શિવ પુરાણ · અધ્યાય 2.5.11

વ્યાસ ઉવાચ ॥
બ્રહ્મપુત્ર મહાપ્રાજ્ઞ ધન્યસ્ત્વં શૈવસત્તમ ॥
કિમકાર્ષુસ્તતો દેવા દગ્ધે ચ ત્રિપુરેઽખિલાઃ

મયઃ કુત્ર ગતો દગ્ધો પતયઃ કુત્ર તે ગતાઃ ॥
તત્સર્વં મે સમાચક્ષ્વ યદિ શંભુકથાશ્રયમ્

સૂત ઉવાચ ॥
ઇત્યાકર્ણ્ય વ્યાસવાક્યં ભગવાન્ભવકૃત્સુતઃ ॥
સનત્કુમારઃ પ્રોવાચ શિવપાદયુગં સ્મરન્

સનત્કુમાર ઉવાચ ॥ ॥
શૃણુ વ્યાસ મહાબુદ્ધે પારાશર્યં મહેશિતુઃ ॥
ચરિતં સર્વપાપઘ્નં લોકલીલાનુસારરિણઃ

મહેશ્વરેણ સર્વસ્મિંસ્ત્રિપુરે દૈત્યસંકુલે ॥
દગ્ધે વિશેષતસ્તત્ર વિસ્મિતાસ્તેઽભવન્સુરાઃ॥

ન કિંચિદબ્રુવન્દેવાઃ સેન્દ્રોપેંદ્રાદયસ્તદા ॥
મહાતેજસ્વિનં રુદ્રં સર્વે વીક્ષ્ય સસંભ્રમાઃ

મહાભયંકરં રૌદ્રં પ્રજ્વલંતં દિશો દશ ॥
કોટિસૂર્યપ્રતીકાશં પ્રલયાનલસન્નિભમ્

ભયાદ્દેવં નિરીક્ષ્યૈવ દેવીં ચ હિમવત્સુતામ્॥
બિભ્યિરે નિખિલા દેવપ્રમુખા સ્તસ્થુરાનતાઃ

દૃષ્ટ્વાનીકં તદા ભીતં દેવાનામૃષિપુંગવાઃ ॥
ન કિંચિદૂચુસ્સંતસ્થુઃ પ્રણેમુસ્તે સમંતતઃ

અથ બ્રહ્માપિ સંભીતો દૃષ્ટ્વા રૂપં ચ શાંકરમ્ ॥
તુષ્ટાવ તુષ્ટહૃદયો દેવૈસ્સહ સમાહિતઃ

વિષ્ણુના ચ સભીતેન દેવદેવં ભવં હરમ્ ॥
ત્રિપુરારિં સગિરિજં ભક્તાધીનં મહેશ્વરમ્

॥ બ્રહ્મોવાચ ॥
દેવદેવ મહાદેવ ભક્તાનુગ્રહકારક ॥
પ્રસીદ પરમેશાન સર્વ દેવહિતપ્રદ

પ્રસીદ જગતાં નાથ પ્રસીદાનંદદાયક ॥
પ્રસીદ શંકર સ્વામિન્ પ્રસીદ પરમેશ્વર

ૐકારાય નમસ્તુભ્યમાકારપરતારક ॥
પ્રસીદ સર્વદેવેશ ત્રિપુરઘ્ન મહેશ્વર

નાનાવાચ્યાય દેવાય વરણપ્રિય શંકર ॥
અગુણાય નમસ્તુભ્યં પ્રકૃતેઃ પુરુષાત્પર

નિર્વિકારાય નિત્યાય નિત્યતૃપ્તાય ભાસ્વતે ॥
નિરંજનાય દિવ્યાય ત્રિગુ ણાય નમોઽસ્તુ તે

સગુણાય નમસ્તુભ્યં સ્વર્ગેશાય નમોસ્તુ તે ॥
સદાશિવાય શાંતાય મહેશાય પિનાકિને

સર્વજ્ઞાય શરણ્યાય સદ્યોજાતાય તે નમઃ ॥
વામદેવાય રુદ્રાય તદાપ્યપુરુષાય ચ

અઘોરાય સુસેવ્યાય ભક્તાધીનાય તે નમઃ ॥
ઈશાનાય વરેણ્યાય ભક્તાનંદપ્રદાયિને

રક્ષરક્ષ મહાદેવ ભીતાન્નસ્સકલામરાન્ ॥
દગ્ધ્વા ચ ત્રિપુરં સર્વે કૃતાર્થા અમરાઃ કૃ તાઃ

સ્તુત્વૈવં દેવતાસ્સર્વા નમસ્કારં પૃથક્પૃથક્ ॥
ચક્રુસ્તે પરમપ્રીતા બ્રહ્માદ્યાસ્તુ સદાશિવમ્

અથ બ્રહ્મા સ્વયં દેવં ત્રિપુરારિં મહેશ્વરમ્ ॥
તુષ્ટાવ પ્રણતો ભૂત્વા નતસ્કંધઃ કૃતાંજલિઃ

બ્રહ્મોવાચ ॥ ભગવન્દેવદેવેશ ત્રિપુરાન્તક શંકર ॥
ત્વયિ ભક્તિઃ પરા મેઽસ્તુ મહાદેવાનપાયિની

સર્વદા મેઽસ્તુ સારથ્યં તવ દેવેશ શંકર ॥
અનુકૂલો ભવ વિભો સદા ત્વં પરમેશ્વર

સનત્કુમાર ઉવાચ ॥
ઇતિ સ્તુત્વા વિધિશ્શંભું ભક્તવત્સલમાનતઃ ॥
વિરરામ નતસ્કંધઃ કૃતાંજલિરુદારધીઃ

જનાર્દનોઽપિ ભગવાન્ નમસ્કૃત્ય મહેશ્વરમ્ ॥
કૃતાંજલિપુટો ભૂત્વા તુષ્ટાવ ચ મહેશ્વરમ્

વિષ્ણુરુવાચ ॥ દેવાધીશ મહેશાન દીનબંધો કૃપાકર ॥
પ્રસીદ પરમેશાન કૃપાં કુરુ નતપ્રિય

નિર્ગુણાય નમસ્તુભ્યં પુનશ્ચ સગુણાય ચ ॥
પુનઃ પ્રકૃતિરૂપાય પુનશ્ચ પુરુષાય ચ

પશ્ચાદ્ગુણસ્વરૂપાય નતો વિશ્વાત્મને નમઃ ॥
ભક્તિપ્રિયાય શાંતાય શિવાય પરમાત્મને

સદાશિવાય રુદ્રાય જગતાં પતયે નમઃ ॥
ત્વયિ ભક્તિર્દૃઢા મેઽદ્ય વર્દ્ધમાના ભવત્વિતિ

સનત્કુમાર ઉવાચ ॥
ઇત્યુક્ત્વા વિરરામાસૌ શૈવપ્રવરસત્તમઃ ॥
સર્વે દેવાઃ પ્રણમ્યોચુસ્તતસ્તં પરમેશ્વરમ્

દેવા ઊચુઃ ॥
દેવનાથ મહાદેવ કરુણાકર શંકર॥
પ્રસીદ જગતાં નાથ પ્રસીદ પરમેશ્વર

પ્રસીદ સર્વકર્તા ત્વં નમામસ્ત્વાં વયં મુદા॥
ભક્તિર્દૃઢાસ્માકં નિત્યં સ્યાદનપાયિની

સનત્કુમાર ઉવાચ॥
ઇતિ સ્તુતશ્ચ દેવેશો બ્રહ્મણા હરિણામરૈઃ॥
પ્રત્યુવાચ પ્રસન્નાત્મા શંકરો લોકશંકરઃ

શંકર ઉવાચ ॥
હે વિધે હે હરે દેવાઃ પ્રસન્નોઽસ્મિ વિશેષતઃ॥
મનોઽભિલષિતં બ્રૂત વરં સર્વે વિચા રતઃ

સનત્કુમારઃ ઉવાચ ॥
ઇત્યુક્તં વચનં શ્રુત્વા હરેણ મુનિસત્તમ ॥
પ્રત્યૂચુસ્સર્વદેવાશ્ચ પ્રસન્નેનાન્તરાત્મના

સર્વે દેવા ઊચુઃ॥
યદિ પ્રસન્નો ભગવન્યદિ દેયો વરસ્ત્વયા॥
દેવદેવેશ ચાસ્મભ્યં જ્ઞાત્વા દાસાન્હિ નસ્સુરાન્

યદા દુઃખં તુ દેવાનાં સંભવેદ્દેવસત્તમ ॥
તદા ત્વં પ્રકટો ભૂત્વા દુઃખં નાશય સર્વદા

સનત્કુમાર ઉવાચ॥
ઇત્યુક્તો ભગવાનુદ્રો બ્રહ્મણા હરિણામરૈઃ॥
યુગપત્પ્રાહ તુષ્ટાત્મા તથેત્યસ્તુ નિરંતરમ્

સ્તવૈરેતૈશ્ચ તુષ્ટોઽસ્મિ દાસ્યામિ સર્વદા ધ્રુવમ્॥
યદભીષ્ટતમં લોકે પઠતાં શૃણ્વતાં સુરાઃ

ઇત્યુક્ત્વા શંકરઃ પ્રીતો દેવદુઃખહરસ્સદા ॥
સર્વદેવપ્રિયં યદ્વૈ તત્સર્વં ચ પ્રદત્તવાન્

ઇતિ શ્રીશિવમહાપુરાણે દ્વિતીયાયાં રુદ્રસંહિતાયાં પઞ્ચમે યુદ્ધખંડે દેવસ્તુતિવર્ણનં નામૈકાદશોઽધ્યાયઃ