સ્કંદ પુરાણ · શ્લોક 2.2-8

॥ અથ શ્રીવરાહમંત્રારાધનવિધિઃ ॥
॥ શ્રીસૂત ઉવાચ ॥ ॥
શૃણુધ્વં મુનયઃ સર્વે કથાં પુણ્યાં પુરાતનીમ્ ॥
વૈવસ્વતેંઽતરે પૂર્વં કૃતે પુણ્યતમે યુગે

નારાયણાદ્રૌ દેવેશં નિવસન્તં ક્ષમાપતિમ્ ॥
વરાહરૂપિણં દેવં ધરણી સખિભિર્વૃતા

પ્રણમ્ય પરિપપ્રચ્છ રક્તપદ્માયતેક્ષણમ્

॥ ધરણ્યુવાચ ॥ ॥
આરાધ્યઃ કેન મંત્રેણ ભવાન્પ્રીતો ભવિષ્યતિ ॥
તં મે વદ ત્વં દેવેશ યઃ પ્રિયો ભવતઃ સદા

જપતાં સર્વસંપત્તિકારકં પુત્રપૌત્રદમ્ ॥
સાર્વભૌમત્વદં ચૈવ કામિનાં કામદં સદા ॥

અન્તે યસ્ત્વત્પદપ્રાપ્તિં દદાતિ નિયમાત્મનામ્ ॥
એવંભૂતં વદ પ્રીત્યા મયિ વારાહ માનદ

॥ શ્રીસૂત ઉવાચ ॥ ॥
ઇતિ પૃષ્ટસ્તયા ભૂમ્યા પ્રાહ પ્રીતિસ્મિતાનનઃ

॥ શ્રીવરાહ ઉવાચ ॥ ॥
શૃણુ દેવિ પરં ગુહ્યં સદ્યઃ સંપત્તિકારકમ્ ॥
ભૂમિદં પુત્રદં ગોપ્યમપ્રકાશ્યં કદાચન

કિં ચ શુશ્રૂષવે વાચ્યં ભક્તાય નિયતાત્મને

ૐ નમઃ શ્રીવરાહાય ધરણ્યુદ્ધરણાય ચ ॥
વહ્નિજાયાસમાયુક્તઃ સદા જપ્યો મુમુક્ષુભિઃ

અયં મંત્રો ધરાદેવિ સર્વસિદ્ધિપ્રદાયકઃ ॥
ઋષિઃ સંકર્ષણઃ પ્રોક્તો દેવતા ત્વહમેવ હિ

છન્દઃ પંક્તિઃ સમાખ્યાતા શ્રીબીજં સમુદાહૃતમ્ ॥
ચતુર્લક્ષં જપેન્મંત્રં સદ્ગુરોર્લબ્ધતન્મનુઃ

જુહુયાત્પાયસાન્નં વૈ ક્ષૌદ્રસર્પિઃસમન્વિતમ્ ॥
અથ ધ્યાનં પ્રવક્ષ્યામિ મનઃશુદ્ધિપ્રદાયકમ્

શુદ્ધિસ્ફટિકશૈલાભં રક્તપદ્મદલેક્ષણમ્ ॥
વરાહવદનં સૌમ્યં ચતુર્બાહું કિરીટિનમ્

શ્રીવત્સવક્ષસં ચક્રશંખાભયકરાંબુજમ્ ॥
વામોરુસ્થિતયા યુક્તં ત્વયા માં સાગરાંબરે

રક્તપીતાંબરધરં રક્તાભરણભૂષિતમ્ ॥
શ્રી કૂર્મપૃષ્ઠમધ્યસ્થશેષમૂર્ત્યબ્જસંસ્થિતમ્

એવં ધ્યાત્વા જપેન્મંત્રં સદા ચાષ્ટોત્તરં શતમ્ ॥
સર્વાન્કામાનવાપ્નોતિ મોક્ષં ચાન્તે વ્રજેદ્ધ્રુવમ્

પ્રોક્તં મયા તે ધરણિ યત્પૃષ્ટોઽહં ત્વયાઽમલે ॥
અતઃ કિં તે વ્યવસિતં બ્રૂહિ તદ્વિમલાનને

॥ ॥અથ શ્રીવરાહમંત્રેણ ધર્માદીનાં સ્વાભીષ્ટસિદ્ધિવર્ણનમ્ ॥
॥ શ્રીસૂત ઉવાચ ॥ ॥
એતચ્છ્રુત્વા તતો ભૂમિઃ પપ્રચ્છ પુનરેવ તમ્ ॥
કેનૈવાનુષ્ઠિતં દેવ પુરા પ્રાપ્તં ફલં ચ કિમ્

ઇતિ પૃષ્ટઃ પુનર્દેવઃ શ્રીવરાહોઽબ્રવીદિદમ્ ॥
પુરા કૃતયુગે દેવિ ધર્મો નામ મનુર્મહાન્

બ્રહ્મણોઽમું મનું લબ્ધ્વા જપ્ત્વાસ્મિન્ધરણીધરે ॥
માં ચ દૃષ્ટ્વા વરં લબ્ધ્વા પ્રાપ્તોઽભૂન્મામકં પદમ્

ઇંદ્રો દુર્વાસસઃ શાપાત્પુરા ભ્રષ્ટસ્ત્રિવિષ્ટપાત્ ॥
અનેનેષ્ટ્વાઽત્ર માં દેવિ પુનઃ પ્રાપ્તસ્ત્રિવિષ્ટપમ્

અન્યેઽપિ મુનયો ભૂમે જપ્ત્વા પ્રાપ્તાઃ પરાં ગતિમ્ ॥
અનંતઃ પન્નગાધીશો હ્યમું લબ્ધ્વાથ કશ્યપાત્

શ્વેતદ્વીપે જપિત્વૈવ બભૂવ ધરણીધરઃ ॥
તસ્માજ્જપ્યઃ સદા ચેહ મનુષ્યૈશ્ચ ધરાર્થિભિઃ

॥ શ્રીસૂત ઉવાચ ॥ ॥
એતચ્છ્રુત્વાથ સુપ્રીતા પુનઃ પ્રાહ ધરાધરમ્

॥ ધરણ્યુવાચ ॥ ॥
વેંકટાખ્યે મહાશૈલે શ્રીનિવાસો જગત્પતિઃ ॥
કદા હ્યાયાતિ દેવેશઃ શ્રીભૂમિસહિતોઽમલઃ

કથં કલ્પાન્તરસ્થાયી ભવિષ્યતિ જનાર્દનઃ ॥
એતદ્બ્રૂહિ વરાહાત્મન્મહત્કૌતહલં મમ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં દ્વિતીયે વૈષ્ણવખણ્ડે શ્રીવેંકટાચલમાહાત્મ્યે ધરણીવરાહસંવાદે શ્રીવરાહમંત્રારાધનવિધ્યાદિવર્ણનંનામ દ્વિતીયોઽધ્યાયઃ