શિવોપનિષદ્ · અધ્યાય 3

અથાન્યૈર્ અલ્પવિત્તૈશ્ ચ નૃપૈશ્ ચ શિવભાવિતૈઃ
શક્તિતઃ સ્વાશ્રમે કાર્યં શિવશાન્તિગૃહદ્વયમ્ ॥

ગૃહસ્યેશાનદિગ્ભાગે કાર્યમ્ ઉત્તરતો ઽપિ વા
ખાત્વા ભૂમિં સમુદ્ધૃત્ય શલ્યાન્ આકોટ્ય યત્નતઃ ॥

શિવદેવગૃહં કાર્યમ્ અષ્ટહસ્તપ્રમાણતઃ
દક્ષિણોત્તરદિગ્ભાગે કિંચિચ્ દીર્ઘં પ્રકલ્પયેત્ ॥

હસ્તમાત્રપ્રમાણં ચ દૃઢપટ્ટચતુષ્ટયમ્
ચતુષ્કોણેષુ સંયોજ્યમ્ અર્ઘ્યપાત્રાદિસંશ્રયમ્ ॥

ગર્ભમધ્યે પ્રકુર્વીત શિવવેદિં સુશોભનામ્
ઉદગર્વાક્ ચ્છ્રિતાં(?) કિંચિચ્ ચતુઃશીર્ષકસંયુતામ્ ॥

ત્રિહસ્તાયામ્ અવિસ્તારામ્ ષોડશાઙ્ગુલમ્ ઉચ્છ્રિતામ્
તચ્છીર્ષાણીવ હસ્તાર્ધમ્ આયામાદ્ વિસ્તરેણ ચ ॥

શિવસ્થણ્ડિલમ્ ઇત્ય્ એતચ્ ચતુર્હસ્તં સમં શિરઃ
મૂર્તિનૈવેદ્યદીપાનાં વિન્યાસાર્થં પ્રકલ્પયેત્ ॥

શૈવલિઙ્ગેન કાર્યં સ્યાત્ કાર્યં મણિજપાર્થિવૈઃ
સ્થણ્ડિલાર્ધે ચ કુર્વન્તિ વેદિમ્ અન્યાં સવર્તુલામ્ ॥

ષોડશાઙ્ગુલમ્ ઉત્સેધાં વિસ્તીર્ણાં દ્વિગુણેન ચ
ગૃહે ન સ્થાપયેચ્ છૈલં લિઙ્ગં મણિજમ્ અર્ચયેત્ ॥

ત્રિસંધ્યં પાર્થિવં વાપિ કુર્યાદ્ અન્યદ્ દિનેદિને
સર્વેષામ્ એવ વર્ણાનાં સ્ફાટિકં સર્વકામદમ્ ॥

સર્વદોષવિનિર્મુક્તમ્ અન્યથા દોષમ્ આવહેત્
આયુષ્માન્ બલવાઞ્ શ્રીમાન્ પુત્રવાન્ ધનવાન્ સુખી ॥

વરમ્ ઇષ્ટં ચ લભતે લિઙ્ગં પાર્થિવમ્ અર્ચયન્
તસ્માદ્ ધિ પાર્થિવં લિઙ્ગં જ્ઞેયં સર્વાર્થસાધકમ્ ॥

નિર્દોષં સુલભં ચૈવ પૂજયેત્ સતતં બુધઃ
યથા યથા મહાલિઙ્ગં પૂજા શ્રદ્ધા યથા યથા ॥

તથા તથા મહત્ પુણ્યં વિજ્ઞેયમ્ અનુરૂપતઃ
પ્રતિમાલિઙ્ગવેદીષુ યાવન્તઃ પરમાણવઃ
તાવત્કલ્પાન્ મહાભોગસ્ તત્કર્તાસ્તે શિવે પુરે ॥