સ્કંદ પુરાણ · શ્લોક 2.19-3

॥ સ્કન્દ ઉવાચ ॥
તતઃ સ દદૃશે દેવૌ પુરાણાવૃષિસત્તમૌ ॥
તપશ્ચરન્તૌ સુમહદાત્મનિષ્ઠૌ મહાવ્રતૌ

તેજસાપ્યધિકૌ સૂર્યાત્સર્વલોકવિરોચનાત્ ॥
શ્રીવત્સલક્ષણૌ પૂજ્યૌ જટામણ્ડલધારિણૌ

પદ્મચિહ્નભુજૌ તૌ ચ પાદયોશ્ચક્રલક્ષણૌ॥
વ્યૂઢોરસ્કૌ દીર્ઘભુજૌ સિતસૂક્ષ્મઘનાંશુકૌ

સ્વાસ્યૌ પૃથુલલાટૌ ચ સુભ્રુવૌ શુભનાસિકૌ ॥
શુભલક્ષણસંપન્નૌ દિવ્યમૂર્ત્તી ઘનપ્રભૌ

વિનયેનાન્તિકં પ્રાપ્ય તયોઃ કૃત્વા પ્રદક્ષિણામ્ ॥
ભક્ત્યા પ્રણમ્ય સાષ્ટાઙ્ગં તસ્થૌ પ્રાઞ્જલિરગ્રતઃ

તતસ્તૌ તપસાં વાસૌ યશસાં તેજસામપિ ॥
ઋષી પૌર્વાહ્ણિકસ્યાન્તે વિધેર્મૌનં વિહાય ચ

પ્રીત્યા નારદમવ્યગ્રૌ પાદ્યાર્ઘ્યાભ્યાં સમાર્ચતામ્ ॥
પીઠયોરુપવિષ્ટૌ તૌ કૌશયોર્નારદશ્ચ સઃ॥

તેષુ તત્રોપવિષ્ટેષુ સ દેશોભિવ્યરાજત ॥
આજ્યાહુતિમહાજ્વાલૈર્યજ્ઞવાટોગ્નિભિર્યથા

અથ નારાયણસ્તત્ર નારદં વાક્યમબ્રવીત્ ॥
સુખોપવિષ્ટં વિશ્રાન્તં કૃતાતિથ્યં સુસત્કૃતમ્

શ્રીનારાયણ ઉવાચ ॥
અપિ બ્રહ્મન્સ ભગવાન્પરમાત્મા સનાતનઃ ॥
બ્રહ્મધામ્નિ ત્વયા દૃષ્ટ આવયો કારણં પરમ્

નારદ ઉવાચ ॥
ભગવંસ્ત્વત્પ્રસાદેન તમહં પરમેશ્વરમ્ ॥
વાસુદેવં સમાલોકે સ્થિતમક્ષરધામનિ

ઇહ ચૈવાગતસ્તેન વિસૃષ્ટો વાં નિષેવિતુમ્ ॥
આસિષ્યે તત્પરો ભૂત્વા યુવાભ્યાં સહ નિત્યશઃ

શ્રીનારાયણ ઉવાચ ॥
ધન્યોસ્યનુગૃહીતોસિ યત્તે દૃષ્ટઃ સ્વયં પ્રભુઃ ॥
નહિ તં દૃષ્ટવાન્બ્રહ્મન્કશ્ચિદ્દેવોપિ વા ઋષિઃ

ભક્ત્યૈકાન્તિકયા તસ્ય પ્રાપ્તા અક્ષરસામ્યતામ્॥
યે હિ ભક્તાસ્ત એવૈનં પશ્યન્ત્યખિલકારણમ્

સ દિવ્યમૂર્ત્તિર્ભગવાન્દુર્દ્દર્શઃ પુરુષોત્તમઃ ॥
નારદૈતદ્ધિ મે સત્યં વચનં સમુદાહૃતમ્

નાન્યો ભક્તાત્પ્રિયતરો લોકે તસ્યાસ્તિ કશ્ચન ॥
તતઃ સ્વયં દર્શિતવાંસ્તવાત્માનં દ્વિજોત્તમ

તેજઃપુઞ્જાભિરુદ્ધાંગો ગુણાતીતાદ્ભુતાકૃતિઃ ॥
અખણ્ડાનન્દરૂપશ્ચ સદા શુદ્ધોઽચ્યુતોસ્તિ સઃ

રૂપવર્ણવયોવસ્થાઃ પ્રાકૃતા નૈવ તસ્ય હિ ॥
સર્વં તસ્યાસ્તિ તદ્દિવ્યં સર્વોપકરણાનિ ચ ॥
એકાન્તિકાનાં ભક્તાનાં સ એવ પરમા ગતિઃ

આત્મબ્રહ્મૈક્યસંપન્નૈર્વિનિવૃત્તગુણૈરપિ ॥
ક્રિયતે વાસુદેવસ્ય ભક્તિરિત્થંગુણો હિ સઃ

માહાત્મ્યમસ્ય કો વક્તું શક્નુયાત્પરમાત્મનઃ ॥
અચિન્ત્યાનન્તશક્તીનામધિપસ્ય મહામુને

આત્માત્મા ચાક્ષરાત્મા ચ હ્યેષ આકાશનિર્મલઃ ॥
દિવ્યદૃગીક્ષ્યઃ સન્માત્રઃ પુરુષો વસુદેવજઃ

સમસ્તકલ્યાણગુણો નિર્ગુણશ્ચેશ્વરેશ્વરઃ ॥
પરયા વિદ્યયા વેદ્ય ઉપાસ્યો બ્રહ્મવિત્પ્રભુઃ

દિવ્યમૂર્ત્તિં તમીશાનં તપસૈકાન્તિકેન ચ ॥
યઃ પ્રીણયતિ ધર્મેણ સ ધન્યતમ ઉચ્યતે

તસ્માત્ત્વમપિ દેવર્ષે ધર્મેણૈકાન્તિકેન તમ્ ॥
આરાધયન્નિહૈવાંગ કંચિત્કાલં તપઃ કુરુ

તપસૈવાઽતિશુદ્ધાત્મા માહાત્મ્યં તસ્ય સત્પતેઃ ॥
યથાવજ્જ્ઞાસ્યતિ ભવાન્પ્રોચ્યમાનં મયાઽખિલમ્

સર્વાર્થસાધનં વિદ્ધિ તપસ્તદ્ધૃદયં મુને ॥
નાતપ્તભૂરિતપસા સ વશીક્રિયતે પ્રભુઃ

॥ સ્કન્દ ઉવાચ ॥
એવમુક્તો ભગવતા નરનારાયણેન સઃ ॥
પ્રીતસ્તપઃ કર્ત્તુમિચ્છઁસ્તમુવાચ મહામતિઃ

ઇતિ શ્રીસ્કન્દે મહાપુરાણ એકાશીતિસાહસ્ર્યાં સંહિતાયાં દ્વિતીયે વૈષ્ણવખણ્ડે શ્રીવાસુઽદેવમાહાત્મ્યે નારદનરનારાયણસમાગમો નામૈકોનવિંશોઽધ્યાયઃ