શિર-ઉપનિષદ્ · શ્લોક 44-45

વ્યાપકો હિ ભગવાન્ રુદ્રો ભોગાયમાનો યદા શેતે રુદ્રસ્ તદા સંહાર્ય્યતે પ્રજાઃ ।
ઉચ્છ્વસિતે તમો ભવતિ તમસ આપો ઽપ્સ્વ્ અઙ્ગુલ્યા મથિતે મથિતં શિશિરે શિશિરં મથ્યમાનં ફેનં ભવતિ ફેનાદ્ અણ્ડં ભવત્ય્ અણ્ડાદ્ બ્રહ્મા ભવતિ બ્રહ્મણો વાયુઃ વાયોર્ ઓંકારઃ ઓંકારાત્ સાવિત્રી સાવિત્ર્યા ગાયત્રી ગાયત્ર્યા લોકા ભવન્તિ ।
અર્ચયન્તિ તપઃ સત્યં મધુ ક્ષરન્તિ યદ્ ધ્રુવમ્ ।
એતદ્ધિ પરમં તપઃ ।
આપો જ્યોતી રસો ઽમૃતં બ્રહ્મ ભૂર્ ભુવઃ સ્વર્ ઓં નમ ઇતિ ॥

ય ઇદમ્ અથર્વશિરો બ્રાહ્મણો ઽધીતે અશ્રોત્રિયઃ શ્રોત્રિયો ભવતિ અનુપનીત ઉપનીતો ભવતિ સો ઽગ્નિપૂતો ભવતિ સ વાયુપૂતો ભવતિ સ સૂર્યપૂતો ભવતિ સ સોમપૂતો ભવતિ સ સત્યપૂતો ભવતિ સ સર્વૈર્ દેવૈર્ જ્ઞાતો ભવતિ સ સર્વૈર્ વેદૈર્ અનુધ્યાતો ભવતિ સ સર્વેષુ તીર્થેષુ સ્નાતો ભવતિ તેન સર્વૈઃ ક્રતુભિર્ ઇષ્ટં ભવતિ ગાયત્ર્યાઃ ષષ્ટિસહસ્રાણિ જપ્તાનિ ભવન્તિ ઇતિહાસપુરાણાનાં રુદ્રાણાં શતસહસ્રાણિ જપ્તાનિ ભવન્તિ ।
પ્રણવાનામ્ અયુતં જપ્તં ભવતિ ।
સ ચક્ષુષઃ પઙ્ક્તિં પુનાતિ ।
આ સપ્તમાત્ પુરુષયુગાન્ પુનાતીત્ય્ આહ ભગવાન્ અથર્વશિરઃ સકૃજ્ જપ્ત્વૈવ શુચિઃ સ પૂતઃ કર્મણ્યો ભવતિ ।
દ્વિતીયં જપ્ત્વા ગણાધિપત્યમ્ આપ્નોતિ ।
તૃતીયં જપ્ત્વૈવમ્ એવાનુપ્રવિશત્ય્ ઓં સત્યમ્ ઓં સત્યમ્ ઓં સત્યમ્ ।
ઇત્ય્ અથર્વવેદે શિરૌપનિષત્ સમાપ્તા ॥