શિવ પુરાણ · અધ્યાય 2.1.19

બ્રહ્મોવાચ ॥
પાદ્મે કલ્પે મમ સુરા બ્રહ્મણો માનસાત્સુતાત્ ॥
પુલસ્ત્યાદ્વિશ્રવા જજ્ઞે તસ્ય વૈશ્રવણસ્સુતઃ

તેનેયમલકા ભુક્તા પુરી વિશ્વકૃતા કૃતા ॥
આરાધ્ય ત્ર્યંબકં દેવમત્યુગ્રતપસા પુરા

વ્યતીતે તત્ર કલ્પે વૈ પ્રવૃત્તે મેઘવાહને ॥
યાજ્ઞદત્તિરસૌ શ્રીદસ્તપસ્તેપે સુદુસ્સહમ્

ભક્તિ પ્રભાવં વિજ્ઞાય શંભોસ્તદ્દીપમાત્રતઃ ॥
પુરા પુરારેસ્સંપ્રાપ્ય કાશિકાં ચિત્પ્રકાશિકામ્

શિવૈકાદશમુદ્બોધ્ય ચિત્તરત્નપ્રદીપકૈઃ॥
અનન્યભક્તિસ્નેહાઢ્યસ્તન્મયો ધ્યાનનિશ્ચલઃ

શિવૈક્યં સુમહાપાત્રં તપોગ્નિપરિબૃંહિતમ્॥
કામક્રોધમહાવિઘ્નપતંગાઘાત વર્જિતમ્

પ્રાણસંરોધનિર્વાતં નિર્મલં નિર્મલેક્ષણાત્ ॥
સંસ્થાપ્ય શાંભવં લિંગં સદ્ભાવકુસુમાર્ચિતમ્

તાવત્તતાપ સ તપસ્ત્વગસ્થિપરિશેષિતમ્ ॥
યાવદ્બભૂવ તદ્વર્ણં વર્ષાણામયુતં શતમ્

તતસ્સહ વિશાલાક્ષ્યા દેવો વિશ્વેશ્વરરસ્વયમ્॥
અલકાપતિમાલોક્ય પ્રસન્નેનાંતરાત્મના

લિંગે મનસ્સમાધાય સ્થિતં સ્થાણુસ્વરૂપિણમ્॥
ઉવાચ વરદોઽસ્મીતિ તદાચક્ષ્વાલકાપતે ॥

ઉન્મીલ્ય નયને યાવત્સ પશ્યતિ તપોધનઃ ॥
તાવદુદ્યત્સહસ્રાંશુ સહસ્રાધિકતેજસમ્

પુરો દદર્શ શ્રીકંઠં ચન્દ્રચૂડમુમાધવમ્ ॥
તત્તેજઃ પરિભૂતાક્ષિતેજાઃ સંમીલ્ય લોચને

ઉવાચ દેવદેવેશં મનોરથપદાતિગમ્ ॥
નિજાંઘ્રિદર્શને નાથ દૃક્સામર્થ્યં પ્રયચ્છ મે

અયમેવ વરો નાથ યત્ત્વં સાક્ષાન્નિરીક્ષ્યસે ॥
કિમન્યેન વરેણેશ નમસ્તે શશિશેખર

ઇતિ તદ્વચનં શ્રુત્વા દેવદેવ ઉમાપતિઃ॥
દદૌ દર્શનસામર્થ્યં સ્પૃષ્ટ્વા પાણિતલેન તમ્

પ્રસાર્ય નયને પૂર્વમુમામેવ વ્યલોકયત્॥
તોઽસૌ યાજ્ઞદત્તિસ્તુ તત્સામર્થ્યમવાપ્ય ચ

શંભોસ્સમીપે કા યોષિદેષા સર્વાંગસુન્દરી ॥
અનયા કિં તપસ્તપ્તં મમાપિ તપસોઽધિકમ્

અહો રૂપમહો પ્રેમ સૌભાગ્યં શ્રીરહો ભૃશમ્ ॥
ઇત્યવાદીદસૌ પુત્રો મુહુર્મુહુરતીવ હિ

ક્રૂર દૃગ્વીક્ષતે યાવત્પુનઃપુનરિદં વદન્ ॥
તાવત્પુસ્ફોટ તન્નેત્રં વારાં વામાવિલોકનાત્

અથ દેવ્યબ્રવીદ્દેવ કિમસૌ દુષ્ટતાપસઃ ॥
અસકૃદ્વીક્ષ્ય માં વક્તિ કુરુ ત્વં મે તપઃપ્રભામ્

અસકૃદ્દક્ષિણેનાક્ષ્ણા પુનર્મામેવ પશ્યતિ ॥
અસૂયમાનો મે રૂપપ્રેમ સૌભાગ્યસંપદ

ઇતિ દેવીગિરં શ્રુત્વા પ્રહસ્ય પ્રાહ તાં પ્રભુઃ ॥
ઉમે ત્વદીયઃ પુત્રોઽયં ન ચ ક્રૂરેણ ચક્ષુષા

સંપશ્યતિ તપોલક્ષ્મીં તવ કિં ત્વધિવર્ણયેત્ ॥
ઇતિ દેવીં સમાભાષ્ય તમીશઃ પુનરબ્રવીત્

વરાન્દદામિ તે વત્સ તપસાનેન તોષિતઃ ॥
નિધીનામથ નાથસ્ત્વં ગુહ્યકાનાં ભવેશ્વરઃ

યક્ષાણાં કિન્નરાણાં ચ રાજ્ઞાં રાજ ચ સુવ્રતઃ ॥
પતિઃ પુણ્યજનાનાં ચ સર્વેષાં ધનદો ભવ

મયા સખ્યં ચ તે નિત્યં વત્સ્યામિ ચ તવાંતિકે ॥
અલકાં નિકષા મિત્ર તવ પ્રીતિવિવૃદ્ધયે

આગચ્છ પાદયોરસ્યાઃ પત તે જનની ત્વિયમ્ ॥
યાજ્ઞદત્તે મહાભક્ત સુપ્રસન્નેન ચેતસા

બ્રહ્મોવાચ ॥
ઇતિ દત્ત્વા વરાન્દેવઃ પુનરાહ શિવાં શિવઃ ॥
પ્રસાદં કુરુ દેવેશિ તપસ્વિન્યંગજેઽત્ર વૈ

ઇત્યાકર્ણ્ય વચશ્શંભોઃ પાર્વતી જગદમ્બિકા ॥
અબ્રવીદ્યાજ્ઞદત્તિં તં સુપ્રસન્નેન ચેતસા

દેવ્યુવાચ ॥
વત્સ તે નિર્મલા ભક્તિર્ભવે ભવતુ સર્વદા ॥
ભવૈકપિંગો નેત્રેણ વામેન સ્ફુટિતેન હ

દેવેન દત્તા યે તુભ્યં વરાસ્સંતુ તથૈવ તે ॥
કુબેરો ભવ નામ્ના ત્વં મમ રૂપેર્ષ્યયા સુત

ઇતિ દત્ત્વા વરાન્દેવો દેવ્યા સહ મહેશ્વરઃ ॥
ધનદાયાવિવેશાથ ધામ વૈશ્વેશ્વરાભિધમ્

ઇત્થં સખિત્વં શ્રીશંભોઃ પ્રાપૈષ ધનદઃ પુરમ્ ॥
અલકાન્નિકષા ચાસીત્કૈલાસશ્શંકરાલયઃ

ઇતિ શ્રીશિવમહાપુરાણે દ્વિતીયાયાં રુદ્રસંહિતાયાં પ્રથમખણ્ડે કૈલાસગમનોપાખ્યાને કુબેરસ્ય શિવમિત્રત્વવર્ણનો નામૈકોનવિંશોઽધ્યાયઃ