શિવ પુરાણ · શ્લોક 7.21-2

વાયુરુવાચ
તતસ્ત્રિદશમુખ્યાસ્તે વિષ્ણુશક્રપુરોગમાઃ

સર્વે ભયપરિત્રસ્તાદુદ્રુવુર્ભયવિહ્વલાઃ

નિજૈરદૂષિતૈરંગૈર્દૃષ્ટ્વા દેવાનુપદ્રુતાન્

દંડ્યાનદંડિતાન્મત્વા ચુકોપ ગણપુંગવઃ

તતસ્ત્રિશૂલમાદાય શર્વશક્તિનિબર્હણમ્

ઊર્ધ્વદૃષ્ટિર્મહાબાહુર્મુખાજ્જ્વાલાઃ સમુત્સૃજન્

અમરાનપિ દુદ્રાવ દ્વિરદાનિવ કેસરી

તાનભિદ્રવતસ્તસ્ય ગમનં સુમનોહરમ્

વારાણસ્યેવ મત્તસ્ય જગામ પ્રેક્ષણીયતામ્

તતસ્તત્ક્ષોભયામાસ મહત્સુરબલં બલી

મહાસરોવરં યદ્વન્મત્તો વારણયૂથપઃ

વિકુર્વન્બહુધાવર્ણાન્નીલપાંડુરલોહિતાન્

વિભ્રદ્વ્યાઘ્રાજિનં વાસો હેમપ્રવરતારકમ્

છિન્દન્ભિન્દન્નુદ ૧ લિન્દન્દારયન્પ્રમથન્નપિ

વ્યચરદ્દેવસંઘેષુ ભદ્રો ઽગ્નિરિવ કક્ષગઃ

તત્ર તત્ર મહાવેગાચ્ચરંતં શૂલધારિણમ્

તમેકં ત્રિદશાઃ સર્વે સહસ્રમિવ મેનિરે

ભદ્રકાલી ચ સંક્રુદ્ધા યુદ્ધવૃદ્ધમદોદ્ધતા

મુક્તજ્વાલેન શૂલેન નિર્બિભેદ રણે સુરાન્

સ તયા રુરુચે ભદ્રો રુદ્રકોપસમુદ્ભવઃ

પ્રભયેવ યુગાંતાગ્નિશ્ચલયા ધૂમધૂમ્રયા

ભદ્રકાલી તદાયુદ્ધે વિદ્રુતત્રિદશાબભૌ

કલ્પે શેષાનલજ્વાલાદગ્ધાવિશ્વજગદ્યથા

તદા સવાજિનં સૂર્યં રુદ્રાન્રુદ્રગણાગ્રણીઃ

ભદ્રો મૂર્ધ્નિ જઘાનાશુ વામપાદેન લીલયા

અસિભિઃ પાવકં ભદ્રઃ પટ્ટિશૈસ્તુ યમં યમી

રુદ્રાન્દૃઢેન શૂલેન મુદ્ગરૈર્વરુણં દૃઢૈઃ

પરિઘૈર્નિરૃતિં વાયું ટંકૈષ્ટંકધરઃ સ્વયમ્

નિર્બિભેદ રણે વીરો લીલયૈવ ગણેશ્વરઃ

સર્વાન્દેવગણાન્સદ્યો મુનીઞ્છંભોર્વિરોધિનઃ

તતો દેવઃ સરસ્વત્યા નાસિકાગ્રં સુશોભનમ્

ચિચ્છેદ કરજાગ્રેણ દેવમાતુસ્તથૈવ ચ

ચિચ્છેદ ચ કુઠારેણ બાહુદંડં વિભાવસોઃ

અગ્રતો દ્વ્યંગુલાં જિહ્વાં માતુર્દેવ્યા લુલાવ ચ

સ્વાહાદેવ્યાસ્તથા દેવો દક્ષિણં નાસિકાપુટમ્

ચકર્ત કરજાગ્રેણ વામં ચ સ્તનચૂચુકમ્

ભગસ્ય વિપુલે નેત્રે શતપત્રસમપ્રભે

પ્રસહ્યોત્પાટયામાસ ભદ્રઃ પરમવેગવાન્

પૂષ્ણો દશનરેખાં ચ દીપ્તાં મુક્તાવલીમિવ

જઘાન ધનુષઃ કોટ્યા સ તેનાસ્પષ્ટવાગભૂત્

તતશ્ચંદ્રમસં દેવઃ પાદાંગુષ્ઠેન લીલયા

ક્ષણં કૃમિવદાક્રમ્ય ઘર્ષયામાસ ભૂતલે

શિરશ્ચિચ્છેદ દક્ષસ્ય ભદ્રઃ પરમકોપતઃ

ક્રોશંત્યામેવ વૈરિણ્યાં ભદ્રકાલ્યૈ દદૌ ચ તત્

તત્પ્રહૃષ્ટા સમાદાય શિરસ્તાલફલોપમમ્

સા દેવી કંડુકક્રીડાં ચકાર સમરાંગણે

તતો દક્ષસ્ય યજ્ઞસ્ત્રી કુશીલા ભર્તૃભિર્યથા

પાદાભ્યાં ચૈવ હસ્તાભ્યાં હન્યતે સ્મ ગણેશ્વરૈઃ

અરિષ્ટનેમિને સોમં ધર્મં ચૈવ પ્રજાપતિમ્

બહુપુત્રં ચાંગિરસં કૃશાશ્વં કશ્યપં તથા

ગલે પ્રગૃહ્ય બલિનો ગણપાઃ સિંહવિક્રમાઃ

ભર્ત્સયંતો ભૃશં વાગ્ભિર્નિર્જઘ્નુર્મૂર્ધ્નિ મુષ્ટિભિઃ

ધર્ષિતા ભૂતવેતાલૈર્દારાસ્સુતપરિગ્રહાઃ

યથા કલિયુગે જારૈર્બલેન કુલયોષિતઃ

તચ્ચ વિધ્વસ્તકલશં ભગ્નયૂપં ગતોત્સવમ્

પ્રદીપિતમહાશાલં પ્રભિન્નદ્વારતોરણમ્

ઉત્પાટિતસુરાનીકં હન્યમાનં તપોધનમ્

પ્રશાન્તબ્રહ્મનિર્ઘોષં પ્રક્ષીણજનસંચયમ્

ક્રન્દમાનાતુરસ્ત્રીકં હતાશેષપરિચ્છદમ્

શૂન્યારણ્યનિભં જજ્ઞે યજ્ઞવાટં તદાર્દિતમ્

શૂલવેગપ્રરુગ્ણાશ્ચ ભિન્નબાહૂરુવક્ષસઃ

વિનિકૃત્તોત્તમાંગાશ્ચ પેતુરુર્વ્યાં સુરોત્તમાઃ

હતેષુ તેષુ દેવેષુ પતિતેષુઃ સહસ્રશઃ

પ્રવિવેશ ગણેશાનઃ ક્ષણાદાહવનીયકમ્

પ્રવિષ્ટમથ તં દૃષ્ટ્વા ભદ્રં કાલાગ્નિસંનિભમ્

દુદ્રાવ મરણાદ્ભીતો યજ્ઞો મૃગવપુર્ધરઃ

સ વિસ્ફાર્ય મહચ્ચાપં દૃઢજ્યાઘોષણભીષણમ્

ભદ્રસ્તમભિદુદ્રાવ વિક્ષિપન્નેવ સાયકાન્

આકર્ણપૂર્ણમાકૃષ્ટં ધનુરમ્બુદસંનિભમ્

નાદયામાસ ચ જ્યાં દ્યાં ખં ચ ભૂમિં ચ સર્વશઃ

તમુપશ્રિત્ય સન્નાદં હતો ઽસ્મીત્યેવ વિહ્વલમ્

શરણાર્ધેન વક્રેણ સ વીરો ઽધ્વરપૂરુષમ્

મહાભયસ્ખલત્પાદં વેપન્તં વિગતત્વિષમ્

મૃગરૂપેણ ધાવન્તં વિશિરસ્કં તદાકરોત્

તમીદૃશમવજ્ઞાતં દૃષ્ટ્વા વૈ સૂર્યસંભવમ્

વિષ્ણુઃ પરમસંક્રુદ્ધો યુદ્ધાયાભવદુદ્યતઃ

તમુવાહ મહાવેગાત્સ્કન્ધેન નતસંધિના

સર્વેષાં વયસાં રાજા ગરુડઃ પન્નગાશનઃ

દેવાશ્ચ હતશિષ્ટા યે દેવરાજપુરોગમાઃ

પ્રચક્રુસ્તસ્ય સાહાય્યં પ્રાણાંસ્ત્યક્તુમિવોદ્યતાઃ

વિષ્ણુના સહિતાન્દેવાન્મૃગેન્દ્રઃ ક્રોષ્ટુકાનિવ

દૃષ્ટ્વા જહાસ ભૂતેન્દ્રો મૃગેન્દ્ર ઇવ વિવ્યથઃ

ઇતિ શ્રીશિવમહાપુરાણે સપ્તમ્યાં વાયવીયસંહિતાયાં પૂર્વખણ્ડે દેવદંડવર્ણનં નામૈકવિંશો ઽધ્યાયઃ