॥
આદર્શં દર્શયામાસ ધૃતિર્દેવસ્ય સન્નિધૌ

દૃષ્ટ્વાદર્શં દેવદેવો હ્યૂર્ધ્વપુંડ્રં સ્વયં દધૌ ॥
આરુહ્ય ગરુડં પશ્ચાત્સ્વયં લક્ષ્મીસમન્વિતઃ

॥
અથ બ્રહ્માદિભિસ્સાકં શ્રીનિવાસસ્ય વિયદ્રાજપુરગમનમ્ ॥ ॥
બ્રહ્મેશવજ્રિવરુણયમયક્ષેશસેવિતઃ ॥
વસિષ્ઠાદ્યૈર્મુનીંદ્રૈશ્ચ સનકાદ્યૈશ્ચ યોગિભિઃ

ભક્તૈર્ભાગવતૈર્યુક્તો નારાયણપુરીં યયૌ ॥
જગુર્ગન્ધર્વપતયો નનૃતુશ્ચાપ્સરોગણાઃ

દેવદુંદુભયો નેદુસ્તદા દેવસ્ય સન્નિધૌ ॥
જપન્તઃ સ્વસ્તિસૂક્તાનિ મુનયસ્તં સમન્વયુઃ

દેવો દેવગણૈર્યુક્તો વિષ્વક્સેનાદિપાર્ષદૈઃ ॥
સખીભિસ્સ્યંદનસ્થાભિર્બકુલાદ્યાભિરન્વિતઃ ॥
આકાશરાજસ્ય પુરમાસસાદ સ્વલંકૃતમ્

॥ અથ પદ્માવતીપરિણયઘટ્ટઃ ॥ ॥
દેવમાગતમાલોક્ય કન્યામૈરાવતસ્થિતામ્॥
પુરીં પ્રદક્ષણીકૃત્ય ગોપુરદ્વારમાગતામ્

આલોક્યાકાશરાજોઽપિ સમાનીય વધૂવરૌ ॥
બન્ધુભિઃ સહિતસ્તસ્થૌ દેવમાલોક્ય કેશવમ્

વિષ્ણુર્માલાં સ્વકંઠસ્થાં હસ્તેનાદાય સસ્મિતઃ ॥
કમલાયાઃ સ્કન્ધદેશે મુમોચ સુમનશ્ચિતામ્

આદાય મલ્લિકામાલા સાઽસ્ય કંઠે સમર્પયત્ ॥
એવં ત્રિવારં તૌ કૃત્વા વાહનાદવરુહ્ય ચ

સ્થિત્વા પીઠે ક્ષણં પશ્ચાદ્ગૃહં વિવિશતુઃ શુભમ્ ॥
બ્રહ્માદિદેવયૂથૈશ્ચ સહિતૌ ભૂમિજાહરી ઓ। ૨૨ ॥
માંગલ્યસૂત્રબંધાદિ સાંકુરાર્પણમબ્જજઃ ॥
વૈવાહિકં કારયિત્વા લાજહોમાન્તમેવ ચ

વ્રતાદેશં સમાજ્ઞાય શયિતૌ કમલાહરી ॥
ચતુર્થે દિવસે સર્વં સમાપય્ય ચતુર્મુખઃ

અનુજ્ઞાપ્ય વિયદ્રાજમારોપ્ય ગરુડે હરિમ્ ॥
દેવીભ્યાં સહિતં દેવં દેવૈર્ગન્તું પ્રચક્રમે

દિવ્યદુન્દુભિર્નિર્ઘોષૈઃ સંપ્રાપ્ય વૃષભાચલમ્ ॥
તુષ્ટુવુર્દેવદેવેશં બ્રહ્માદ્યા દેવતાગણાઃ

શુકાદયો મુનિગણાસ્તુષ્ટુવુઃ પુરુષોત્તમમ્ ॥
સ્તૂયમાનોઽથ દેવોઽપિ વિવેશ મણિમંડપમ્

રમાધરણિજાભ્યાં ચ તત્ર સિંહાસનં યયૌ

॥ અથ વધૂવરયોર્વિયદ્રાજવિતીર્ણપ્રાભૃતાદિકમ્ ॥ ॥
આકાશરાજોઽપિ તદા મહેન્દ્રાદિસુરૈઃ સહ ॥
પુત્રીવિષ્ણ્વોઃ પ્રિયાર્થં તુ પ્રાભૃતં કતુમુદ્યતઃ

સૌવર્ણેષુ કટાહેષુ તંડુલાઞ્છાલિસંભવાન્॥
મુદ્ગપાત્રાણ્યનેકાનિ ઘૃતકુમ્ભશતાનિ ચ

પયોઘટસહસ્રાણિ દધિભાણ્ડાન્યનેકશઃ ॥
દિવ્યાનિ ચૂતકદલીનારિકેલફલાનિ ચ

ધાત્રીફલાનિ કૂષ્માડરાજરંભાફલાનિ ચ ॥
પનસાન્માતુલુંગાંશ્ચ શર્કરાપૂરિતાન્ઘટાન્

સુવર્ણમણિમુક્તાશ્ચ ક્ષૌમકોટ્યંબરાણિ ચ ॥
દાસીદાસસહસ્રાણિ કોટિશો ગાસ્તથૈવ ચ

હંસેન્દુશુક્લવર્ણાનાં હયાનામયુતં દદૌ ॥
તુંગાનાં નિત્યમત્તાનાં ગજાનામધિકં શતાત્

અંતઃપુરચરા નારીર્નૃત્તગીતવિશારદાઃ ॥
દદૌ ચતુઃસહસ્રાણિ શ્રીનિવાસાય વિષ્ણવે ॥
દત્ત્વા ચૈતાનિ સર્વાણિ તસ્થૌ દેવપુરો વિભુઃ

॥ અથ શ્રીનિવાસકૃપયા વિયદ્રાજસ્ય ભક્તિરૂપવરપ્રાપ્તિઃ ॥ ॥
દૃષ્ટ્વા દેવોઽપિ તત્સર્વં દેવીભ્યાં સહિતો હરિઃ

સુપ્રીતઃ પ્રાહ રાજાનં શ્વશુરં વેંકટેશ્વરઃ ॥
વરં વૃણીષ્વ હે રાજન્ગુરો મત્તો યદીચ્છસિ

ઇતિ શ્રીશવચઃ શ્રુત્વા વિયદ્રાજોઽવદદ્વિભુમ્ ॥
ત્વત્સેવૈવેહ દેવૈવં ભૂયાદવ્યભિચારિણી

મનસ્ત્વત્પાદકમલે ત્વયિ ભક્તિર્મમાસ્તુ વૈ

॥ શ્રીભગવાનુવાચ ॥ ॥
ત્વયા યદુક્તં રાજેન્દ્ર સર્વમેતદ્ભવિષ્યતિ ॥
ઇતિ દત્ત્વા વરં તસ્મૈ સંમાન્યૈવ યથોચિતમ્

॥ અથ વિવાહાર્થમાગતાનાં બ્રહ્માદીનાં સ્વાવાસગમનમ્ ॥ ॥
બ્રહ્મેશાદિસુરાન્સર્વાન્સમભ્યર્ચ્ય યથોચિતમ્ ॥
સ્વર્લોકગમનાયૈવમનુમેને મુદા હરિઃ ॥
ગતેષુ તેષુ સર્વેષુ શ્રિયા ભૂમિજયા યુતઃ

વિહરન્સ યથાપૂર્વં સ્વામિપુષ્કરિણીતટે ॥
આસ્તે દિવ્યાલયે દેવોપ્યર્ચ્યમાનો ગુહેન વૈ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં દ્વિતીયે વૈષ્ણવખણ્ડે શ્રીવેંકટાચલમાહાત્મ્યે ધરણીવરાહસંવાદે બ્રહ્માદિભિઃ સાકં શ્રીનિવાસસ્ય વિયદ્રાજપુરગમન કમલાલયાપરિણયાદિવર્ણનંનામાષ્ટમોઽધ્યાયઃ