શિવપુરાણ · અધ્યાય 7.1.16

ઇતિ શ્રીશિવમહાપુરાણે સપ્તમ્યાં વાયવીયસંહિતાયાં પૂ-- શિવશિવાસ્તુતિવર્ણનં નામ પઞ્ચદશો ઽધ્યાયઃ
છપ્તેર્ 16
વાયુરુવાચ
અથ દેવો મહાદેવો મહાજલદનાદયા
વાચા મધુરગંભીરશિવદશ્લક્ષ્ણવર્ણયા

અર્થસંપન્નપદયા રાજલક્ષણયુક્તયા
અશેષવિષયારંભરક્ષાવિમલદક્ષયા

મનોહરતરોદારમધુરસ્મિતપૂર્વયા
સંબભાષે સુસંપીતો વિશ્વકર્માણમીશ્વરઃ

ઈશ્વર ઉવાચ
વત્સ વત્સ મહાભાગ મમ પુત્ર પિતામહ
જ્ઞાતમેવ મયા સર્વં તવ વાક્યસ્ય ગૌરવમ્

પ્રજાનામેવ બૃદ્ધ્યર્થં તપસ્તપ્તં ત્વયાધુના
તપસા ઽનેન તુષ્ટોસ્મિ દદામિ ચ તવેપ્સિતમ્

ઇત્યુક્ત્વા પરમોદારં સ્વભાવમધુરં વચઃ
સસર્જ વપુષો ભાગાદ્દેવીં દેવવરો હરઃ

યામાહુર્બ્રહ્મવિદ્વાંસો દેવીં દિવ્યગુણાન્વિતામ્
પરસ્ય પરમાં શક્તિં ભવસ્ય પરમાત્મનઃ

518અ
યસ્યાં ન ખલુ વિદ્યંતે જન્મ મૃત્યુજરાદયઃ
યા ભવાની ભવસ્યાંગાત્સમાવિરભવત્કિલ

યસ્યા વાચો નિવર્તન્તે મનસા ચેંદ્રિયૈઃ સહ
સા ભર્તુર્વપુષો ભાગાજ્જાતેવ સમદૃશ્યત

યા સા જગદિદં કૃત્સ્નં મહિમ્ના વ્યાપ્ય તિષ્ઠતિ
શરીરિણીવ સ દેવી વિચિત્રં સમલક્ષ્યત

સર્વં જગદિદં ચૈષા સંમોહયતિ માયયા
ઈશ્વરાત્સૈવ જાતાભૂદજાતા પરમાર્થતઃ

ન યસ્યા પરમો ભાવઃ સુરાણામપિ ગોચરઃ
વિશ્વામરેશ્વરી ચૈવ વિભક્તા ભર્તુરંગતઃ

તાં દૃષ્ટ્વા પરમેશાનીં સર્વલોકમહેશ્વરીમ્
સર્વજ્ઞાં સર્વગાં સૂક્ષ્માં સદસદ્વ્યક્તિવર્જિતામ્

પરમાં નિખિલં ભાસા ભાસયન્તીમિદં જગત્
પ્રણિપત્ય મહાદેવીં પ્રાર્થયામાસ વૈ વિરાટ્

બ્રહ્મોવાચ
દેવિ દેવેન સૃષ્ટો ઽહમાદૌ સર્વજગન્મયિ
પ્રજાસર્ગે નિયુક્તશ્ચ સૃજામિ સકલં જગત્

મનસા નિર્મિતાઃ સર્વે દેવિ દેવાદયો મયા
ન વૃદ્ધિમુપગચ્છન્તિ સૃજ્યમાનાઃ પુનઃ પુનઃ

મિથુનપ્રભવામેવ કૃત્વા સૃષ્ટિમતઃ પરમ્
સંવર્ધયિતુમિચ્છામિ સર્વા એવ મમ પ્રજાઃ

ન નિર્ગતં પુરા ત્વત્તો નારીણાં કુલમવ્યયમ્
તેન નારીકુલં સ્રષ્ટું શક્તિર્મમ ન વિદ્યતે

સર્વાસામેવ શક્તીનાં ત્વત્તઃ ખલુ સમુદ્ભવઃ
તસ્માત્સર્વત્ર સર્વેષાં સર્વશક્તિપ્રદાયિનીમ્

ત્વામેવ વરદાં માયાં પ્રાર્થયામિ સુરેશ્વરીમ્
ચરાચરવિવૃદ્ધ્યર્થમંશેનૈકેન સર્વગે

દક્ષસ્ય મમ પુત્રસ્ય પુત્રી ભવ ભવાર્દિનિ
એવં સા યાચિતા દેવી બ્રહ્મણા બ્રહ્મયોનિના

શક્તિમેકાં ભ્રુવોર્મધ્યાત્સસર્જાત્મસમપ્રભામ્
તામાહ પ્રહસન્પ્રેક્ષ્ય દેવદેવવરો હરઃ

બ્રહ્માણં તપસારાધ્ય કુરુ તસ્ય યથેપ્સિતમ્
તામાજ્ઞાં પરમેશસ્ય શિરસા પ્રતિગૃહ્ય સા

બ્રહ્મણો વચનાદ્દેવી દક્ષસ્ય દુહિતાભવત્
દત્ત્વૈવમતુલાં શક્તિં બ્રહ્મણે બ્રહ્મરૂપિણીમ્

વિવેશ દેહં દેવસ્ય દેવશ્ચાંતરધીયત
તદા પ્રભૃતિ લોકે ઽસ્મિન્ સ્ત્રિયાં ભોગઃ પ્રતિષ્ઠિતઃ

પ્રજાસૃષ્ટિશ્ચ વિપ્રેંદ્રા મૈથુનેન પ્રવર્તતે
બ્રહ્માપિ પ્રાપ સાનન્દં સન્તોષં મુનિપુંગવાઃ

એતદ્વસ્સર્વમાખ્યાતં દેવ્યાઃ શક્તિસમુદ્ભવમ્
પુણ્યવૃદ્ધિકરં શ્રાવ્યં ભૂતસર્ગાનુપંગતઃ

ય ઇદં કીર્તયેન્નિત્યં દેવ્યાઃ શક્તિસમુદ્ભવમ્
પુણ્યં સર્વમવાપ્નોતિ પુત્રાંશ્ચ લભતે શુભાન્